ଚାନ୍ଦବାଲି,୪।୬(ଡି.ଏନ.ଏ.) ଭଦ୍ରକ ଜିଲା ଧାମରା ବନ୍ଦର କମ୍ପାନୀ ପକ୍ଷରୁ ନିଯୁକ୍ତି ସୁଯୋଗଠାରୁ ଆରମ୍ଭ କରି ପାରିପାର୍ଶ୍ୱିକ ବିକାଶ ପାଇଁ ଗତ ୧୪ ବର୍ଷ ମଧ୍ୟରେ ଦିଆଯାଇଥିବା ପ୍ରତିଶ୍ରୁତି ପୂରଣ ହୋଇନାହିଁ। କମ୍ପାନୀ ଅଞ୍ଚଳବାସୀଙ୍କୁ ପ୍ରତାରଣା କରି ଚାଲିଛି ବୋଲି ଚାନ୍ଦବାଲି ନିର୍ବାଚନମଣ୍ଡଳୀ କଂଗ୍ରେସ ପକ୍ଷରୁ ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ କୁହାଯାଇଛି। ଏହାର ପ୍ରତିବାଦରେ ଆସନ୍ତା ୧୮ ତାରିଖଠାରୁ ଆନ୍ଦୋଳନ ସହ ବନ୍ଦରକୁ ଅଚଳ କରିଦିଆଯିବ ବୋଲି ଦଳ ଘୋଷଣା କରିଛି।
କଂଗ୍ରେସ ଅଭିଯୋଗ କରିଛି ଯେ, ଅଞ୍ଚଳର ବୃହତମ ସ୍ବାର୍ଥ ଦୃଷ୍ଟିରୁ ଜମି ଅଧିଗ୍ରହଣଠାରୁ ଆରମ୍ଭ କରି ବନ୍ଦର କାର୍ଯ୍ୟକ୍ଷମ ହେବା ଯାଏ ଦଳ ଗଠନମୂଳକ ସମର୍ଥନ ଦେଇଥିଲା। ହେଲେ ବନ୍ଦର ଚତୁଃପାର୍ଶ୍ୱ ଅଞ୍ଚଳ ଏବେ କୋଇଲା ଓ ଧୂଳିରେ ପ୍ରଦୂଷଣମୟ। ପୋଖରୀ, ଗାଡ଼ିଆ, କୋଠାଘର ସବୁଠି କୋଇଲା କଳା ଗୁଣ୍ଡର ଆସ୍ତର। ବନ୍ଦର ପରିସରରେ ବହୁ ସଂଖ୍ୟାର ଗଭୀର ନଳକୂପ ଖନନ କରାଯାଇ ଭୂତଳ ଜଳକୁ କମ୍ପାନୀ ଶୋଷୁଥିବାରୁ ଆଖପାଖ ଅଞ୍ଚଳର ନଳକୂପରୁ ପାଣି ବାହାରୁ ନାହିଁ। ସମ୍ପ୍ରସାରଣ ପାଇଁ ହୋଇଥିବା ଜନଶୁଣାଣିରେ ସବୁଜ ବଳୟ ସୃଷ୍ଟି ଓ ଅଞ୍ଚଳକୁ ପ୍ରଦୂଷଣମୁକ୍ତ କରିବା ପ୍ରତିଶ୍ରୁତି ଦିଆଯାଇଥିଲେ ସୁଦ୍ଧା ଏ ଦିଗରେ କମ୍ପାନୀ ଗୁରୁତ୍ୱ ଦେଉନାହିଁ। ସେହିପରି ଆଦାନୀ ପକ୍ଷରୁ ନିର୍ମିତ ଡାକ୍ତରଖାନାରେ ବିଶେଷଜ୍ଞ ଡାକ୍ତର ଓ ରୋଗ ପରୀକ୍ଷା ବ୍ୟବସ୍ଥା ନାହିଁ। କମ୍ପାନୀ ନେଇଥିବା ଗୋଚର ଓ ଗ୍ରାମ୍ୟ ଜଙ୍ଗଲ ଜମି ବଦଳରେ ଜମି ଦେଉନାହିଁ। ଡ୍ରେନେଜ୍ ବ୍ୟବସ୍ଥା ଲାଗି କମ୍ପାନୀ ଦେଇଥିବା ପ୍ରତିଶ୍ରୁତି ଭୁଲିଯାଇଥିବା ବେଳେ ମୁଖ୍ୟ ଫାଟକ ସମ୍ମୁଖରେ ନିର୍ମିତ ଓଭରବ୍ରିଜ୍ ସର୍ବସାଧାରଣଙ୍କ ବ୍ୟବହାର ପାଇଁ ଖୋଲାଯାଉନି। ସର୍ବୋପରି ନିଯୁକ୍ତି ଓ ନିର୍ମାଣ କାର୍ଯ୍ୟରେ ସ୍ଥାନୀୟ ଲୋକଙ୍କୁ ଅଗ୍ରାଧିକାର ଦେବାର ପ୍ରତିଶ୍ରୁତିକୁ ଏଡ଼ାଇ ଦିଆଯାଇଛି। ଠିକା ଶ୍ରମିକଙ୍କ ଦରମା ବୃଦ୍ଧି, ସ୍ଥାନୀୟ ବେକାରଙ୍କୁ ନିଯୁକ୍ତି, ବନ୍ଦରରେ ଠିକା କାମ ମଧ୍ୟ ସ୍ଥାନୀୟ ବେକାରଙ୍କୁ ମିଳୁ ଆଦି ଦାବି କରାଯାଇଛି। କଂଗ୍ରେସ ନେତା ଦିଗମ୍ବର ଦାସ, ଅମୀୟ ମହାପାତ୍ର, ସତ୍ୟାନନ୍ଦ ରାଉତ, ମନୋଜ ବିଶ୍ୱାଳ, କିଣୁରାମ ଯେନା, ଦିଗମ୍ବର ସାହୁ, ନୁର୍ ମହମ୍ମଦ ଇସ୍ମାଇଲ, ସୁଲୋଚନା ନାୟକ, ବୃନ୍ଦାବନ ମହାଳିକ, ସନାତନ ନାୟକ, ମନୋରଞ୍ଜନ ସାହୁ, ମହମ୍ମଦ ମଞ୍ଜର, ମହମ୍ମଦ ୟାକୁବ ପ୍ରମୁଖ ଖବରଦାତା ସମ୍ମିଳନୀରେ ଉପସ୍ଥିତ ଥିଲେ।
