ମୁମ୍ବାଇ,୩୦ ।୬: ଗଲା ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ଆସନ । ବୁଧବାର ପର୍ଯ୍ୟନ୍ତ ସେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ଥିବା ବେଳେ ଗୁରୁବାର ସକାଳୁ ସେ ହେଲେ କାର୍ଯ୍ୟକାରୀ ସିଏମ । ମହାରାଷ୍ଟ୍ରର ଏହି ରାଜନୈତିକ ସଙ୍କଟ ମଧ୍ୟରେ ଭାରତୀୟ ଜନତା ପାର୍ଟି(ଭାଜପା) ସରକାର ଗଠନ କରିବାକୁ ପାଗ ଭିଡି ସାରିଲାଣି । ଗୁରୁବାର ସକାଳ ୧୧ରେ ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିଶଙ୍କ ଘରେ କୋର ଗ୍ରୁପର ବୈଠକ ବସିବ । ଏହି ବୈଠକରେ ମହାରାଷ୍ଟ୍ର ଭାଜପାର ପ୍ରଭାରୀ ସିଟି ରବି ବୈଠକରେ ଉପସ୍ଥିତ ରହିବେ । ମହାରାଷ୍ଟ୍ରରେ ସରକାର ଗଠନକୁ ନେଇ ବୈଠକରେ ଚର୍ଚ୍ଚା ହେବ । ଅନୁମାନ କରାଯାଉଛି କି ଦେବେନ୍ଦ୍ର ଫଡନବିଶ ଜୁଲାଇ ୧-୨ରେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିପାରନ୍ତି ।
ସୂଚନଯୋଗ୍ୟ, ବୁଧବାର ବିଳମ୍ବିତ ରାତ୍ରିରେ ବିଧାୟକଙ୍କ ସହ ବୈଠକ ପରେ ଯେତେବେଳେ ଫଡନବିଶ ବାହାରକୁ ଆସିଲେ ସେତେବେଳେ ତାଙ୍କର ହସ ହସ ମୁହଁ ସରକାର ଗଠନକୁ ନେଇ ଯେମିତି ଇସାରା କରୁଥିଲା । ଯେତେବେଳେ ଫଡବିଶ ମଙ୍ଗଳବାର ଦିଲ୍ଲୀ ଗସ୍ତ କରିଥିଲେ ସେତେବେଳେ ସେ ମହାରାଷ୍ଟ୍ରରେ ସରକାର ଗଠନ କରିବାକୁ ନେଇ ରଣନୀତି ପ୍ରସ୍ତୁତ କରିସାରିଥିଲେ । ଆଉ ଏବେ ଯେତେବେଳେ ଉଦ୍ଧବ ଠାକରେ ସବୁରାସ୍ତା ସଫା କରିଦେଲେ ସେତେବେଳେ ଫଡନବିଶଙ୍କୁ ସରକାର ଗଠନ କରିବା ସହଜ ହୋଇଗଲା ।
