ଡେରାବିଶ,୨ା୧୦ (ସ୍ବ.ପ୍ର.): ଲଘୁଚାପ ଜନିତ ବର୍ଷା ଓ ବନ୍ୟାରେ ଡେରାବିଶ ବ୍ଲକରେ ବହୁ ଧାନ ଫସଲ ନଷ୍ଟ ହୋଇଛି। ଯେଉଁଠି ଧାନଗଛ ଭଲ ଥିଲା ଏବେ ହଳଦିଗୁଣ୍ଡି ଓ ଚକଡ଼ା ପୋକ ଲାଗି ତାହା ନଷ୍ଟ ହେବାକୁ ବସିଛି। ଏହାକୁ ନେଇ ଚାଷୀ ମୁଣ୍ଡରେ ଚଡ଼କ ପଡ଼ିଛି।
ବ୍ଲକ ଅଧୀନ ଇନ୍ଦାଳୋ ପାଟର ଇନ୍ଦାଳୋ, ହରିଅଙ୍କ ଓ ଯଅଁରାବାରିମୂଳ ପଞ୍ଚାୟତର ଶହ ଶହ ଏକର ଧାନ ଫସଲ ନଷ୍ଟ ହୋଇଛି। ମାତ୍ର ୧୦ ପ୍ରତିଶତ ଜମିରେ ବଞ୍ଚତ୍ୟାଇଥିବା ଧାନ ଗଛରେ ଏବେ ପୋକ ଲାଗି ନଷ୍ଟ ହେବାରେ ଲାଗିଛି। ନାନକାରଠାରେ ଥିବା ସାଇଫନ୍ ଯୋଗେ ଇନ୍ଦାଳୋ ପାଟରୁ କରାଣ୍ଡିଆ ନଦୀମଧ୍ୟକୁ ଜଳ ନିଷ୍କାସିତ ହୋଇଥାଏ। ମାତ୍ର ଜଳ ସମ୍ପଦ ଓ ଡ୍ରେନେଜ୍ ବିଭାଗ ମଧ୍ୟରେ ସମନ୍ବୟ ଅଭାବରୁ ପାଟ ମଧ୍ୟରୁ ନଦୀକୁ ଜଳ ନିଷ୍କାସିତ ହୋଇପାରୁ ନ ଥିବା ନେଇ ପୂର୍ବତନ ବ୍ଲକ ଆତ୍ମା ସଭାପତି ଚୌଧୁରୀ ରବୀନ୍ଦ୍ର ଜେନା କହିଛନ୍ତି। ଚାଷୀ ଅଭା ପ୍ରକାଶ ରଥ, କାଳି ପ୍ରସାଦ ସେଠୀ, ବାମଦେବ ଦଳେଇ, ରଞ୍ଜନ ନାୟକ ପ୍ରମୁଖ କହିଛନ୍ତି, ବର୍ଷା ଜଳ ଦୀର୍ଘଦିନ ଧରି ବିଲରେ ଜମି ରହିବା ଫଳରେ ଧାନ ଗଛ ମୂଳ ପଚିଯାଇଛି। କେତେକ ଉଚ୍ଚା ଜମିରେ ବର୍ଷା ପରେ ଫସଲ ଭଲ ଅବସ୍ଥାରେ ଥିଲା। ମାତ୍ର ଏକସପ୍ତାହ ହେବ ହଳଦିଗୁଣ୍ଡି ଓ ଚକଡ଼ା ପୋକ ଲାଗିବା ଫଳରେ ଧାନଗଛର ପତ୍ର ହଳଦିଆ ପଡ଼ିଯାଇ ନଷ୍ଟ ହେବାରେ ଲାଗିଛି। ଧାର କରଜ କରି ସମବାୟ ସଂସ୍ଥାରୁ ଋଣ ଆଣି ଚାଷ କରିଥିବାରୁ କିପରି ଋଣ ପରିଶୋଧ କରାଯିବ ସେ ନେଇ ଚିନ୍ତାରେ ଅଛୁ ବୋଲି ଚାଷୀ ସଞ୍ଜୀବ ପଣ୍ଡା କହିଛନ୍ତି। ବ୍ଲକ କୃଷି ଅଧିକାରୀ ଅନୁରାଧା ପଣ୍ଡା କହିଛନ୍ତି, ରୋଗ ପୋକ ପାଇଁ ଚାଷୀ ଗ୍ରାମସେବକଙ୍କୁ ଜଣାଇବା ଆବଶ୍ୟକ। ତାଙ୍କ ସୁପାରିସରେ ସବ୍ସିଡ଼ିରେ ପୋକମରା ଔଷଧ ଯୋଗାଇ ଦିଆଯିବ। ବର୍ଷାରେ ନଷ୍ଟ ହୋଇଥିବା ଧାନଫସଲ ପାଇଁ କୃଷି ଓ ରାଜସ୍ବ ବିଭାଗ ପକ୍ଷରୁ କ୍ଷୟକ୍ଷତିର ଆକଳନ କରାଯାଇ ରିପୋର୍ଟ ପ୍ରଦାନ କରାଯାଇଛି।
