କଲମ୍ବୋ,୧୭।୭: ଶନିବାରଠାରୁ ଶ୍ରୀଲଙ୍କା ବିପକ୍ଷରେ ଆରମ୍ଭ ହେବାକୁ ଯାଉଥିବା ଦିନିକିଆ ସିରିଜ୍ରେ ଭାରତୀୟ ଦଳର ନେତୃତ୍ୱ ଭାର ସମ୍ଭାଳିବେ ଶିଖର ଧାଓ୍ବନ। କ୍ୟାରିୟରରେ ପ୍ରଥମ ଥର ପାଇଁ ଗୁରୁ ଦାୟିତ୍ୱ ବହନ କରିବାକୁ ଯାଉଥିବା ଧାଓ୍ବନଙ୍କ ନିକଟରେ ରହିଛି ଏକ ବଡ଼ ସୁଯୋଗ। ଦିନିକିଆ କ୍ୟାରିୟରରେ ୬ ହଜାର ରନ୍ ପୂରଣ କରିବା ପାଇଁ ତାଙ୍କୁ ମାତ୍ର ୨୩ ରନ୍ ଦରକାର। ଯଦି ପ୍ରଥମ ଦିନିକିଆରେ ସେ ଆବଶ୍ୟକୀୟ ରନ୍ ସଂଗ୍ରହ କରିବାକୁ ସକ୍ଷମ ହୁଅନ୍ତି, ତେବେ ସେ ବିରାଟ କୋହଲିଙ୍କ ପରେ ଦେଶର ଦ୍ରୁତତମ ବ୍ୟାଟ୍ସମ୍ୟାନ ଭାବେ ୬୦୦୦ ରନ୍ ପୂରଣ କରିବେ। ଏହି ଧାରାରେ ସେ ପୂର୍ବତନ ଅଧିନାୟକ ସୌରଭ ଗାଙ୍ଗୁଲିଙ୍କୁ ପଛରେ ପକାଇ ପାରନ୍ତି।
ଭାରତୀୟଙ୍କ ମଧ୍ୟରେ ଖୁବ୍ କମ୍ ଇନିଂସ ଖେଳି ଦିନିକଆରେ ୬୦୦୦ ରନ୍ ପୂରଣ କରିବାର ରେକର୍ଡ କୋହଲିଙ୍କ ନାମରେ ଅଛି। ସେ ୧୩୬ତମ ଇନିଂସରେ ଏହି ମାଇଲଷ୍ଟୋନ ସ୍ପର୍ଶ କରିଥିଲେ। ତାଙ୍କ ପଛକୁ ରହିଛନ୍ତି ‘ଦାଦା’ ଭାବେ ପରିଚିତ ଗାଙ୍ଗୁଲି (୧୪୭)। କ୍ୟାରିୟରର ୧୪୦ତମ ଇନିଂସରେ ୬ ହଜାର ରନ୍ ପୂରଣ କରିପାରନ୍ତି ଧାଓ୍ବନ।
