ନୂଆଦିଲ୍ଲୀ, ୨୦।୭: ଭାରତୀୟ କ୍ରିକେଟ୍ର ସବୁଠାରୁ ସଫଳ ଅଧିନାୟକ ବିବେଚିତ ହୋଇଥିବା ମହେନ୍ଦ୍ର ସିଂ ଧୋନୀ ଗତ ଏକବର୍ଷ ଧରି କ୍ରିକେଟ୍ରୁ ଦୂରେଇ ରହିଛନ୍ତି। ଶେଷଥର ପାଇଁ ଗତ ବର୍ଷ ଇଂଲଣ୍ଡରେ ଅନୁଷ୍ଠିତ ଆଇସିସି ଏକଦିବସୀୟ ବିଶ୍ୱକପ୍ରେ ଧୋନୀ ଖେଳୁଥିବାର ନଜର ଆସିଥିଲେ। ଏହି ବର୍ଷକ ମଧ୍ୟରେ ଧୋନୀ ବିଭିନ୍ନ କାର୍ଯ୍ୟକ୍ରମରେ ନିଜକୁ ଜଡ଼ିତ ରଖିଥିଲେ, ଯାହାର ଫଟୋ ଓ ଭିଡିଓ ସବୁ ସୋସିଆଲ ମିଡିଆରେ ଭାଇରାଲ ହୋଇଥିଲା। ନିକଟରେ ଧୋନୀଙ୍କ ଆଉ ଏକ ଫଟୋ ସୋସିଆଲ ବେଶ୍ ଭାଇରାଲ ହୋଇଛି।
ଯେଉଁଥିରେ ଏହି ଝାଡ଼ଖଣ୍ଡ କ୍ରିକେଟର୍ ନୂଆ ଲୁକ୍ରେ ନଜରକୁ ଆସିଛନ୍ତି। ଏହି ଫଟୋରେ ଧୋନୀ ନିଶ ରଖିଥିବା ଦେଖିବାକୁ ମିଳିଛି। ଧୋନୀଙ୍କ ଏହି ଫଟୋ ଏବେ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି। କୁହାଯାଉଛି ଏହି ଲୁକ୍ ଧୋନୀ ଏକ ବିଜ୍ଞାପନ ପାଇଁ କରିଛନ୍ତି। ଏହାରି ମଧ୍ୟରେ ମୋଟର ସାଇକେଲ କମ୍ପାନୀ ଟିଭିଏସ୍ ପକ୍ଷରୁ ଏକ ଟିଜର ଭିଡିଓ ଜାରି କରାଯାଇଛି। ଯେଉଁଥିରେ ବଲିଉଡ୍ର ସୁପର୍ ଷ୍ଟାର୍ ଅମିତାଭ ବଚ୍ଚନଙ୍କ ସହ ଧୋନୀ ଏକାଠି ନଜରକୁ ଆସିଛନ୍ତି। କିନ୍ତୁ ଏହି ଭିଡିଓଟି ବହୁ ପୂର୍ବରୁ ଶୁଟିଂ ହୋଇଥିବା ଜଣାପଡ଼ିଛି। କାରଣ କିଛିଦିନ ତଳେ ଅମିତାଭ କରୋନା ଆକ୍ରାନ୍ତ ହୋଇ ମୁମ୍ବାଇର ନାନାବତୀ ହସ୍ପିଟାଲରେ ଚିକିତ୍ସିତ ହେଉଛନ୍ତି। ତେବେ ନିଶ ଥିବା ଧୋନୀଙ୍କ ଭାଇରାଲ ଫଟୋ ଏହି ଭିଡିଓରେ ନାହିଁ। ତେଣୁ ଏହି ଫଟୋ ଉକ୍ତ ଭିଡିଓର କି ନାହିଁ ତାହା ସ୍ପଷ୍ଟ ହୋଇପାରିନାହିଁ। କାରଣ ଉଭୟ ଫଟୋ ଓ ଭିଡିଓରେ ଧୋନୀଙ୍କ ଲୁକ୍ ଭିନ୍ନ ଭିନ୍ନ ରହିଛି।
