ଭୁବନେଶ୍ୱର, ୩୦।୧(ବ୍ୟୁରୋ): ୨୦୦୫ରେ କୁଷ୍ଠମୁକ୍ତ ଭାରତ ଘୋଷଣା ହୋଇଥିଲା। କିନ୍ତୁ ଏବେବି ଦେଶର ବିଭିନ୍ନ ସ୍ଥାନରେ କୁଷ୍ଠ ରୋଗୀ ଚିହ୍ନଟ ହେଉଛନ୍ତି। ବର୍ତ୍ତମାନ ବିଶ୍ୱରେ ଯେତିକି ନୂଆ କୁଷ୍ଠ ରୋଗୀ ଚିହ୍ନଟ ହେଉଛନ୍ତି ସେମାନଙ୍କ ମଧ୍ୟରୁ ପ୍ରାୟ ୬୦% ଭାରତରେ ରହିଛନ୍ତି। ସେହିଭଳି ୨୦୦୬-୨୦୦୭ର ଓଡ଼ିଶା ନିଜକୁ କୁଷ୍ଠ ରୋଗମୁକ୍ତ ରାଜ୍ୟ ଭାବେ ଘୋଷଣା କରିଥିଲା। ହେଲେ ରାଜ୍ୟରେ ଏବେ କୃଷ୍ଠ ରୋଗ ନିଜର ଦୃଢ଼ ଉପସ୍ଥିତି ଜାହିର କଲାଣି। ୨୦୨୦-୨୦୨୧ ରାଷ୍ଟ୍ରୀୟ କୁଷ୍ଠ ରୋଗ ବିଲୋପ କାର୍ଯ୍ୟକ୍ରମ (ଏନ୍ଏଲ୍ଇପି) ରିପୋର୍ଟ ଅନୁଯାୟୀ, ଓଡ଼ିଶାରେ ୬,୧୪୮ ନୂତନ କୁଷ୍ଠ ରୋଗୀ ଚିହ୍ନଟ ହୋଇଛନ୍ତିି। ଏମାନଙ୍କ ମଧ୍ୟରେ ୪୨୧ଜଣ ଶିଶୁ ରହିଛନ୍ତି। କୋଭିଡ୍ ଲକ୍ଷଣ ଥିବା ଲୋକଙ୍କୁ ଚିହ୍ନଟ କରିବା ପାଇଁ ଗତବର୍ଷ ରାଜ୍ୟରେ ତିନିମାସ ଧରି ଚାଲିଥିବା ଘରକୁ ଘର ସର୍ଭେରେ ୧,୬୨୫ କୁଷ୍ଠ ରୋଗୀ ଚିହ୍ନଟ ହୋଇଥିଲେ। ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଦ୍ୱାରା ୨୦୧୯ରେ ପ୍ରକାଶିତ ରାଷ୍ଟ୍ରୀୟ ସ୍ବାସ୍ଥ୍ୟ ପ୍ରୋଫାଇଲ (ଏନ୍ଏଚ୍ପି) ଅନୁସାରେ, କୃଷ୍ଠ ରୋଗ ବ୍ୟାପିବା ହାରରେ ଦେଶରେ ଛତିଶଗଡ଼ ପରେ ଓଡ଼ିଶା ଦ୍ୱିତୀୟ ସ୍ଥାନରେ ରହିଛି। ସଚେତନତା ଅଭାବରୁ କୃଷ୍ଠ ରୋଗ ବ୍ୟାପୁଛି। ଏହାର ବିଲୋପ ପାଇଁ ଏକ ଦୃଢ଼ ଏକୀକୃତ ରଣନୀତି ଓ କାର୍ଯ୍ୟାନ୍ବୟନ ଯୋଜନା ଆବଶ୍ୟକ ବୋଲି ବିଶେଷଜ୍ଞମାନେ କହିଛନ୍ତି।
କୁଷ୍ଠ ରୋଗ କାର୍ଯ୍ୟକ୍ରମରେ କାର୍ଯ୍ୟ କରିଥିବା ବିଜୟ କୁମାର ସ୍ବାଇଁ କହିଛନ୍ତି, ସଚେତନତାର ଅଭାବ ଓ ଭେଦଭାବ ଓଡ଼ିଶାରେ କୁଷ୍ଠ ରୋଗକୁ ବଢ଼ାଇଛି। ଏହି ରୋଗର ଚିହ୍ନଟ ଓ ଚିକିତ୍ସା ବଡ଼ ଚ୍ୟାଲେଞ୍ଜ ପାଲଟିଥିବାବେଳେ କୋଭିଡ୍-୧୯ ମହାମାରୀ ପରିସ୍ଥିତିକୁ ଆହୁରି ଖରାପ କରି ଦେଇଥିଲା। କୁଷ୍ଠ ରୋଗ ଠିକ୍ ସମୟରେ ଚିହ୍ନଟ ହେଲେ ଅଧିକାଂଶ ମାମଲା ୬ରୁ ୧୨ ମାସ ମଧ୍ୟରେ ଆରୋଗ୍ୟ ହୋଇପାରିବ। ତେବେ ଏ କ୍ଷେତ୍ରରେ ସ୍ବେଚ୍ଛାକୃତ ରିପୋର୍ଟ କରିବା ଗୁରୁତ୍ୱପୂର୍ଣ୍ଣ। ଏଥିଲାଗି ଏହି ରୋଗ ସହିତ ଜଡ଼ିତ ଅନ୍ଧବିଶ୍ୱାସ ଓ ଭେଦଭାବର ମୁକାବିଲା କରିବା ଏବଂ ସଂକ୍ରମିତ ଲୋକଙ୍କୁ ଚିକିତ୍ସା ନିମନ୍ତେ ଆଗକୁ ଆସିବାକୁ ଉତ୍ସାହିତ କରିବା ପାଇଁ ଏକ ଦୃଢ଼ ସଚେତନତା ଅଭିଯାନ ହେବା ଆବଶ୍ୟକ ବୋଲି ସେ କହିଛନ୍ତି।
କୁଷ୍ଠ ରୋଗର ମୁକାବିଲା ପାଇଁ ରାଜ୍ୟ ସରକାର ଅନେକ ପଦକ୍ଷେପ ନେଇଛନ୍ତି। ପ୍ରତି ବ୍ଲକସ୍ତରରେ ଜଣେ ପ୍ରଶିକ୍ଷିତ କର୍ମଚାରୀଙ୍କୁ ନିଯୁକ୍ତି ଦିଆଯାଇଛି। ସେମାନେ କୁଷ୍ଠ ରୋଗ ସମ୍ବନ୍ଧୀୟ କାର୍ଯ୍ୟରେ ସ୍ବାସ୍ଥ୍ୟ କର୍ମୀଙ୍କୁ ସହାୟତା କରୁଛନ୍ତି। ଏତଦ୍ ବ୍ୟତୀତ କୁଷ୍ଠ ରୋଗର ଅସ୍ତ୍ରୋପଚାର ଓ ଚିକିତ୍ସା ପାଇଁ ଜିଲା ସରକାରୀ ଚିକିତ୍ସାଳୟରେ ଆବଶ୍ୟକ ବ୍ୟବସ୍ଥା ରହିଛି।
