ଭଦ୍ରକ ଅଫିସ,୧୨।୫: ଭଦ୍ରକ ପୌରାଞ୍ଚଳ ଅଧୀନ ମୋଚି ଛକଠାରୁ ପୁରୁଣାବଜାର ପର୍ଯ୍ୟନ୍ତ ଯାଇଥିବା ଗୁରୁତ୍ୱପୂର୍ଣ୍ଣ ରାସ୍ତା(ହନିଫ୍ ମାର୍ଗ)ର ଅବସ୍ଥା ଶୋଚନୀୟ ହୋଇପଡ଼ିଛି। ଏହି ରାସ୍ତା ଉପରେ ପ୍ରତ୍ୟେହ ପୁରୁଣାବଜାର ଅଞ୍ଚଳର ୧୨ରୁ ଊର୍ଦ୍ଧ୍ୱ ୱାଡର୍ର୍ ଓ ଭଦ୍ରକ ବ୍ଲକର କେତେକ ଅଞ୍ଚଳର ବାସିନ୍ଦା ପ୍ରାୟ ୩୦ ହଜାର ଲୋକ ଯାତାୟାତ କରିଥାନ୍ତି। ଅଣ ଓସାରିଆ ହୋଇଥିବାରୁ ଉକ୍ତରାସ୍ତା ଉପରେ ସାମାନ୍ୟ ବର୍ଷାରେ ପାଣି ଜମି ନିକଟବର୍ତ୍ତୀ ବହୁ ଲୋକଙ୍କ ଘରେ ପ୍ରବେଶ କରୁଛି। ୨ମାସ ପୂର୍ବେ ସନ୍ଥିଆ ପୋଲଠାରୁ ପୁରୁଣାବଜାର ଛକ ପର୍ଯ୍ୟନ୍ତ ଯାଇଥିବା ରାସ୍ତାର ପ୍ରଶସ୍ତୀକରଣ କାର୍ଯ୍ୟ ହାତକୁ ନିଆଯାଇଥିଲା। ନିର୍ମାଣ କାର୍ଯ୍ୟ ନିମ୍ନମାନର ହେଉଥିବା ସ୍ଥାନୀୟ ଲୋକ ଅଭିଯୋଗ କରିଥିବା ବେଳେ କିଛି ଦିନ ପୂର୍ବେ ରାତି ଅଧରେ କାର୍ଯ୍ୟ ଚାଲିଥିବା ସମୟରେ ସ୍ଥାନୀୟ ବାସିନ୍ଦା ଏହାକୁ ବନ୍ଦ କରିଥିଲେ। ଏହାର ବିଧିବଦ୍ଧ ତଦନ୍ତ କରି ସମ୍ପୃକ୍ତ ଠିକାଦାରଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ୧୦ଟି ୱାର୍ଡର କାଉନସିଲର ଦାବି କରିଛନ୍ତି। ତେଣୁ ଉକ୍ତ ରାସ୍ତାର ମରାମତି ନ କରି ଉକ୍ତ ରାସ୍ତାର ସମ୍ପୂର୍ଣ୍ଣ ପୁନରୁଦ୍ଧାର ପାଇଁ ସେମାନେ ଦାବି କରିଛନ୍ତି। ଆଗାମୀ ୭ଦିନ ମଧ୍ୟରେ ଉକ୍ତ ରାସ୍ତାର ନିର୍ମାଣ କାର୍ଯ୍ୟ ଆରମ୍ଭ ନ ହେଲେ ସନ୍ଥିଆ ପୋଲଠାରେ ହନିଫ ମାର୍ଗକୁ ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ଅବରୋଧ କରାଯିବ ବୋଲି ଚେତାବନୀ ଦେଇଛନ୍ତି। ପାରିଷଦ ସେକ୍ ସାହିଲ ଅଲରସିଦ, ଜାହିଦ ସାହା, ସେକ ଜାହିରୁଦ୍ଦିନ, ରୁକସାନା ଖାତୁନ, ଯମୁନା ସୋରେନ, ହେମନ୍ତ ସାହୁ, ଫରିୟାଜ ଖାନ, ସାହେଜାଦା ଦୂରେ ଇ-ଜିନା, ନବ ନିର୍ମାଣ ଯୁବ ଛାତ୍ର ସଙ୍ଗଠନର ସଭାପତି ଜାହିର ଖାନ, ଏନାମୁଲ ହକ୍ ପ୍ରମୁଖ ପୂର୍ତ ଗୃହ ନିର୍ମାଣ ବିଭାଗର ନିର୍ବାହୀ ଯନ୍ତ୍ରୀଙ୍କୁ ଏକ ସ୍ମାରକପତ୍ର ଜରିଆରେ ଚେତାବନୀ ଦେବା ସହ ଏହି ଦାବିପତ୍ରର ନକଲ ଭଦ୍ରକ ଜିଲାପାଳ ଓ ଆରକ୍ଷୀ ଅଧିକ୍ଷକଙ୍କୁ ପ୍ରଦାନ କରିଛନ୍ତି।
