ଭୁବନେଶ୍ୱର,୪ା୭(ବନ୍ଦନା ସେଠୀ):ରାଜ୍ୟରେ ଖାଲି ପଡିଥିବା ଡାକ୍ତର ପଦବୀ ପୂରଣ ସମେତ ୧୩ଦଫା ଦାବି ନେଇ ବୁଧବାରଠାରୁ ଡାକ୍ତରମାନେ ଆନ୍ଦୋଳନ ଜାରି ରଖିଛନ୍ତି। ରାଜ୍ୟ ସରକାର ଦରମା ବନ୍ଦ ଓ ବହିଷ୍କାର ପାଇଁ ନିର୍ଦ୍ଦେଶ ଦେବା ସତ୍ତ୍ୱେ ଦାବି ପୂରଣ ଜିଦ୍ରେ ଓଡ଼ିଶା ମେଡିକାଲ ସର୍ଭିସ୍ ଆସୋସିଏଶନ (ଓମ୍ସା) ଅଟଳ ରହିଛି। ଫଳରେ ୩ଦିନ ହେବ ସରକାରୀ ମେଡିକାଲ କଲେଜ ଆଣ୍ଡ୍ ହସ୍ପିଟାଲ ସମେତ ଡାକ୍ତରଖାନାରେ ରୋଗୀସେବା ଗୁରୁତର ପ୍ରଭାବିତ ହୋଇଛି। ଆନ୍ଦୋଳନ ଯୋଗୁ ଚିକିତ୍ସା ସେବା ଏକପ୍ରଭାର ଠପ୍ ହୋଇଯାଇଥିବାବେଳେ ରୋଗୀଙ୍କ ମୃତ୍ୟୁ ଅଭିଯୋଗ ଆସୁଛି। ଏପରିକି ବ୍ୟବଚ୍ଛେଦ ହୋଇ ନ ପାରି ମୃତଦେହ ୫୦ ଘଣ୍ଟା ଧରି ପଡି ରହିବା ଭଳି ଘଟଣା ନଜରକୁ ଆସିଛି। ସ୍ଥିତି ବିଗିଡି ଯାଉଥିବାବେଳେ ସମାଧାନ ବାଟ ବାହାର କରିବା ପାଇଁ ରାଜ୍ୟ ସରକାର ପଦକ୍ଷେପ ନେଇଛନ୍ତି। ସ୍ବାସ୍ଥ୍ୟମନ୍ତ୍ରୀ ଡ. ମୁକେଶ ମହାଲିଙ୍ଗ ଓମ୍ସା ସଭାପତି ଏବଂ ସାଧାରଣ ସମ୍ପାଦକଙ୍କୁ ଆଲୋଚନା ପାଇଁ ଆମନ୍ତ୍ରଣ କରିଛନ୍ତି। ଏନେଇ ସ୍ବାସ୍ଥ୍ୟ ବିଭାଗ ପକ୍ଷରୁ ଚିଠି ଜାରି କରାଯାଇଛି। ଶନିବାର ପୂର୍ବାହ୍ନ ୧୧ଟା ୩୦ରେ ସ୍ବାସ୍ଥ୍ୟମନ୍ତ୍ରୀଙ୍କ କାର୍ଯ୍ୟାଳୟରେ ଏହି ଗୁରୁତ୍ୱପୂର୍ଣ୍ଣ ବୈଠକ ବସିବ ବୋଲି ଚିଠିରେ ଉଲ୍ଲେଖ ରହିଛି। ଆନ୍ଦୋଳନ ବନ୍ଦ କରି ଆଲୋଚନାରେ ଯୋଗ ଦେବାକୁ ଆହ୍ବାନ କରାଯାଇଛି। ଏଥିସହିତ ଡାକ୍ତରମାନଙ୍କ ବିଭିନ୍ନ ଦାବି ଓ ସମସ୍ୟା ଉପରେ ଆଲୋଚନା କରି ପରସ୍ପର ସହମତି ଭିତ୍ତିରେ ସମାଧାନର ରାସ୍ତା
ବାହାର କରିବାକୁ ସରକାର ଉଦ୍ୟମ କରୁଛନ୍ତି। ତେବେ ବୈଠକରେ ଓମ୍ସା ପକ୍ଷରୁ କେଉଁସବୁ ପ୍ରସଙ୍ଗ ଉଠାଯିବ ଏବଂ ସରକାର କେଉଁ ପ୍ରସ୍ତାବ ରଖିବେ, ତାହା ଉପରେ ସମସ୍ତଙ୍କ ନଜର ରହିଛି।
ଅପରପକ୍ଷେ ସ୍ବାସ୍ଥ୍ୟମନ୍ତ୍ରୀ ଲିଖିତ ଭାବେ ପ୍ରତିଶ୍ରୁତି ଦେଲେ ଆନ୍ଦୋଳନ ସ୍ଥଗିତ କରାଯିବ, ଅନ୍ୟଥା ଆନ୍ଦୋଳନ ଆହୁରି ତୀବ୍ରତର ହେବ ବୋଲି ଓମ୍ସା ସଭାପତି ଡା. କିଶୋର ଚନ୍ଦ୍ର ମିଶ୍ର ସୂଚନା ଦେଇଛନ୍ତି। ଗୋଟେପଟେ ସରକାର ଆନ୍ଦୋଳନ ସ୍ଥଗିତ ରଖିବାକୁ ଡାକ୍ତରମାନଙ୍କୁ ନାଲି ଆଖି ଦେଖାଇଥିଲେ ହେଁ ସେମାନେ ଏହାକୁ ଖାତିର୍ କରି ନାହାନ୍ତି। ସରକାର ଦରମା ବନ୍ଦ କରିବାଠାରୁ ଆରମ୍ଭ କରି ଯେ କୌଣସି ପଦକ୍ଷେପ ନେଲେ ମଧ୍ୟ ଆମେ ପ୍ରସ୍ତୁତ ଅଛୁ। ରୋଗୀଙ୍କ ଜୀବନ ଗଲେ ସରକାର ଦାୟୀ ରହିବେ ବୋଲି ଡା. ମିଶ୍ର କହିଛନ୍ତି।
ଅପରପକ୍ଷେ ଡାକ୍ତରଙ୍କ ଆନ୍ଦୋଳନ ପାଇଁ ରାଜ୍ୟରେ ରୋଗୀମାନେ ହନ୍ତସନ୍ତ ହେଉଛନ୍ତି। କ୍ୟାପିଟାଲ ହସ୍ପିଟାଲ, ବୁର୍ଲା, ଭିମ୍ସାର୍ ଭଳି ବଡ ବଡ ମେଡିକାଲରେ ଜୁନିୟର ଡାକ୍ତରଙ୍କ ଭରସାରେ ଓପିଡି ଚାଲିଛି। ସେହିପରି ବିଭିନ୍ନ ସ୍ବାସ୍ଥ୍ୟକେନ୍ଦ୍ରଗୁଡିକରେ ଆୟୁଷ, ଏମ୍ଏଚ୍ୟୁ ଏବଂ ଆର୍ବିଏସ୍କେ ଡାକ୍ତରମାନେ ଦାୟିତ୍ୱ ତୁଲାଉଛନ୍ତି। ଡାକ୍ତରଙ୍କ ଆନ୍ଦୋଳନ ପାଇଁ କେଉଁଠି ଶବ ବ୍ୟବଚ୍ଛେଦ ହୋଇ ନ ପାରି ଘଣ୍ଟା ଘଣ୍ଟା ମେଡିକାଲରେ ପଡି ରହୁଛି ତ ଆଉ କେଉଁଠି ରୋଗୀର ଉପଯୁକ୍ତ ଚିକିତ୍ସା ନ ପାଇ ମୃତ୍ୟୁବରଣ ହୋଇଛି। ଶୁକ୍ରବାର ବଲାଙ୍ଗୀର ଜିଲା ପାଟଣାଗଡ ଉପଖଣ୍ଡ ଡାକ୍ତରଖାନାରେ ୪ବର୍ଷର ଶିଶୁ ପୁତ୍ରର ମୃତ୍ୟୁ ହୋଇଥିବା ଅଭିଯୋଗ ହୋଇଛି। ସେହିପରି ନବରଙ୍ଗପୁର ଜିଲା ମୁଖ୍ୟ ଚିକିତ୍ସାଳୟରେ ଜଣେ ୬ମାସର ଗର୍ଭବତୀ ମହିଳା ଅଲଟ୍ରାସାଉଣ୍ଡ୍ କରି ନ ପାରି ଫେରିଯାଇଛନ୍ତି। ରାଜ୍ୟର ବିଭିନ୍ନ ଜିଲାରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଥିବାବେଳେ ଡାକ୍ତରମାନେ କିନ୍ତୁ ନିଜ ଦାବି ପୂରଣ ନେଇ ଜିଦ୍ ଧରି ବସିଛନ୍ତି।
Dharitri – Odisha’s No.1 Odia Daily
