ଦିଗପହଣ୍ଡି, ୨୪।୧୦ (ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ସ୍ଥିତ ଖେମୁଣ୍ଡି କଲେଜ ଛାତ୍ର ନିର୍ବାଚନ ପରବର୍ତ୍ତୀ ହିଂସାକାଣ୍ଡ ଓ ହତ୍ୟା ଉଦ୍ୟମ ଘଟଣାରେ ପୋଲିସକୁ ବଡ଼ ସଫଳତା ମିଳିଛି। ଏହି ଘଟଣାରେ ସମ୍ପୃକ୍ତ ଅନ୍ୟ ୨ ଜଣ ଅଣଛାତ୍ରଙ୍କୁ ଦିଗପହଣ୍ଡି ପୋଲିସ ଶନିବାର ଗିରଫ କରି କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତ ଦ୍ୱୟ ହେଲେ ଦିଗପହଣ୍ଡି ପିଏଚ୍ଡି ରୋଡ୍ ସାହିର ବି. ତାରେଣୀ ପାତ୍ର ଓରଫ ରାଜୁ (୨୮) ଏବଂ ରାମଚନ୍ଦ୍ରପୁର ଗ୍ରାମର ଅରୁଣ ସେଠୀ (୨୩)।
ତଦନ୍ତକାରୀ ଅଧିକାରୀ ଅତିରିକ୍ତ ଆଇଆଇସି କୃଷ୍ଣମୟୀ ବରାଳ ଶନିବାର ପୂର୍ବାହ୍ନ ପ୍ରାୟ ସାଢ଼େ ୧୦ଟାରେ ସଦଳବଳେ ଚଢ଼ାଉ କରି ଅଭିଯୁକ୍ତ ରାଜୁଙ୍କ ଘରୁ ଦୁହିଁଙ୍କୁ ଗିରଫ କରିଥିଲେ। ଦିଗପହଣ୍ଡି ଥାନା ମାମଲା ନଂ. ୪୩୯/୨୬ (BNS) ଅନୁଯାୟୀ କୋର୍ଟରେ ଜାମିନ ଆବେଦନ ଖାରଜ ହେବାରୁ ଦୁହିଁଙ୍କୁ ଦିଗପହଣ୍ଡି ସବ୍-ଜେଲ୍ ହାଜତକୁ ପଠାଇ ଦିଆଯାଇଛି।
ଗତ ୧୫ ତାରିଖରେ ଖେମୁଣ୍ଡି କଲେଜ ଛାତ୍ର ସଂସଦ ନିର୍ବାଚନରେ ଛାତ୍ର କଂଗ୍ରେସର ପୂର୍ବତନ ଜିଲ୍ଲା ସଭାପତି ବିକାଶ ପଶୁପାଳକଙ୍କ ସମର୍ଥିତ ସଭାପତି ପ୍ରାର୍ଥୀ ଡି. ସଞ୍ଜୀବ କୁମାର ଦୋରା, ପ୍ରତିପକ୍ଷ ତାରେଣୀ ପାତ୍ର (ରାଜୁ)ଙ୍କ ସ୍ୱାଧୀନ ପ୍ରାର୍ଥୀ ରାଜେନ୍ଦ୍ର ସେଠୀଙ୍କୁ ୩ଟି ଭୋଟରେ ପରାଜିତ କରି ବିଜୟୀ ହୋଇଥିଲେ। ଏଥିରେ ଉତ୍ତେଜିତ ହୋଇ ରାଜୁ ନିଜ ଗୋଷ୍ଠୀର ଯୁବକମାନଙ୍କୁ ନେଇ ବିକାଶଙ୍କୁ ଆକ୍ରମଣ କରିବା ପାଇଁ ଶୁଣ୍ଡିପଲ୍ଲୀ ଗାଁ ଛକରେ ଖୋଜାଖୋଜି କରିଥିଲେ।
ବିକାଶଙ୍କୁ ନପାଇ ନିର୍ବାଚନ ପ୍ରଚାରରେ ବ୍ୟବହୃତ ହୋଇଥିବା ତାଙ୍କ ଭାଇ ରାକେଶ ପଶୁପାଳକଙ୍କ କାର୍ (OD-02-BU-6543)କୁ ଦେଖି ରାତି ପ୍ରାୟ ୧ଟାରେ ରାଜୁଙ୍କ ନିର୍ଦ୍ଦେଶରେ ଅଣଛାତ୍ରମାନେ ବ୍ୟାପକ ଭଙ୍ଗାରୁଜା କରିଥିଲେ। ଏହାକୁ ପ୍ରତିବାଦ କରିବାରୁ କାର୍ ଚାଳକ ଶିବଶଙ୍କର ନାହାକ ଓ ତାଙ୍କ ସାଙ୍ଗ ମେସିନ୍ ଅପରେଟର ଦୀପକ ସେଠୀଙ୍କୁ ସଂଘବଦ୍ଧ ଭାବେ ଲାଠିରେ ମାଡ଼ ମାରି ହତ୍ୟା ଉଦ୍ୟମ କରିଥିଲେ। ଗ୍ରାମବାସୀ ଚିତ୍କାର ଶୁଣି ଦୌଡ଼ି ଆସିବାରୁ ଅଭିଯୁକ୍ତମାନେ ୪ଟି ବାଇକ୍ ଯୋଗେ ଫେରାର ହୋଇଯାଇଥିଲେ।
ପରେ କାର୍ ମାଲିକ ରାକେଶ ଘଟଣାସ୍ଥଳରେ ପହଞ୍ଚି ଉଭୟ ଆହତଙ୍କୁ ଉଦ୍ଧାର କରି ଚିକିତ୍ସା ପାଇଁ ମେଡିକାଲରେ ଭର୍ତ୍ତି କରିବା ସହ ଥାନାରେ ଏତଲା ଦେଇଥିଲେ। ଏତଲା ଆଧାରରେ ଆଇଆଇସି କିଶୋର କୁମାର ସାମଲ ମାମଲା ରୁଜୁ କରି ତଦନ୍ତ ନିର୍ଦ୍ଦେଶ ଦେଇଥିଲେ। ଗିରଫ ରାଜୁଙ୍କ ନାଁରେ ପୂର୍ବରୁ ଦିଗପହଣ୍ଡି ଥାନାରେ ୨ଟି ସଙ୍ଗୀନ ଅପରାଧିକ ମାମଲା ରହିଥିବା ଆଇଆଇସି ସୂଚନା ଦେଇଛନ୍ତି। ପ୍ରକାଶଥାଉ କି, ଏହି ଘଟଣାରେ ପୂର୍ବରୁ ସାହାଣୀ ସାହିର ରକି ଦାସ ଓ ହିମାଂଶୁ ଦାସଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇସାରିଛି।
