ଲୋଇସିଂହା,୨୬ା୪(ସୁଶାନ୍ତ ବାରିକ): ବଲାଙ୍ଗୀର ସର୍କିଟ ହାଉସ୍ରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଶନିବାର ଲୋଇସିଂହା ଓ ଆଗଲପୁର ବ୍ଲକର ମିଳିତ କୃଷକ ସଂଘର୍ଷ ସମିତି ଏକ ପ୍ରତିନିଧି ଭେଟି ଲୋୟର ସୁକତେଲ ଡ୍ୟାମ୍ରୁ ଜଳସେଚନରୁ ବାଦ ପଡିଥିବା ଉଭୟ ବ୍ଲକର ୧୧ ପଞ୍ଚାୟତର ଚାଷଜମିକୁ ସ୍ଥାୟୀ ଜଳସେଚନ ପାଇଁ ଦାବିପତ୍ର ଦିଆଯାଇଛି। ଦାବିପତ୍ର ଗ୍ରହଣ କରି ମୁଖ୍ୟମନ୍ତ୍ରୀ ଆବଶ୍ୟକ ପଦକ୍ଷେପ ନିଆଯିବ ବୋଲି ସାକ୍ଷାତ କରିଥିବା ପ୍ରତିିନିଧି ଦଳକୁ କହିଛନ୍ତି।
ଏହି ଅବସରରେ ଜିଲାର ୨ ଜଣ ମନ୍ତ୍ରୀ କୃଷିମନ୍ତ୍ରୀ କନକବର୍ଦ୍ଧନ ସିଂଦେଓ ଓ ସ୍ବାସ୍ଥ୍ୟମନ୍ତ୍ରୀ ଡ.ମୁକେଶ ମହାଲିଙ୍ଗ ଉପସ୍ଥିତ ଥିବା ମିଳିତ କୃଷକ ସଂଘର୍ଷର ସମିତିର ସଭାପତି ଯୁଧିଷ୍ଠିର ପଧାନ, ପୂର୍ବତନ ସଭାପତି ରତ୍ନାକର ମିଶ୍ର ଓ ସଦସ୍ୟ ଶ୍ୟାମସୁନ୍ଦର ମେହେର ଜଣାଇଛନ୍ତି। ଲୋଇସିଂହା ବ୍ଲକ ମାଗୁରବେଡ଼ାଠାରେ ସୁକତେଲ ନଦୀରେ ବଲାଙ୍ଗୀର ଜିଲାର ଜୀବନରେଖା କୁହାଯାଉଥିବା ଲୋୟର ସୁକତେଲ ଡ୍ୟାମ୍ ବନ୍ଧାଯାଇଛି। ଚାଷଜମିକୁ ଜଳସେଚନ ଓ ପିଇବା ପାଣି ସଙ୍କଟ ଦୂର ଲକ୍ଷ୍ୟରେ ଏହି ଡ୍ୟାମ୍ ନିର୍ମାଣ ହୋଇଛି। ୨୦୦୦ରେ ଏହି ପ୍ରକଳ୍ପର ଡିପିଆର ପ୍ରସ୍ତୁତ ବେଳେ ବାମପାର୍ଶ୍ୱ କେନାଲରେ ୫୫ ପ୍ରତିଶତ ଓ ଡାହାଣ ପାର୍ଶ୍ୱ କେନାଲରେ ୪୫ ପ୍ରତିଶତ ଜଳସେଚନ ପାଇଁ ସ୍ଥିରୀକୃତ ହୋଇଥିଲା। ସେତେବେଳେ ଖୋଲା କେନାଲର ପ୍ରସ୍ତାବ ରହିଥିଲା। ପରବର୍ତ୍ତୀ ସମୟରେ ଡିପିଆରକୁ ପରିବର୍ତ୍ତନ କରି ଚାପଯୁକ୍ତ ପାଇପ ଯୋଗେ ଜଳସେଚନ ପାଇଁ ପଦକ୍ଷେପ ନିଆଯାଇ ସବୁ କିଛି ଓଲଟପାଲଟ କରିଦିଆଗଲା। ବାମପାର୍ଶ୍ୱ କେନାଲ ଯଥା(ଲୋଇସିଂହା ଓ ଆଗଲପୁର ବ୍ଲକ ପଟ)କୁ ମୋଟ୍ ୪୦ ହଜାର ୧୩୫ ହେକ୍ଟର ଯଥା ୧୩୧୩୦.୫୮ ହେକ୍ଟର( ଯଥା ୩୨.୭୧୬%) ଜମିକୁ ଜଳ ସେଚନ ପାଇଁ ଲକ୍ଷ୍ୟଧାର୍ଯ୍ୟ ହୋଇଛି। ସେହିପରି ଡ୍ୟାମର ଡାହାଣ ପାର୍ଶ୍ୱରେ ୨୭ ହଜାର୪.୪୨ ହେକ୍ଟର( ୬୭.୨୮୪%) ଜମିକୁ ଜଳସେଚନ ଲକ୍ଷ୍ୟଧାର୍ଯ୍ୟ ହୋଇଛି।
ଏହିକ୍ରମରେ ଭୂତଳ ଜଳସେଚନ ପାଇଁ ପାଇପ୍ଲାଇନ କାମ ମଧ୍ୟ ଜୋର୍ସୋରରେ ଚାଲିଛି। କିନ୍ତୁ ୨୦୨୪ ସାଧାରଣ ନିର୍ବାଚନ ପୂର୍ବରୁ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରକଳ୍ପକୁ ତରବରିଆ ଭାବେ ଉଦ୍ଘାଟନ କରିଥିଲେ। ଦୁଃଖର ବିଷୟ ଉକ୍ତ ପ୍ରକଳ୍ପଟି ଲୋଇସିଂହା ନିର୍ବାଚନ ମଣ୍ଡଳୀ ଲୋଇସିଂହା ବ୍ଲକରେ ନିର୍ମାଣ ହୋଇଛି। ପ୍ରକଳ୍ପ ଯୋଗୁ ଲୋଇସିଂହା ବ୍ଲକ ହଜାର ହଜାର ଅଧିବାସୀ ଭିଟାମାଟି ଛାଡ଼ି ବିସ୍ଥାପିତ ହୋଇଛନ୍ତି। ତେବେ ବିଡମ୍ବନା ଯେ, ଡ୍ୟାମର ବାମପାର୍ଶ୍ୱରେ ଥିବା ଲୋଇସିଂହା ବ୍ଲକର ୬ ପଞ୍ଚାୟତ ଲୋଇସିଂହା, ବୁର୍ଡା, ବୁଢୀପଦର,ବାଦିବାହାଲ ଓ ହୀରାପୁର।
ସେହିପରି ଆଗଲପୁର ବ୍ଲକର ୫ଟି ପଞ୍ଚାୟତ ଯଥା ଝରଣୀପାଲି, ନୁନିଆପାଲି, ବଡଟୀକା, ନଅଗାଁ(ଖ) ଓ ବେନ୍ଦ୍ରା ପଞ୍ଚାୟତ ଜଳସେଚନରୁ ବାଦ ପଡିଛି। ଏହାକୁ ନେଇ ସ୍ଥାନୀୟ ଅଞ୍ଚଳରେ ଚାଷୀ ମହଲରେ ଅସନ୍ତୋଷ ପ୍ରକାଶ ପାଇଛି। ଏପରିକି ୨୦୨୪ ସଧାରଣ ନିର୍ବାଚନ ବେଳେ ବର୍ତ୍ତମାନର ବିଧାୟକ ତଥା ସ୍ବାସ୍ଥ୍ୟମନ୍ତ୍ରୀ ଡା.ମୁକେଶ ମହାଲିଙ୍ଗ ନିର୍ବାଚନୀ ସଭାରେ ଭାଜପା ସରକାର ଆସିଲେ ଡିପିଆର ସଂଶୋଧନ କରି ବାଦ ପଡିଥିବା ଅଞ୍ଚଳକୁ ପ୍ରକଳ୍ପକୁ ଜଳସେଚନ ପାଇଁ ପଦକ୍ଷେପ ନିଅଯିବାକୁ ଦୃଢ ପ୍ରତିଶ୍ରୁତି ଦେଇଥିଲେ। ବିଭିନ୍ନ ସମୟରେ ମିଳିତ କୃଷକ ସଂଘର୍ଷ ସମିତି ପକ୍ଷରୁ ସ୍ତାୟୀ ଜସେଚନ ଦାବି ନେଇ ଆନ୍ଦୋଳନ କରି ରାଜରାସ୍ତାକୁ ଓହ୍ଲାଇଛି। ଲୋକଙ୍କ ସରକାର ତଥା ମୁଖ୍ୟମନ୍ତ୍ରୀ ଚାଷ ଓ ଚାଷୀଙ୍କ ପାଇଁ କାର୍ଯ୍ୟ କରୁଥିବା କହୁଛନ୍ତି। ଏବେ ମିଳିତ କୃଷକ ସଂଘର୍ଷର ଦାବିକୁ କେତେଦୂର କାର୍ଯ୍ୟକାରୀ କରୁଛନ୍ତି ତାହା ଦେଖିବାକୁ ବାକି ରହିଲା ବୋଲି ସାଧାରଣରେ ଆଲୋଚନା ହେଉଛି।
