ଖ୍ରୀଷ୍ଟଚର୍ଚ୍ଚ, ୨୨ା୨- ନ୍ୟୁଜିଲାଣ୍ଡ ବ୍ୟାଟ୍ସମ୍ୟାନ ଡେଭନ କନଓ୍ବେ ସୋମବାର ସ୍ବତନ୍ତ୍ର ଟି୨୦ ସ୍ପେଶାଲିଷ୍ଟ ବ୍ୟାଟ୍ସମ୍ୟାନଙ୍କ ତାଲିକାରେ ସାମିଲ ହୋଇଛନ୍ତି। ଏଠାରେ ଅଷ୍ଟ୍ରେଲିଆ ବିପକ୍ଷରେ ଖେଳାଯାଇଥିବା ଟି୨୦ ମ୍ୟାଚ୍ରେ ମାତ୍ର ୧ ରନ୍ ବ୍ୟବଧାନରେ ଶତକରୁ ବର୍ତ୍ତି ଯାଇଥିଲେ ଡେଭନ। ସେ ୫୯ ବଲରୁ ୯୯* ରନ୍ର ଇନିଂସ ଖେଳି ଦଳର ବିଜୟରେ ଗ୍ରହଣ କରିଥିଲେ ମୁଖ୍ୟଭୂମିକା। ତେବେ କ୍ରିକେଟର ଛୋଟିଆ ଫର୍ମାଟରେ ଏହା ଥିଲା ତାଙ୍କର କ୍ରମାଗତ ୫ମ ଅର୍ଦ୍ଧଶତକ। ଏହି ମ୍ୟାଚ୍ ପୂର୍ବରୁ ୪ଟି ସୁପର ସ୍ମାଶ ମ୍ୟାଚ୍ରେ ଯଥାକ୍ରମେ ୯୩*, ୯୧*, ୬୯ ଓ ୫୦ ରନ୍ର ପାଳି ଖେଳିଥିଲେ। ଏହି ସଫଳତା ପାଇବାରେ ଡେଭନ ନ୍ୟୁଜିଲାଣ୍ଡର ପ୍ରଥମ ବ୍ୟାଟ୍ସମ୍ୟାନ। ଘରୋଇ କ୍ରିକେଟରେ ଏଭଳି ଜବରଦସ୍ତ ପ୍ରଦର୍ଶନ ସତ୍ତ୍ୱେ ତାଙ୍କୁ ଆଇପିଏଲ ଅକ୍ଶନରେ କିଣି ନ ଥିଲେ କୌଣସି ଫ୍ରାଞ୍ଚାଇଜ।
ଡେଭନଙ୍କ ବ୍ୟତୀତ ଟି୨୦ ଫର୍ମାଟରେ କ୍ରମାଗତ ଅର୍ଦ୍ଧଶତକ ହାସଲ କରିଥିବା ବ୍ୟାଟ୍ସମ୍ୟାନଙ୍କ ତାଲିକାରେ ଏକମାତ୍ର ଭାରତୀୟ ଭାବେ ସ୍ଥାନ ପାଇଛନ୍ତି ପୂର୍ବତନ ଓପନର ବୀରେନ୍ଦ୍ର ସେହ୍ବାଗ, ପାକିସ୍ଥାନର କାମରାନ ଅକମଲ, ଜିମ୍ବାଓ୍ବେର ପୂର୍ବତନ ଅଧିନାୟକ ହାମିଲଟନ ମାସାକାଡ୍ଜା, ଇଂଲଣ୍ଡର ଜୋସ ବଟଲର ଓ ଅଷ୍ଟ୍ରେଲିଆର ଡେଭିଡ୍ ଓ୍ବାର୍ନର।
