ଦେଓଗାଁ,୩ା୮(କୃଷ୍ଣ ପ୍ରସାଦ ପାଣିଗ୍ରାହୀ): ଗତ ଦୁଇଦିନ ହେଲା ଲଗାଣ ବର୍ଷା ଲାଗିରହିଛି। ଏହାର ପ୍ରଭାବରେ ବଲାଙ୍ଗୀର ଜିଲା ଦେଓଗାଁ ବ୍ଲକର ବ୍ୟାପକ ଅଞ୍ଚଳ ପାଣିଘେରରେ ରହିଛି। ବିଭିନ୍ନ ଗାଁରେ ଗଛ ଉପୁଡି ପଡିବା ସହ ଲୋକଙ୍କ ଘର ଭାଙ୍ଗିଯାଇଛି। ଧାନ ଓ ପନିପରିବା ଫସଲ ଉଜୁଡି ଯାଇଛି। ତେଲ ଓ ସୋନଗଡ ନଦୀରେ ବନ୍ୟାଜଳ ବଢ଼ିବାରେ ଲାଗିଛି। କୁଲୁତାପଡା ପଞ୍ଚାୟତ ଅନ୍ତର୍ଗତ ଖଇରମାଲ ଓ ସିଂହାଟିମାଲ ଅଞ୍ଚଳରେ ବନ୍ୟା ସ୍ଥିତି ଗମ୍ଭୀର ରହିଛି। କୁଲୁତାପଡା ଓ ଅର୍ଜୁନପୁର ରାସ୍ତା ଉପରେ ପାଣି ବୋହୁଛି। ମଝିରେ ନିର୍ମାଣାଧୀନ ପୋଲ ଭାଙ୍ଗିଯିବାରୁ ବର୍ତ୍ତମାନ ସମ୍ପୃକ୍ତ ପଥରେ ଯାତାୟାତ ବିଚ୍ଛିନ୍ନ ରହିଛି। ବ୍ରାହ୍ମଣୀପାଲିରୁ ଖଇରମାଲ ରାସ୍ତାରେ ଥିବା ପୋଲ ନିକଟରେ ଘାଇ ସୃଷ୍ଟି ହେବାରୁ ପଞ୍ଚାୟତ ମୁଖ୍ୟାଳୟକୁ ଯୋଗାଯୋଗ ବିଚ୍ଛିନ୍ନ ହୋଇଛି ା ତେଲନଦୀରେ ବନ୍ୟାଜଳ ବୃଦ୍ଧି ପାଉଥିବାରୁ ଖଇରମାଳ, ସିଂହାଟିମାଲ ତଥା ଆଖପାଖ ଗ୍ରାମବାସୀ ଆତଙ୍କିତ ଅବସ୍ଥାରେ ରହିଛନ୍ତି। ସେହିପରି ଗୁଡଖାପଲା ପଞ୍ଚାୟତ ଅନ୍ତର୍ଗତ ମାଲପଡା ନିକଟସ୍ଥ ବଢ଼ିଆପଡାରେ ଅନେକ ପରିବାର ଜଳବନ୍ଦୀ ଭାବେ ରହିଥିବା ସୂଚନା ମିଳିଛି। ବୁଧବାର ସନ୍ଧ୍ୟାସୁଦ୍ଧା ଖଇରମାଲ ଅଙ୍ଗନୱାଡି ପର୍ଯ୍ୟନ୍ତ ବନ୍ୟାଜଳ ମାଡିଆସିଛି। ଘଟଣାସ୍ଥଳରେ ଦେଓଗାଁ ତହସିଲଦାର ଯୁଗଳ କିଶୋର ବିଶ୍ୱାଳ, ବିଡିଓ ସୁରେନ୍ଦ୍ର କୁମାର ମେହେର,ତୁଷୁରା ଥାନାଧିକାରୀ ସଞ୍ଜୀବ ପଧାନ ପହଞ୍ଚତ୍ ସ୍ଥିତି ଅନୁଧ୍ୟ୍ୟାନ କରୁଥିବା ସୂଚନା ଦେଇଛନ୍ତି। ଆବଶ୍ୟକ ପଡିଲେ ରାତି ସୁଦ୍ଧା ଖଇରମାଲ ଗାଁର ୪୫ପରିବାରର ପ୍ରାୟ ୩୨୦ ଜଣଙ୍କୁ ଅର୍ଜୁନପୁର ବନ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତର କରାଯିବ ବୋଲି ତହସିଲଦାର ବିଶ୍ୱାଳ ସୂଚନା ଦେଇଛନ୍ତି।
ଲଗାଣବର୍ଷା ଯୋଗୁଁ ବ୍ଲକର ବିଭିନ୍ନ ଗାଁରେ ଘର ଭାଙ୍ଗିବା ଚିତ୍ର ସାମ୍ନାକୁ ଆସିଛି। ସାରସବାହାଲ ଗାଁର ଜିତେଶ ରଣା, ନନ୍ଦ ମାହାକୁରଙ୍କ ଘର ଭାଙ୍ଗିଛି। ଘୁଚିପାଲିର ସୁରେନ୍ଦ୍ର ମାଝି, ସୁକାନ୍ତି ମାଝି, ବିକଳ ମାଝି, ବନ୍ଧପଡା ଗାଁର ସୁଧିର କୁମ୍ଭାର, ଗୁଡଖାପଲା ଗାଁର ଲକ୍ଷ୍ମଣ ସୁନା ତଥା ଲଣ୍ଡାପଥର ପଞ୍ଚାୟତ ଅନ୍ତର୍ଗତ ଝିକେରମାଲ ଗାଁର ୨ଟି ପରିବାରର ଘର ଭାଙ୍ଗିଥିବା ବେଳେ ସେମାନେ ସ୍ଥାନୀୟ ବିଦ୍ୟାଳୟରେ ଆଶ୍ରୟ ନେଇଥିବା ସରପଞ୍ଚ ଦେବାନ୍ତୀ କ୍ଷେତି ସୂଚନା ଦେଇଛନ୍ତି। ପଞ୍ଚାୟତ ତରଫରୁ ପ୍ରାଥମିକ ସହାୟତା ଯୋଗାଇ ଦିଆଯାଇଛି। ତହସିଲ ପକ୍ଷରୁ ଏକ ଟିମ ଗାଁକୁ ଗାଁ ଯାଇ ସର୍ଭେ କରି ଆବଶ୍ୟକ ପଦକ୍ଷେପ ଗ୍ରହଣ କରାଯିବ ବୋଲି ତହସିଲଦାର ବିଶ୍ୱାଳ ସୂଚନା ଦେଇଛନ୍ତି।
