ନୂଆଦିଲ୍ଲୀ,୧୨।୮: ବିହାରରେ ନୀତୀଶ କୁମାରଙ୍କ ନେତୃତ୍ୱରେ ନୂତନ ମହାମେଣ୍ଟ ସରକାର ଗଠନ ପରେ ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବ ଦିଲ୍ଲୀରେ ପହଞ୍ଚିଛନ୍ତି। ସେ ତାଙ୍କ ପିତା ତଥା ଆରଜେଡି ସୁପ୍ରିମୋ ଲାଲୁ ଯାଦବ ଏବଂ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଭେଟିବେ। ଏହି ସମୟରେ ସେ ନୀତୀଶଙ୍କ କ୍ୟାବିନେଟର ସମ୍ପ୍ରସାରଣ ବିଷୟରେ ଆଲୋଚନା କରିବେ। ତେଜସ୍ବୀ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ମଧ୍ୟ ଭେଟିବାର କାର୍ଯ୍ୟକ୍ରମ ରହିଛି। ଆରଜେଡି ସୁପ୍ରିମୋ ଲାଲୁ ଯାଦବ ଦିଲ୍ଲୀର ଏମ୍ସରେ ଚିକିତ୍ସା ପରେ ବଡ ଝିଅ ମିସା ଭାରତୀଙ୍କ ଘରେ ରହିଆସୁଛନ୍ତି।
ପାଟନା ବିମାନବନ୍ଦରରେ ତେଜସ୍ବୀ କହିଛନ୍ତି, ମହାମେଣ୍ଟ ସରକାରଙ୍କ କ୍ୟାବିନେଟ ଖୁବ ଶୀଘ୍ର ବିସ୍ତାର ହେବ। ଦିଲ୍ଲୀରେ ପିତା ଲାଲୁ ଯାଦବଙ୍କ ସହ ଆରଜେଡି କୋଟା ମନ୍ତ୍ରୀଙ୍କ ନାମ ଉପରେ ବିଚାର କରିବେ। ଦିଲ୍ଲୀରେ ଅନେକ ବିରୋଧୀ ଦଳର ନେତାଙ୍କ ସହ ଏକ ବୈଠକ ମଧ୍ୟ ହେବ।
ସୂଚନାଯୋଗ୍ୟ,ଗତ ମଙ୍ଗଳବାର ଏନଡିଏ ଏବଂ ଭାଜପା ସହ ସମ୍ପର୍କ ଭାଙ୍ଗିବା ପରେ ନୀତୀଶ କୁମାର ପୁଣିଥରେ ନିଜର ପୁରୁଣା ମହାମେଣ୍ଟ ସହ ହାତ ମିଳାଇଛନ୍ତି। ବିହାରର ମହାମେଣ୍ଟ ଜେଡିୟୁ, ଆରଜେଡି, କଂଗ୍ରେସ, ହମ ଏବଂ ବାମ ଦଳକୁ ନେଇ ଗଠିତ।
