କଲମ୍ବୋ, ୨୯।୬(ପି.ଟି.)-
ଶିଖର ଧାଓ୍ବନଙ୍କ ନେତୃତ୍ୱାଧୀନ ଟିମ୍ ଇଣ୍ଡିଆ ସୋମବାର ଶ୍ରୀଲଙ୍କାରେ ପହଞ୍ଚତ୍ଛି। ସେଠାରେ ଭାରତୀୟ ଦଳ ୬ଟି ସୀମିତ ଓଭର କ୍ରିକେଟ ମ୍ୟାଚ ଖେଳିବ। ଏହା ମଧ୍ୟରେ ୩ଟି ଲେଖାଏ ଦିନିକିଆ ଓ ଟି୨୦ ମ୍ୟାଚ ସାମିଲ। ଜୁଲାଇ ୧୩ରୁ ଏହି ସିରିଜ ଆରମ୍ଭ ହେବ। ନିୟମିତ ଅଧିନାୟକ ବିରାଟ କୋହଲି ଏବଂ ଟେଷ୍ଟ ଦଳର ସଦସ୍ୟ ଏବେ ଇଂଲଣ୍ଡରେ ଥିବାରୁ ଦ୍ରୁତ ବୋଲର ଭୁବନେଶ୍ୱର କୁମାର ଉପଅଧିନାୟକ ମନୋନୀତ ହୋଇଛନ୍ତି। ଶ୍ରୀଲଙ୍କା ଗସ୍ତ ପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ୨୦ ଜଣିଆ ଦଳ ଘୋଷଣା କରିଛି। ସେମାନଙ୍କ ମଧ୍ୟରେ ହାର୍ଦ୍ଦିକ ପାଣ୍ଡ୍ୟା, କୁଲଦୀପ ଯାଦବ, ୟଜବେନ୍ଦ୍ର ଚହଲଙ୍କ ପରି ସିନିୟର ଖେଳାଳି ସାମିଲ ଅଛନ୍ତି। ଏହା ବ୍ୟତୀତ ଦେବଦତ୍ତ ପଡିକାଲ, ପୃଥ୍ବୀ ଶ’, ନୀତୀଶ ରାଣା, ଋତୁରାଜ ଗାଏକ୍ୱାଡ ଓ ପ୍ରତିଭାସମ୍ପନ୍ନ ପେସ୍ ବୋଲର ଚେତନ ସାକାରିଆଙ୍କ ପରି ଯୁବ ଖେଳାଳି ମଧ୍ୟ ରହିଛନ୍ତି। ଦୁଇ ଯୁବ ଉଇକେଟ କିପର ଇଶାନ କିଶନ ଏବଂ ସଞ୍ଜୁ ସାମସନ ତାଲିକାରେ ସ୍ଥାନ ପାଇଛନ୍ତି। ଭାରତୀୟ ଦଳ ଯୁବ ଏବଂ ଅଭିଜ୍ଞ ଖେଳାଳିଙ୍କୁ ନେଇ ବେଶ୍ ସନ୍ତୁଳିତ ବୋଲି ଅଧିନାୟକ ଧାଓ୍ବନ ପ୍ରକାଶ କରିଛନ୍ତି।
ଶ୍ରୀଲଙ୍କା କ୍ରିକେଟ ଓ୍ବେବସାଇଟ୍ ଅନୁସାରେ ଭାରତୀୟ ଦଳ ଜୁନ ୨୯ରୁ ଜୁଲାଇ ୧ ପର୍ଯ୍ୟନ୍ତ ରୁମ୍ କ୍ୱାରାଣ୍ଟାଇନ୍ରେ ରହିବେ। ଜୁଲାଇ ୨ରୁ ୪ ପର୍ଯ୍ୟନ୍ତ ସେମାନେ ପର୍ଯ୍ୟାୟଭିତ୍ତିକ ଟ୍ରେନିଂ କରିବେ। ୫ ତାରିଖରୁ ପୂରା ଦଳର ଟ୍ରେନିଂ ଆରମ୍ଭ ହେବ। ପରିବେଶ ସହିତ ଅଭ୍ୟସ୍ତ ହେବାପାଇଁ ଇଣ୍ଟ୍ରା ସ୍କ୍ବାଡ୍ ମ୍ୟାଚ ମଧ୍ୟ ଖେଳିବେ।
ଭାରତୀୟ ଦଳ: ଶିଖର ଧାଓ୍ବନ(ଅଧିନାୟକ), ପୃଥ୍ବୀ ଶ’, ଦେବଦତ୍ତ ପଡିକାଲ, ଋତୁରାଜ ଗାଏକ୍ୱାଡ, ସୂର୍ଯ୍ୟକୁମାର ଯାଦବ, ମନୀଷ ପାଣ୍ଡେ, ହାର୍ଦ୍ଦିକ ପାଣ୍ଡ୍ୟା, ନୀତୀଶ ରାଣା, ଇଶାନ କିଶନ, ସଞ୍ଜୁ ସାମସନ, ୟୁଜବେନ୍ଦ୍ର ଚହଲ, ରାହୁଲ ଚହର, କ୍ରିଷ୍ଣାପ୍ପା ଗୋଥାମ, କୃନାଲ ପାଣ୍ଡ୍ୟା, କୁଲଦୀପ ଯାଦବ, ବରୁଣ ଚକ୍ରବର୍ତ୍ତୀ, ଭୁବନେଶ୍ୱର କୁମାର, ଦୀପକ ଚହର, ନବଦୀପ ସଇନୀ, ଚେତନ ସାକାରିଆ।
ନେଟ୍ ବୋଲର: ଇଶାନ ପୋରେଲ, ସନ୍ଦୀପ ଓ୍ବାରିୟର, ଅର୍ଶଦୀପ ସିଂ, ସାଇ କିଶୋର, ସିମରଜିତ୍ ସିଂ।
