କଳିଙ୍ଗନଗର,୧ା୧(ଡି.ଏନ.ଏ.): ଦାନଗଦି ପଞ୍ଚାୟତ ସମିତିର ୧୦ମ ଅଧିବେଶନ ଶୁକ୍ରବାର ଅନୁଷ୍ଠିତ ହୋଇଯାଇଛି। ସମିତି ଅଧ୍ୟକ୍ଷା ଲୋପାମୁଦ୍ରା ନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ବିଭିନ୍ନ ବିଭାଗରେ ଦେଖା ଦେଇଥିବା ଅବ୍ୟବସ୍ଥାକୁ ନେଇ ପଞ୍ଚାୟତ ଜନପ୍ରତିନିଧି ଅସନ୍ତୋଷ ପ୍ରକାଶ କରିଥିଲେ। ଗ୍ରାମ୍ୟ ପାନୀୟ ଜଳଯୋଗାଣ ଓ ପରିମଳ ବିଭାଗର ପରିଚାଳନାଗତ ତ୍ରୁଟି ଯୋଗୁ ଲୋକେ ପିଇବା ପାଣି ପାଇଁ ହନ୍ତସନ୍ତ ହେଉଥିବା ନେଇ ଅଧ୍ୟକ୍ଷା ନାୟକ, ଉପାଧ୍ୟକ୍ଷ ସୁଧାଂଶୁ ଶେଖର ଭଞ୍ଜ, ଜିଲା ପରିଷଦ ସଭ୍ୟ ସୁଶାନ୍ତ ସାମଲ ଓ ସଭ୍ୟା ଭାଗ୍ୟଲକ୍ଷ୍ମୀ ରାଉତ ପ୍ରମୁଖ ଅଭିଯୋଗ ଉଠାଇ ବିଭାଗୀୟ ଯନ୍ତ୍ରୀ ରଶ୍ମିତା ନାଥଙ୍କୁ ବିଭିନ୍ନ ପ୍ରକଳ୍ପର ସ୍ଥିତାବସ୍ଥା ସମ୍ପର୍କରେ ଉତ୍ତର ମାଗିଥିଲେ। ବାରମ୍ବାର ବୈଠକରେ ଆର୍ଡବ୍ଲ୍ୟୁଏସଏସ ଏସ୍ଡିଓ ଅନୁପସ୍ଥିତ ରହୁଥିବା ବେଳେ ବିଭାଗୀୟ କାର୍ଯ୍ୟଧାରା ସ୍ବଚ୍ଛ ଢଙ୍ଗରେ ହେଉ ନ ଥିବା ଅଭିଯୋଗ ହୋଇଥିଲା।
ଡିଏମ୍ଏଫ ପାଣ୍ଠିରେ ହେବାକୁ ଥିବା ସୌରଶକ୍ତି ଚଳିତ ପାନୀୟ ଜଳ ପ୍ରକଳ୍ପ କାମ ଆଗେଇ ପାରୁ ନ ଥିବା ଓ ଅନେକ ସ୍ଥାନରେ ନିମ୍ନମାନର କାମ ହେଉଥିଲେ ମଧ୍ୟ ବିଭାଗୀୟ ଅଙ୍କୁଶ ନ ଥିବାରୁ ପ୍ରତିନିଧିମାନେ ବିଡିଓ ମଣି ପ୍ରସାଦ ମିଶ୍ରଙ୍କ ହସ୍ତକ୍ଷେପ ଲୋଡ଼ିଥିଲେ। ପାନୀୟ ଜଳ ପ୍ରକଳ୍ପ କାମ କରୁଥିବା ଠିକା ସଂସ୍ଥା ଗ୍ରାମ୍ୟ ରାସ୍ତାଗୁଡ଼ିକ ମନଇଚ୍ଛା ଖୋଳି କାମ କରୁଥିବା ଓ ଅନୁମତି ନ ଥାଇ ଜଙ୍ଗଲ ଜମି ନଷ୍ଟ କରୁଥିବା ନେଇ କେତେକ ସରପଞ୍ଚ ଓ ସମିତିସଭ୍ୟ କହିଥିଲେ। ବୈଠକରେ ବିଦ୍ୟୁତ୍ ଓ ସ୍ବାସ୍ଥ୍ୟ ବିଭାଗର ତଳ କର୍ମଚାରୀ ଆସିଥିବାରୁ ଉପସ୍ଥିତ ଲୋକ ପ୍ରତିନିଧି ତୀବ୍ର ସମାଲୋଚନା କରିଥିଲେ। ଡିଲରଙ୍କ ମନୋମୁଖୀ କାର୍ଯ୍ୟ ପାଇଁ ହିତାଧିକାରୀ ସମସ୍ୟାରେ ପଡ଼ୁଛନ୍ତି। ଯୋଗାଣ ନିରୀକ୍ଷକ ଓ ବିଡିଓ ଏହାକୁ ଗୁରୁତର ସହ ନେବାକୁ ପ୍ରତିନିଧିମାନେ ଦାବି ରଖିଥିଲେ। ବ୍ଲକ କାର୍ଯ୍ୟାଳୟ ସୌନ୍ଦର୍ଯ୍ୟକରଣ ପାଇଁ ବ୍ଲକ ଅନୁଦାନ ବିନିଯୋଗ କରିବାକୁ ଉପାଧ୍ୟକ୍ଷ ବିଡିଓ ଏବଂ ସହକାରୀ ଯନ୍ତ୍ରୀଙ୍କୁ କହିଥିଲେ। ବୈଠକରେ ଲୋକନାଥ ଧୀର ଓ ସହକାରୀ ଯନ୍ତ୍ରୀ ସତ୍ୟ ନାରାୟଣ ସାହୁ ମଞ୍ଚାସୀନ ଥିଲେ।
