ନୂଆଦିଲ୍ଲୀ, ୧୫।୯: ଆଇପିଏଲ୍ର ୧୩ତମ ସଂସ୍କରଣ ସେପ୍ଟେମ୍ବର ୧୯ରୁ ନଭେମ୍ବର ୧୦ ପର୍ଯ୍ୟନ୍ତ ୟୁଏଇରେ ଖେଳାଯିବ। ଡିଫେଣ୍ଡିଂ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ ଓ ଚେନ୍ନାଇ ସୁପର୍କିଙ୍ଗ୍ସ ମଧ୍ୟରେ ଉଦ୍ଘାଟନୀ ମ୍ୟାଚ୍ ଖେଳାଯିବ। ଆଇପିଏଲ୍ରେ ବର୍ତ୍ତମାନ ସୁଦ୍ଧା ଅନେକ ଅଧିନାୟକ ବିଭିନ୍ନ ଦଳର ନେତୃତ୍ୱ ନେଇସାରିଛନ୍ତି। ସେମାନଙ୍କ ମଧ୍ୟରୁ କିଛି ସଫଳ ହୋଇଥିବାବେଳେ କିଛି ଅଧିନାୟକଙ୍କୁ ନିରାଶ ହେବାକୁ ପଡ଼ିଛି। ଆଇପିଏଲ୍ ଇତିହାସରେ ଅଧିନାୟକ ଭାବେ ସର୍ବାଧିକ ମ୍ୟାଚ୍ ଜିତିବାର କୀର୍ତ୍ତିମାନ ଚେନ୍ନାଇ ସୁପର କିଙ୍ଗ୍ସ ମହେନ୍ଦ୍ର ସିଂ ଧୋନୀଙ୍କ ନାମରେ ରହିଛି। ଧୋନୀ ଅଧିନାୟକ ଭାବେ ୧୭୪ ମ୍ୟାଚ୍ ଖେଳିଥିବାବେଳେ ସେଥିମଧ୍ୟରୁ ୧୦୪ଟି ବିଜୟ ଲାଭ କରିଛନ୍ତି। ୬୯ ମ୍ୟାଚ୍ରେ ତାଙ୍କୁ ପରାଜୟର ସାମ୍ନା କରିବାକୁ ପଡ଼ିଛି। ଅଧିନାୟକ ଭାବେ ଧୋନୀଙ୍କ ବିଜୟ ପ୍ରତିଶତ ୬୦.୧୧ ରହିଛି।
ଚ୍ୟାଲେଞ୍ଜର୍ସ ବାଙ୍ଗାଲୋରର ଅଧିନାୟକ ବିରାଟ କୋହଲି ୧୧୦ ମ୍ୟାଚ୍ରେ ନେତୃତ୍ୱ ନେଇଥିବାବେଳେ ଯଥାକ୍ରମେ ୪୯ ଓ ୫୫ ମ୍ୟାଚ୍ ବିଜୟ ଓ ପରାଜୟବରଣ କରିଛନ୍ତି। ତାଙ୍କର ବିଜୟ ପ୍ରତିଶତ ୪୭.୧୬ ରହିଛି। ମୁମ୍ବାଇ ଇଣ୍ଡିଆନ୍ସର ରୋହିତ୍ ଶର୍ମାଙ୍କ ନାମରେ ୬୦ ବିଜୟ ରହିଛି। ସେ ୧୦୪ ମ୍ୟାଚ୍ରେ ନେତୃତ୍ୱ ନେଇଥିବାବେଳେ ସେଥିମଧ୍ୟରୁ ୪୨ ମ୍ୟାଚ୍ ହାରିଛନ୍ତି। କୋଲକାତା ନାଇଟ୍ ରାଇଡର୍ସର ଦୀନେଶ କାର୍ତ୍ତିକ ଅଧିନାୟକ ଭାବେ ୩୬ ମ୍ୟାଚ୍ ଖେଳି ୧୭ ବିଜୟ ଓ ୧୮ ମ୍ୟାଚ୍ରେ ପରାଜିତ ହୋଇଛନ୍ତି। ସନ୍ରାଇଜର୍ସ ହାଇଦ୍ରାବାଦର ଡେଭିଡ୍ ଓ୍ବାର୍ନର (୪୭ ମ୍ୟାଚ୍, ୨୬ ବିଜୟ), ରାଜସ୍ଥାନ ରୟାଲ୍ସର ଷ୍ଟିଭ ସ୍ମିଥ୍ (୨୯ ମ୍ୟାଚ୍, ୧୯ ବିଜୟ) ଓ ଶ୍ରେୟାସ ଆୟାର (୨୪ ମ୍ୟାଚ୍, ୧୩ ବିଜୟ) ମଧ୍ୟ ଅନେକ ମ୍ୟାଚ୍ରେ ନେତୃତ୍ୱ ନେବାର ସୁଯୋଗ ପାଇଛନ୍ତି।
