ଭୁବନେଶ୍ୱର,୭।୩(ବ୍ୟୁରୋ):ମହିଳାମାନେ ଅନେକ ସମୟରେ ବହୁ ସମସ୍ୟାର ସମ୍ମୁଖୀନ ହୋଇଥାନ୍ତି। ସେହିଭଳି ବିଭିନ୍ନ କାରଣରୁ ସେମାନେ ଅଭିଯୋଗ କରିବାକୁ ମଧ୍ୟ କୁଣ୍ଠିତ ହୋଇଥାନ୍ତି। ଫଳରେ ସେମାନେ ନ୍ୟାୟ ପାଇବାରୁ ବଞ୍ଚତ୍ତ ହେଉଛନ୍ତି। ନ୍ୟାୟ ପାଇବାକୁ ଯାଇ କିଛି ମହିଳା ଶୋଷଣର ଶିକାର ହେଉଥିବା ମଧ୍ୟ ଅଭିଯୋଗ ରହିଛି। ବିଶେଷ କରି ମହିଳାମାନେ ଘରୋଇ ହିଂସା, ଯୌତୁକ ନିର୍ଯାତନା, ବଳାତ୍କାର, ଅସଦାଚରଣ, ଚାଲାଣର ଶିକାର ହେଉଥିବାବେଳେ ଶିଶୁମାନେ, ଯୌନ ନିର୍ଯାତନା, ବାଲ୍ୟ ବିବାହ, ନିଖୋଜ, ଅପହରଣ ଭଳି ପରିସ୍ଥିତିର ସମ୍ମୁଖୀନ ହେଇଥାନ୍ତି। ମହିଳା ଓ ଶିଶୁଙ୍କୁ ଗୋଟିଏ ସ୍ଥାନରେ ସମସ୍ତ ସୁବିଧା ଯୋଗାଇ ନ୍ୟାୟ ପ୍ରଦାନ ପାଇଁ କାର୍ଯ୍ୟ କରୁଛି ୱାନ୍ ଷ୍ଟପ୍ ସେଣ୍ଟର ‘ସକ୍ଷୀ’। ମହିଳା ଓ ଶିଶୁ ସୁରକ୍ଷା ବିଭାଗ ଓ ମିଶନ ଶକ୍ତି ବିଭାଗ ଦ୍ୱାରା କ୍ୟାପିଟାଲ ହସ୍ପିଟାଲ ପରିସରରେ ୨୦୧୫ ଅକ୍ଟୋବର ପହିଲାରୁ କାର୍ଯ୍ୟ କରୁଥିବା ସଖୀ କାର୍ଯ୍ୟାଳୟକୁ ୨୦୨୨ ଜାନୁୟାରୀରୁ ଡିସେମ୍ବର ମଧ୍ୟରେ ମୋଟ ୩୬୫ ଅଭିଯୋଗ ଆସିଛି। ଏଥିମଧ୍ୟରୁ ୧୮୦ଟିର ସମାଧାନ ହୋଇଥିବାବେଳେ ୧୮୫ଟି ବିଚାରାଧୀନ ରହିଛି। ସେହିଭଳି ଘରୋଇ ହିଂସା ନେଇ ସର୍ବାଧିକ ୧୧୦ଟି ଅଭିଯୋଗ ହୋଇଥିବାବେଳେ ୪୦ଟି ମାମଲାର ସମାଧାନ ହୋଇଛି ଓ ୩୩ଟି ମାମଲା ବିଚାରାଧୀନ ରହିଛି। ସମସ୍ତ ୫୦ରୁ ଅଧିକ ବଳାତ୍କାର ମାମଲା ନେଇ ଆବଶ୍ୟକ ପଦକ୍ଷେପ ଗ୍ରହଣ ହୋଇଛି। ୩୦ ମାମଲାର ସମାଧାନ ହୋଇଛି ଓ ୨୦ ଟି ବିଚାରାଧୀନ ରହିଛି। ୩୭ ଟି ଯୌନ ଅପରାଧ ମାମଲା ମଧ୍ୟରୁ ୧୯ଟିର ସମାଧାନ ହୋଇଥିବାବେଳେ ୧୮ଟି ମାମଲା ବିଚାରଧିନ ରହିଛି। ୨୦ଟି ଚାଲାଣ ଅଭିଯୋଗ ମଧ୍ୟରୁ ସମସ୍ତ ମାମଲାର ସମାଧାନ ହୋଇଛି। ଶିଶୁ ଯୌନ ନିର୍ଯାତନା ଓ ବାଲ୍ୟ ବିବାହ ନେଇ ଅଭିଯୋଗ ହୋଇ ନ ଥିବା ବେଳେ ନିଖୋଜ ଓ ଅପହରଣ ନେଇ ୧୮୦ଟି ଅଭିଯୋଗ ରହିଛି। ଏଥିମଧ୍ୟରୁ ୧୨୦ଟିର ସମାଧାନ ହୋଇଥିବାବେଳେ ୬୦ଟି ବିଚାରାଧୀନ ରହିଛି। ସେହିପରି ଅନ୍ୟାନ୍ୟ ୩୭ଟି ଅଭିଯୋଗ ମଧ୍ୟରୁ ୨୫ଟିର ସମାଧାନ ହୋଇଥିବାବେଳେ ୧୨ଟି ବିଚାରାଧୀନ ରହିଛି। ବିଭିନ୍ନ ଅଭିଯୋଗ ନେଇ ଆସୁଥିବା ମହିଳାଙ୍କୁ ଯେଭଳି ଉଚିତ ନ୍ୟାୟ ମିଳିପାରିବ ଏନେଇ ସକ୍ଷୀ ପକ୍ଷରୁ ସମସ୍ତ ବ୍ୟବସ୍ଥା ଗ୍ରହଣ ହେଉଛି। ଏଥିପାଇଁ ପୋଲିସ ଓ ସ୍ବାସ୍ଥ୍ୟ ବିଭାଗ ପକ୍ଷରୁ ସମସ୍ତ ସହଯୋଗ ଯୋଗାଇ ଦିଆଯାଇଛି ବୋଲି ସଖୀ କେନ୍ଦ୍ର ପକ୍ଷରୁ କୁହାଯାଇଛି।
