ବାଲି,୧୭।୧୧(ପି.ଟି.): ଇଣ୍ଡୋନେସିଆର ବାଲିଠାରେ ଜି୨୦ ବୈଠକ ବୁଧବାର ଶେଷ ହୋଇଛି। ଏହି ଅବସରରେ ଜି୨୦ ବାଲି ଘୋଷଣାନାମାରେ ରୁଷିଆ-ୟୁକ୍ରେନ୍ ଯୁଦ୍ଧକୁ ନେଇ ସଦସ୍ୟ ରାଷ୍ଟ୍ରଗୁଡ଼ିକ ମଧ୍ୟରେ ମତପାର୍ଥକ୍ୟ ଥିବା ସ୍ବୀକାର କରାଯାଇଛି। ତେବେ ଯୁଦ୍ଧବେଳେ ବନ୍ଦୀ ଥିବା ସାଧାରଣ ନାଗରିକମାନଙ୍କୁ ସୁରକ୍ଷା ସମେତ ଅନ୍ତର୍ଜାତୀୟ ଆଇନକୁ ମାନିବା ଲାଗି ଘୋଷଣାନାମାରେ ଗୁରୁତ୍ୱ ଦିଆଯାଇଛି। ଆଣିବକ ଅସ୍ତ୍ର ବ୍ୟବହାର କିମ୍ବା ଏଭଳି ଧମକକୁ ସମସ୍ତ ସଦସ୍ୟ ବିରୋଧ କରୁଥିବା ସ୍ପଷ୍ଟ କରିଦେଇଛନ୍ତି। ଶାନ୍ତିପୂର୍ଣ୍ଣ ଉପାୟରେ ଯୁଦ୍ଧର ଅବସାନ ଲାଗି ସେମାନେ ଆହ୍ବାନ ଦେଇଛନ୍ତି। ତେବେ ଜି୨୦ ବାଲି ନେତୃବୃନ୍ଦଙ୍କ ଘୋଷଣାନାମା ଡ୍ରାଫ୍ଟିଂ ବେଳେ ବିବାଦୀୟ ବିତର୍କ ହୋଇଥିଲା ବୋଲି ଇଣ୍ଡୋନେସିଆ ରାଷ୍ଟ୍ରପତି ଖବରଦାତା ସମ୍ମିଳନୀରେ ସ୍ବୀକାର କରିଛନ୍ତି।
ଆଜିର ଯୁଗ ଆଦୌ ଯୁଦ୍ଧର ଯୁଗ ନୁହେଁ ବୋଲି ଘୋଷଣାନାମାରେ କୁହାଯାଇଛି। ଗତ ସେପ୍ଟେମ୍ବରରେ ସାଂଘାଇ ସହଯୋଗ ସଂଗଠନ (ଏସ୍ସିଓ) ବୈଠକ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନଙ୍କୁ ଯାହା କହିଥିଲେ, ତାହା ଜି୨୦ରେ ପ୍ରତିଫଳିତ ହୋଇଛି। ମୋଦିଙ୍କ ନେତୃତ୍ୱରେ ଭାରତୀୟ ପ୍ରତିନିଧି ଦଳ ସହମତି ଆଣିବା ଦିଗରେ ପ୍ରମୁଖ ଭୂମିକା ନିଭାଇଥିଲେ ବୋଲି ବହିର୍ବ୍ୟାପାର ସଚିବ ବିନୟ କ୍ୱାଟ୍ରା କହିଛନ୍ତି।
ଜାତିସଂଘ ସୁରକ୍ଷା ପରିଷଦରେ ଜାତୀୟ ସ୍ଥିତି ଉପରେ ସଦସ୍ୟ ରାଷ୍ଟ୍ରଗୁଡ଼ିକ ଯାହା କହିଥିଲେ ଜି୨୦ରେ ତାହା ଦୋହରାଇଥିବା ଘୋଷଣାନାମାରୁ ସ୍ପଷ୍ଟ ହୋଇଛି। ଅଧିକାଂଶ ସଦସ୍ୟ ରାଷ୍ଟ୍ର ୟୁକ୍ରେନ୍ ଯୁଦ୍ଧକୁ ଦୃଢ଼ ନିନ୍ଦା କରିଥିଲେ। ତେବେ କେତେକେ ଏହା ଉପରେ ଭିନ୍ନ ମତ ରଖିଥିଲେ। ଦସ୍ତାବିଜ୍ରେ ଯୁଦ୍ଧକୁ ନେଇ ଖୁବ୍ କମ୍ ଲେଖା ହୋଇଥିବାବେଳେ ଏହା ସମିଟ୍ର ମୁଖ୍ୟ ବିଷୟବସ୍ତୁ ଥିଲା ବୋଲି ଓ୍ବିଡୋଡୋ କହିଛନ୍ତି। କୋଭିଡ୍ ମହାମାରୀ ପରେ ଅର୍ଥନୀତି ଉପରେ ଏହା ବିଶ୍ୱର ଯୁଦ୍ଧ ଭଳି ମନେ ହେଉଥିବା ସେ କହିଛନ୍ତି। ଜି୨୦ ସମିଟ୍ରେ ରୁଷିଆ ରାଷ୍ଟ୍ରପତି ପୁଟିନ ଯୋଗ ଦେଇ ନ ଥିବାବେଳେ ତାଙ୍କ ତରଫରୁ ଉପସ୍ଥିତ ଥିବା ବହିର୍ବ୍ୟାପାର ମନ୍ତ୍ରୀ ସର୍ଗେଇ ଲାଭରୋଭ୍ ଘୋଷଣାନାମାର ଦିନକ ପୂର୍ବରୁ ସମିଟ୍ ଛାଡ଼ି ଚାଲିଯାଇଥିଲେ। ଗତ ଫେବୃୟାରୀ ୨୪ରୁ ୟୁକ୍ରେନ୍ ଉପରେ ରୁଷିଆ ଚଳାଇଥିବା ସାମରିକ କାର୍ଯ୍ୟାନୁଷ୍ଠାନକୁ ଆମେରିକା ନେତୃତ୍ୱରେ ପାଶ୍ଚାତ୍ୟ ରାଷ୍ଟ୍ରଗୁଡ଼ିକ ନିନ୍ଦା କରିଥିଲେ। ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି ଭର୍ଚୁଆଲି ଜି୨୦ ନେତାମାନଙ୍କୁ ଉଦ୍ବୋଧନ ଦେଇ ଧ୍ୱଂସାତ୍ମକ ଯୁଦ୍ଧର ଅନ୍ତ ଚାହିଁଥିଲେ।
ଜି୨୦ ଅଧ୍ୟକ୍ଷତା ଗ୍ରହଣ କଲା ଭାରତ
ଆସନ୍ତା ବର୍ଷ ଲାଗି ଜି୨୦ର ଅଧ୍ୟକ୍ଷତା କରିବ ଭାରତ। ବୁଧବାର ଇଣ୍ଡୋନେସିଆ ଭାରତକୁ ଜି୨୦ ଅଧ୍ୟକ୍ଷତା ହସ୍ତାନ୍ତର କରିଛି। ଏହା ପ୍ରତ୍ୟେକ ଭାରତୀୟଙ୍କ ପାଇଁ ଗର୍ବର ବିଷୟ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି।
ବାଲିରେ ଦୁଇଦିନିଆ ଜି୨୦ ସମିଟ୍ ଶେଷରେ ଏକ ସଂକ୍ଷିପ୍ତ ଉତ୍ସବରେ ଇଣ୍ଡୋନେସିଆ ରାଷ୍ଟ୍ରପତି ଜୋକୋ ଓ୍ବିଡୋଡୋ ପ୍ରଧାନମନ୍ତ୍ରୀ ମୋଦିଙ୍କୁ ଜି୨୦ ଅଧ୍ୟକ୍ଷତା ପ୍ରଦାନ କରିଛନ୍ତି। ପ୍ରତ୍ୟେକ ଦେଶର ମିଳିତ ଉଦ୍ୟମକ୍ରମେ ଜି୨୦ ସମିଟ୍କୁ ବିଶ୍ୱ କଲ୍ୟାଣ ଲାଗି ଏକ ଉତ୍ପ୍ରେରକରେ ପରିଣତ କରିପାରିବା ବୋଲି ମୋଦି ଏହି ଅବସରରେ କହିଛନ୍ତି। ଅଧ୍ୟକ୍ଷତା କାଳରେ ଭାରତ ଦେଶର ବିଭିନ୍ନ ରାଜ୍ୟ ଓ ସହରରେ ବୈଠକ ଆୟୋଜନ କରିବ। ପୂର୍ବରୁ ଭାରତର ବହିର୍ବ୍ୟାପାର ସଚିବ ବିନୟ କ୍ୱାତ୍ରା କହିଥିଲେ, ଜି୨୦ ଫଳାଫଳ ଦସ୍ତାବିଜ୍ ଡ୍ରାଫ୍ଟିଂରେ ଭାରତର ଗଠନମୂଳକ ଅବଦାନ ରହିଛି।
