ଭୁବନେଶ୍ୱର, ୨୭।୧୨(ବ୍ୟୁରୋ):ଘରୋଇ ଓଲା, ଉବର, ରାପିଡ଼ୋ ବାଇକ୍ ବିନା କମର୍ସିଆଲ ନମ୍ବର ପ୍ଲେଟ୍ରେ ଲୋକଙ୍କୁ ପରିବହନ କରୁଛି। ଅଧିକାଂଶ ବାଇକ୍ର ପରମିଟ୍, ଫିଟନେସ୍, ଇନ୍ସୁରାନ୍ସ, ଲାଇସେନ୍ସ ନାହିଁ। ଲୋକଙ୍କ ଜୀବନ ସହ ଖେଳଖେଳାଯାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆଯାଉ ନାହିଁ। ଏହାର ପ୍ରତିବାଦ ସହ କାର୍ଯ୍ୟାନୁଷ୍ଠାନ ଦାବିରେ ସ୍ମାର୍ଟସିଟି ଅନ୍ଲାଇନ୍ ଅଟୋ ସଂଘ ପକ୍ଷରୁ ଅଟୋ ଚାଳକମାନେ ରାସ୍ତାକୁ ଓହ୍ଲାଇଥିଲେ। ହଜାର ହଜାର ଅଟୋ ସହ ଚାଳକମାନେ ଲୋୟର ପିଏମ୍ଜିରୁ ଶୋଭାଯାତ୍ରାରେ ବାହାରି ଆଚାର୍ଯ୍ୟ ବିହାରସ୍ଥିତ ଆର୍ଟିଓ ଘେରାଉ କରିଥିଲେ। ଏଥିସହ ଆର୍ଟିଓ ସମ୍ମୁଖ ଜାତୀୟ ରାଜପଥରେ ଶୋଇ ଅଭିନବ ପ୍ରତିବାଦ କରିଥିଲେ। ଫଳରେ ଅଧା ସହର ୨ ଘଣ୍ଟା ଧରି ଅଚଳ ହୋଇଯାଇଥିବାବେଳେ ପୋଲିସକୁ ନାକେଦମ୍ ହେବାକୁ ପଡିଥିଲା।
ସହର ବେଶ୍ ସ୍ବାଭାବିକ ଥିଲା। ହେଲେ ଦିନ ୧୨ଟାରୁ ଚିତ୍ର ପୂରା ବଦଳିଗଲା। ହଠାତ ସହରର ଚାରି ପଟୁ ହଜାର ହଜାର ଅଟୋ ରାସ୍ତା ଉପରକୁ ମାଡି ଆସିଥିଲା। ଲୋୟର ପିଏମ୍ଜି, ଆଇଜି ପାର୍କ ପଛପାର୍ଶ୍ୱ ରାସ୍ତାରେ ଏକାଠି ହେବା ପରେ ଗର୍ଜନ କରି ଶୋଭାଯାତ୍ରାରେ ବାହାରିଥିଲେ। ଏଜି ଛକ, ରାଜମହଲ ଛକ, ମାଷ୍ଟରକ୍ୟାଣ୍ଟିନ, ବାଣୀବିହାର ଦେଇ ଆଚାର୍ଯ୍ୟ ବିହାରରେ ପହଞ୍ଚତ୍ଥିଲେ। ଏହାପରେ ରାସ୍ତାରେ ଅଟୋ ଛିଡା କରି ନିଜର ଦାବି ଉପସ୍ଥାପନ ପୂର୍ବକ ଆରଟିଓ-୧ କାର୍ଯ୍ୟାଳୟ ଘେରାଉ କରିଥିଲେ। କିଏ ରାସ୍ତାରେ ଶୋଇଲା ତ ପୁଣି କିଏ ଅଟୋରେ ଚଢି ଅଭିନବ ପ୍ରତିବାଦ କରୁଥିବା ଦେଖିବାକୁ ମିଳିଥିଲା। ଜନପଥ ଓ ରାଜପଥରେ ଗୁରୁତର ଟ୍ରାଫିକ ସମସ୍ୟା ଦେଖାଯାଇଥିଲା। ସ୍ଥିତି ଏପରି ହୋଇଥିଲା ଟ୍ରାଫିକ କର୍ମଚାରୀ ଓ ପୋଲିସ ଅସହାୟ ହୋଇପଡିଥିଲେ। ସାଧାରଣ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ। ଅଟୋ ଚାଳକମାନେ ମୋ ବସ ଓ ଅନ୍ୟ ଯାତ୍ରୀବାହୀ ଗାଡି ନ ଛାଡିବାରୁ ବହୁ ଲୋକ ଗାଡିରୁ ଓହ୍ଲାଇ ଚାଲିଚାଲି ଯାଇଥିଲେ। ଏସିପି ସଞ୍ଜୀବ ଶତପଥୀ ଘଟଣାସ୍ଥଳରେ ପହଞ୍ଚତ୍ ସେମାନଙ୍କୁ ବୁଝାଶୁଝା କରିବା ସହ ପରିବହନ ବିଭାଗର କମିଶନରଙ୍କ ସହ ଆଲୋଚନା କରି ଆବଶ୍ୟକ ପଦକ୍ଷେପ ନେବାକୁ କହିଥିଲେ। ଏହାପରେ ବେଆଇନ ଭାବେ ଯାତ୍ରୀ ପରିବହନ କରୁଥିବା ଉକ୍ତ ଘରୋଇ ଗାଡିଗୁଡ଼ିକ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ପରିବହନ ବିଭାଗ ପକ୍ଷରୁ ପ୍ରତିଶ୍ରୁତି ମିଳିବା ପରେ ଆନ୍ଦୋଳନ ହଟିଥିଲା।
ଅଟୋ ସଂଘ ସଭାପତି ଦୀନବନ୍ଧୁ ନାୟକ କହିଛନ୍ତି, ସହରରେ ବିନା ବାଣିଜ୍ୟକ ନମ୍ବର ପ୍ଲେଟ୍ରେ ଶହ ଗାଡି ଚଳାଉଛନ୍ତି। ଏନେଇ ସଂଘ ପକ୍ଷରୁ ପରିବହନ ବିଭାଗକୁ ଅବଗତ କରାଇବା ସହ ବାରମ୍ବାର ଅଭିଯୋଗ କରିଥିଲୁ। ନଭେମ୍ବର ୯ରେ ଡିସିପି ଓ ପରିବହନ ଅଧିକାରୀଙ୍କୁ ଜଣାଇଥିଲୁ। ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ପ୍ରତିଶ୍ରୁତି ଦେଇଥିଲେ। ହେଲେ ଏଯାବତ କୌଣସି ଆଖି ଦୃଶିଆ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ। ସେମାନଙ୍କ ପାଇଁ ସାଧାରଣ ଲୋକଙ୍କ ଜୀବନ ବାଜିରେ ଲାଗୁଛି। ତେଣୁ ଉକ୍ତ ଗାଡିଗୁଡିକ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ସେ ଦାବି କରିଛନ୍ତି।
ବିଭାଗର ଅଧିକାରୀ ବିକାଶ ଚନ୍ଦ୍ର ଚୌଧୁରୀ କହିଛନ୍ତି, ବେଆଇନ ଭାବେ ଯାତ୍ରୀସେବା ଯୋଗାଉଥିବା ଗାଡି ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହ ୧୪ ଗାଡିଠାରୁ ଜରିମାନା କରାଯାଇଛି। ଏଥର ଗାଡି ଜବତ କରାଯିବ। ଅନ୍ୟପଟେ ଡିସିପି ପ୍ରତୀକ ସିଂ କହିଛନ୍ତି, ଅଟୋ ଚାଳକଙ୍କ ପକ୍ଷରୁ ଶୋଭାଯାତ୍ରା କରିବାର ଖବର ପାଇଥିଲୁ। କିନ୍ତୁ ସେମାନେ କୌଣସି ଅନୁମତି ନେଇ ନ ଥିଲେ। ତେଣୁ ସେମାନଙ୍କ ବିରୋଧରେ ଶହୀଦନଗର ଥାନାରେ ଏକ ମାମଲା (ନଂ.୬୦୯/୨୨) ରୁଜୁ କରାଯାଇଛି।
