ଦିଗପହଣ୍ଡି, ୨୩।୬(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଅନ୍ତର୍ଗତ ବମୋକେଇ ଗ୍ରାମର ବିଶିଷ୍ଟ ଲୋକନାଟ୍ୟ କଳାକାର ଓ ପ୍ରହଲ୍ଲାଦ ନାଟକର ନୃତ୍ୟଗୁରୁ ସୀମାଞ୍ଚଳ ପାତ୍ରଙ୍କୁ ପଦ୍ମଶ୍ରୀ ସମ୍ମାନ ପ୍ରଦାନ କରାଯାଇଛି। ମଙ୍ଗଳବାର ନୂଆଦିଲ୍ଲୀ ସ୍ଥିତ ରାଷ୍ଟ୍ରପତି ଭବନର ଗଣତନ୍ତ୍ର ମଣ୍ଡପରେ ଆୟୋଜିତ ସ୍ୱତନ୍ତ୍ର ସମାରୋହରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ତାଙ୍କୁ ଏହି ସମ୍ମାନରେ ଭୂଷିତ କରିଛନ୍ତି।
୯୭ ବର୍ଷୀୟ ସୀମାଞ୍ଚଳ ପାତ୍ର ପ୍ରହଲ୍ଲାଦ ନାଟକରେ ହିରଣ୍ୟକଶ୍ୟପ ରାଜା ଭୂମିକାରେ ଉଚ୍ଚକୋଟୀର ଅଭିନୟ ସହ ଦୀର୍ଘ ଦିନ ଧରି ଲୋକନାଟ୍ୟର ପ୍ରଚାର ଓ ପ୍ରସାରରେ ନିଜକୁ ସମର୍ପିତ କରିଆସିଛନ୍ତି। ସମାରୋହରେ ତାଙ୍କ ସାନପୁଅ ସାହେବ ପାତ୍ର, ବିଚିତ୍ର ବର୍ଣ୍ଣାଳୀ ନାଟ୍ୟ ଅନୁଷ୍ଠାନର ସମ୍ପାଦକ ତଥା ନୃତ୍ୟଗୁରୁ ଆଲୋକ ବିଷୋୟୀଙ୍କ ସହ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ଅଶ୍ୱିନୀ ବୈଷ୍ଣବ ପ୍ରମୁଖ ଉପସ୍ଥିତ ଥିଲେ।
ଏହି ଖବର ପ୍ରକାଶ ପାଇବା ପରେ ସମଗ୍ର ଦିଗପହଣ୍ଡି ଅଞ୍ଚଳରେ ଖୁସିର ଲହରୀ ଖେଳିଯାଇଛି। ବମୋକେଇ ଗ୍ରାମର ସୁର ପାତ୍ର ଓ ବାଙ୍ଗାରି ଦେବୀଙ୍କ ପୁଅ ସୀମାଞ୍ଚଳ ମାତ୍ର ଛଅ ବର୍ଷ ବୟସରୁ ପାଲୁରଗଡ଼ର ନୃତ୍ୟଗୁରୁ ନରସିଂହ ପ୍ରଧାନଙ୍କ ନିକଟରୁ ସଖୀନାଚ ଓ ଓଡ଼ିଶୀ ନୃତ୍ୟର ପ୍ରାରମ୍ଭିକ ଶିକ୍ଷା ଗ୍ରହଣ କରିଥିଲେ। ପିତା ସୁର ପାତ୍ରଙ୍କ ପ୍ରେରଣାରେ ସେ ପିଲାଦିନରୁ ପ୍ରହଲ୍ଲାଦ ନାଟକ ପ୍ରତି ଆକୃଷ୍ଟ ହୋଇଥିଲେ।
ପରବର୍ତ୍ତୀ ସମୟରେ ଗୁରୁ ତ୍ରିନାଥ ପ୍ରଧାନ ଓ ଲକ୍ଷ୍ମଣ ଶତପଥୀଙ୍କ ନିକଟରେ ପ୍ରାୟ ୨୦ ବର୍ଷ ଧରି ନୃତ୍ୟାଭିନୟ, ରାଗ, ରସ, ଲୟ ଓ ସଂଳାପ ଆଦିର ଶିକ୍ଷା ଗ୍ରହଣ କରି ସେ ପ୍ରହଲ୍ଲାଦ ନାଟକର ହିରଣ୍ୟକଶ୍ୟପ ରାଜା ଭୂମିକାରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ। ଅଞ୍ଚଳବାସୀ ତାଙ୍କୁ ସ୍ନେହରେ ‘ରଜା ସୀମାଞ୍ଚଳ’ ବୋଲି ଡାକନ୍ତି।
ଲୋକନାଟ୍ୟ କ୍ଷେତ୍ରରେ ତାଙ୍କର ଅବଦାନ ପାଇଁ ୧୯୯୦ ମସିହାରେ କେନ୍ଦ୍ର ସଙ୍ଗୀତ ନାଟକ ଏକାଡେମୀ ପକ୍ଷରୁ ତାଙ୍କୁ ରାଷ୍ଟ୍ରପତି ପୁରସ୍କାର ପ୍ରଦାନ କରାଯାଇଥିଲା। ୧୯୯୭ ମସିହାରେ ଓଡ଼ିଶା ସଙ୍ଗୀତ ନାଟକ ଏକାଡେମୀ ପକ୍ଷରୁ ଲୋକନାଟ୍ୟ ସମ୍ମାନରେ ମଧ୍ୟ ସମ୍ମାନିତ କରାଯାଇଥିଲା।
ପ୍ରହଲ୍ଲାଦ ନାଟକ ଏବଂ ଲୋକକଳାର ପ୍ରଚାର ଓ ପ୍ରସାର କ୍ଷେତ୍ରରେ ତାଙ୍କର ଆଜୀବନ ଅବଦାନକୁ ସ୍ୱୀକୃତି ଦେଇ କେନ୍ଦ୍ର ସରକାର ପଦ୍ମଶ୍ରୀ ସମ୍ମାନ ପ୍ରଦାନ କରିଥିବାରୁ ସମଗ୍ର ଗଞ୍ଜାମ ଜିଲା ସହ ଓଡ଼ିଶାବାସୀ ଗର୍ବ ଅନୁଭବ କରୁଛନ୍ତି।
