ଭୁବନେଶ୍ୱର,୧୫।୧୦ (ବ୍ୟୁରୋ): ବ୍ରହ୍ମପୁର ବଡ଼ବଜାର ଦେଶୀବେହେରା ସାହିର କେ. ଦୀପିକା ଓ କେ. ଦୀନେଶ ବିବାଦ ଜଟିଳ ହେବାରେ ଲାଗିଛି। ଆପୋସ ସମାଧାନ ଲାଗି ଉଭୟଙ୍କୁ ମହିଳା କମିଶନରଙ୍କ ନିକଟରେ ଅକ୍ଟୋବର ୧୪ରେ ହାଜର ହେବାକୁ ନୋଟିସ କରାଯାଇଥିଲା। ତେବେ ଦୀପିକା ଆସିଥିଲା ବେଳେ ଦୀନେଶ ନ ଆସି ତାଙ୍କ ଓକିଲ ରାଜେନ୍ଦ୍ର ପ୍ରତାପଙ୍କୁ ପଠାଇ ପକ୍ଷ ରଖିବାକୁ କହିଥିଲେ। ଦୀନେଶଙ୍କ ଓକିଲ ଓ ସମାଜସେବୀ ପ୍ରମିଳା ତ୍ରିପାଠୀଙ୍କ ସହିତ ଦୀପିକା ମହିଳା କମିଶନରଙ୍କ ନିକଟରେ ହାଜର ହୋଇଥିଲେ। ଉଭୟଙ୍କ ସହିତ ମହିଳା କମିଶନର ୩ ଘଣ୍ଟା ଧରି ଆଲୋଚନା କରିଥିଲେ ମଧ୍ୟ କୌଣସି ନିଷ୍କର୍ଷ ବାହାରି ପାରିନଥିଲା। ଦୀନେଶ ଆସି ନ ଥିବାରୁ ତାଙ୍କ ଓକିଲ ସମୟ ମାଗିଥିଲେ। ପୁଣି ନଭେମ୍ବର ୪ରେ ହାଜର ହୋଇ ନିଜ ମତ ରଖିବାକୁ ଦୀନେଶଙ୍କୁ ନୋଟିସ କରାଯାଇଛି। ଅନ୍ୟପଟେ ଦୀପିକା ହାଇକୋର୍ଟଙ୍କ ଦ୍ୱାରସ୍ଥ ହୋଇଥିବା କହିଛନ୍ତି। ଦୀନେଶ ଜାମିନ ସର୍ତ୍ତ ଖିଲାପ କରିଥିବା ସେ ଅଭିଯୋଗ କରିଛନ୍ତି। ତେଣୁ ତାଙ୍କ ଜାମିନ ଖାରଜ ପାଇଁ ସେ ପ୍ରାର୍ଥନା କରିବା ସହ ମାମଲାର ତ୍ୱରିତ ଶୁଣାଣି କରିବାକୁ ଅନୁରୋଧ କରିଛନ୍ତି। ନ୍ୟାୟ ନ ମିଳିବା ପର୍ଯ୍ୟନ୍ତ ଧାରଣାରେ ବସିବି ବୋଲି ଦୀପିକା କହିଛନ୍ତି।
ସୂଚନାଯୋଗ୍ୟ ଯେ, ବ୍ରହ୍ମପୁର ବଡବଜାର ଦେଶୀ ବେହେରା ସାହିର କେ. ଦୀପିକା ଦୀନେଶଙ୍କ ମଧ୍ୟରେ ପ୍ରଥମେ ପ୍ରେମ ସମ୍ପର୍କ ଆରମ୍ଭ ହୋଇଥିଲା। ମାତ୍ର ତାହା ପରବର୍ତ୍ତୀ ସମୟରେ ଧୋକ୍କାବାଜିରେ ପରିଣତ ହୋଇଥିଲା। ଦୁହିଁଙ୍କ ସମସ୍ୟା ନେଇ ହାଇକୋର୍ଟରେ ମାମଲା ବିଚାରାଧୀନ ଥିବାବେଳେ ଦୀନେଶ ଅନ୍ୟ ଜଣେ ଯୁବତୀଙ୍କୁ ବିବାହ କରୁଥିବା ଦୀପିକା ଖବର ପାଇଥିଲେ। ତେଣୁ ସ୍ତ୍ରୀର ମାନ୍ୟତା ପାଇବା ଓ ନିଜ ୧୯ ମାସର ଛୁଆର ପରିଚୟ ଦାବିରେ ଦୀନେଶଙ୍କ ଘର ଆଗରେ ଧାରଣାରେ ବସି ରହିବା ସହ ନ୍ୟାୟ ପାଇଁ ମହିଳା କମିଶନରଙ୍କ ଦ୍ୱାରସ୍ଥ ହୋଇଥିଲେ। ସେପ୍ଟେମ୍ବର ୧୯ରେ ଦୀପିକା ପରିବାରବର୍ଗ ସହ ମହିଳା କମିଶନରଙ୍କ ପାଖରେ ହାଜର ହୋଇଥିଲେ ମଧ୍ୟ ଦୀନେଶ ଆସିନଥିଲେ। ଏହାପରେ ବ୍ରହ୍ମପୁର ଏସ୍ପିଙ୍କ ଜରିଆରେ ଦୀନେଶଙ୍କୁ ହାଜର ପାଇଁ ନୋଟିସ ଜାରି କରାଯାଇଥିଲା।
