ପାଟଣା,୨୫ା୧୨(ବୀରକିଶୋର ଦାଶ): କେନ୍ଦୁଝର ଜିଲା ପାଟଣା ରେଞ୍ଜରେ ୨୩ ଟିକିଆ ବଣୁଆ ହାତୀପଲଙ୍କ ଉପଦ୍ରବ ଜାରି ରହିଛି। ଏହି ହାତୀପଲ ରବିବାର ରାତିରେ ସାହାରପଡ଼ା ସେକ୍ସନରୁ ବୈତରଣୀ ନଦୀ ପାର ହୋଇ ପାଟଣା ସେକ୍ସନରେ ଘର ଭାଙ୍ଗିବା ସହ ଘର ଭିତରୁ ଧାନ ଚାଉଳ ଖାଇ ନଷ୍ଟ କରିଛନ୍ତି। ଏହି ହାତୀପଲ ବୈତରଣୀ ନଦୀର ପରମେଶ୍ବର ଶିବମନ୍ଦିର ନିକଟରେ ପାର ହେବା ପରେ ବିଷ୍ଣୁପୁର ଗ୍ରାମର ଅରୁଣ ମିଶ୍ରଙ୍କ କଦଳୀ ବଗିଚା ନଷ୍ଟ କରିଥିଲେ। ଏହା ପରେ ପୁଟୁଳିଆ ଗ୍ରାମର ଶରତ ମହାନ୍ତଙ୍କ ଘର କାନ୍ଥ ଭାଙ୍ଗିବା ପରେ ସାମଖସା ପିଠା ସାହି ଜଙ୍ଗଲ ନିକଟରେ ଘର କରି ରହିଥିବା ମିଥୁନ ମହାନ୍ତଙ୍କ ୩ ବଖରା ଘର ଭାଙ୍ଗି ଛାରଖାର କରିବା ସହ ୭ ବସ୍ତା ଧାନ ୨ ବସ୍ତା ଚାଉଳ ଖାଇଦେଇଛନ୍ତି। ଏଥି ସହ ଅମଳ ପାଇଁ ରଖା ଯାଇଥିବା ଧାନ ବିଡ଼ାକୁ ମଧ୍ୟ ହାତୀପଲ ଖାଇ ନଷ୍ଟ କରିଛନ୍ତି। ହାତୀ ଜେଜେମା ନାତି ଶୋଇଥିବା ଘରେ ହାତୀ କାନ୍ଥ ଭାଙ୍ଗି ଧାନ ଚାଉଳ ଖାଇଥିଲେ ହାତୀ ଆକ୍ରମଣରୁ ରକ୍ଷା ପାଇବା ପାଇଁ ଉଭୟ ଘରୁ ଦୌଡ଼ି ଯାଇ ବିଲକୁ ଚାଲିଯିବାରୁ ଅଳ୍ପକେ ବର୍ତ୍ତି ଯାଇଛନ୍ତି। ଏବେ ହାତୀପଲ ପାଟଣା ସଂରକ୍ଷିତ ଜଙ୍ଗଲର ଗୋବରା ବେଡ଼ା ଗାଁ ନିକଟରେ ଡେରା ପକାଇଛନ୍ତି। ଗାଁ ନିକଟରେ ହାତୀପଲ ବୁଲୁଥିବାରୁ ସ୍ଥାନୀୟ ଲୋକେ ଭୟଭୀତ ଅବସ୍ଥାରେ ରହିଛନ୍ତି।
