ମୁମ୍ବାଇ: ବଲିଉଡ୍ ଅଭିନେତ୍ରୀ ଦିୟା ମିର୍ଜାଙ୍କ କଥା ବର୍ତ୍ତମାନ ଚର୍ଚ୍ଚା ହେଉଛି। ସେ ଆସନ୍ତାକାଲି ଅର୍ଥାତ୍ ସୋମବାର ବିବାହ ବନ୍ଧନରେ ବାନ୍ଧି ହେବେ। ଏହାକୁ ନେଇ ପ୍ରଶଂସକମାନେ ବେଶ୍ ଉତ୍ସୁକ ଅଛନ୍ତି। ବିବାହକୁ ନେଇ ଯେତିକି ଚର୍ଚ୍ଚା ହେଉନି ବର୍ତ୍ତମାନ ଅଧିକ ଚର୍ଚ୍ଚା ହେଉଛି ତାଙ୍କ ପୁରୁଣା ପ୍ରେମକୁ ନେଇ। ଦିୟାଙ୍କ ଜୀବନରେ ସାହିଲ ସାଙ୍ଗା ଆସିଥିଲେ। ଦିୟା ତାଙ୍କ ସହିତ ୧୧ ବର୍ଷ କାଟିଛନ୍ତି। ୨୦୦୯ରେ ଦିୟା-ସାହିଲଙ୍କ ମଧ୍ୟରେ ସାକ୍ଷାତ ହୋଇଥିଲା। ଏହା ଏକ ଫିଲ୍ମ ଶୁଟିଂ ସମୟରେ ହିଁ ହୋଇଥିଲା। ଦିୟାଙ୍କୁ ଫିଲ୍ମର ସ୍କ୍ରିପ୍ଟ ଶୁଣାଉଥିଲେ ସାହିଲ। ପରେ ଦୁହିଁଙ୍କ ମଧ୍ୟରେ ସମ୍ପର୍କ ଆଗକୁ ବଢ଼ିଥିଲା।
୨୦୧୪ ଅକ୍ଟୋବର ୧୮ରେ ଦୁଇଜଣ ବିବାହ ବନ୍ଧନରେ ବାନ୍ଧି ହୋଇଥିଲେ। ସାହିଲ ଶିଖ୍ ଥିବା ବେଳେ ଦିୟା ହାଇଦ୍ରାବାଦୀ। ବିବାହର କିଛିବର୍ଷ ପରେ ଦୁହିଁଙ୍କ ମଧ୍ୟରେ ଆଉ ପଡ଼ି ନ ଥିଲା। ୨୦୧୯ରେ ଦିୟା ସୋସିଆଲ ମିଡିଆରେ ୧୧ ବର୍ଷର ସମ୍ପର୍କ ତୁଟିଗଲା ବୋଲି ପ୍ରଶଂସକମାନଙ୍କୁ ଜଣାଇଥିଲେ।
ସେ ଲେଖିଥିଲେ, ୧୧ ବର୍ଷ ଏକାଠି ରହିବା ପରେ ଆମେ ଦୁଇଜଣ ଆପୋସ ବୁଝାମଣାରେ ଅଲଗା ହେବାକୁ ନିଷ୍ପତ୍ତି ନେଇଛୁ। ଏକଥା ବି ଲେଖିଥିଲେ ଯେ, ସାହିଲ ସବୁଦିନ ପାଇଁ ମୋ’ ବନ୍ଧୁ ହୋଇ ରହିବେ। ଦୁହେଁ ଦୁହିଁଙ୍କୁ ସମ୍ମାନ ଦେବୁ। ସେତେବେଳେ ଶୁଣିବାକୁ ମିଳିଥିଲା କନିକା ଢିଲନଙ୍କ ସହ ସାହିଲଙ୍କ ସମ୍ପର୍କ ଥିବାରୁ ଦୀୟାଙ୍କ ସହ ସମ୍ପର୍କ ତୁଟିଗଲା। ମାତ୍ର ଦିୟା ଏସବୁ ଖବରକୁ ମିଛ ବୋଲି କହି କନିକାଙ୍କୁ ସମର୍ଥନ କରିଥିଲେ।
