ବ୍ରହ୍ମପୁର ଅଫିସ,୬ା୨: ବ୍ରହ୍ମପୁର ବଡ଼ ମେଡିକାଲ ଏବେ ନାନା ଅବ୍ୟବସ୍ଥାରେ ଛନ୍ଦି ହୋଇ ହୋଇପଡ଼ିଛି। ଏଠାରୁ ବାରମ୍ବାର ବରିଷ୍ଠ ଡାକ୍ତରଙ୍କୁ ଅନ୍ୟତ୍ର ବଦଳି କରାଯାଉଛି। ଡାକ୍ତର ଅଭାବ ଦୂର କରିବାରେ ସରକାର ବିଫଳ ରହିଛନ୍ତି। ନାମକୁ ମାତ୍ର କେତେକ ଜୁନିୟର ଡାକ୍ତରଙ୍କ ସେଠାରେ ନିଯୁକ୍ତି ଦିଆଯାଉଛି ବୋଲି ସାମାଜିକ କର୍ମୀ ବିନୋଦ ସାବତ ଅଭିଯୋଗ କରିଛନ୍ତି। ଏମ୍କେସିଜିରେ ଲାଗି ରହିଥିବା ସ୍ବାସ୍ଥ୍ୟ ସମସ୍ୟା ଦୂରକରି ଏଠାରେ ବିଶ୍ୱସ୍ତରୀୟ ସ୍ବାସ୍ଥ୍ୟସେବା ପ୍ରଦାନ ଦାବି ନେଇ ସାବତଙ୍କ ନେତୃତ୍ୱରେ ଗଣ ଆନ୍ଦୋଳନ କରାଯାଇଥିଲା। ମୁଖ୍ୟତଃ କାର୍ଡିଓଥରାସିସ୍(ହୃଦ୍ରୋଗ) ବିଭାଗରେ ଡାକ୍ତର ଶୂନ୍ୟ ହୋଇପଡ଼ିଥିବା ଯୋଗୁ ତୁରନ୍ତ ଡାକ୍ତର ନିଯୁକ୍ତି ଦେବା, ଅଚଳ ହୋଇପଡିଥିବା ଏଣ୍ଡୋସ୍କୋପିକ ମେଶିନ କାର୍ଯ୍ୟକ୍ଷମ କରିବା, ୨୪ ଘଣ୍ଟା ଅଲ୍ଟ୍ରାସାଉଣ୍ଡ ପରୀକ୍ଷା କରିବା, ବନ୍ଦ ହୋଇଯାଇଥିବା ଅଙ୍କୋଲୋଜି ବିଭାଗ ଖୋଲିବା ଏବଂ ଖାଲିପଡ଼ିଥିବା ଡାକ୍ତର ପଦବୀ ତୁରନ୍ତ ପୂରଣ ଦାବି ନେଇ ମେଡିକାଲ କଲେଜ ସମ୍ମୁଖରେ ୩ ଘଣ୍ଟିଆ ବିକ୍ଷୋଭ ପ୍ରଦର୍ଶନ କରାଯାଇଥିଲା। ପରେ ଏ ନେଇ ଏକ ଦାବିପତ୍ର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ମେଡିକାଲ କଲେଜ ଅଧୀକ୍ଷକ ପ୍ରଫେସର ତଥା ଡିନ୍ ଡାକ୍ତର ଅବନୀକାନ୍ତ ମିଶ୍ରଙ୍କୁ ପ୍ରଦାନ କରାଯାଇଛି। ସ୍ବାସ୍ଥ୍ୟ ସମସ୍ୟା ସମାଧାନ ଦିଗରେ ଖୁବ୍ଶୀଘ୍ର ଯଦି ରାଜ୍ୟ ସରକାର କୌଣସି କାର୍ଯ୍ୟାନୁଷ୍ଠାନ ନ ନେଲେ ତେବେ ଆଗାମୀ ଦିନରେ ଭୁବନେଶ୍ୱରରେ ଧାରଣା ଦିଆଯିବ ବୋଲି ଧାରଣାରତ କର୍ମୀମାନେ ଚେତାବନୀ ଦେଇଛନ୍ତି।
