ସଫଳତାର ଅର୍ଥ ବ୍ୟକ୍ତିଠୁ ବ୍ୟକ୍ତି ଭିନ୍ନ ହୋଇଥାଏ। ଏହା ରାତାରାତି ଆସେ ନାହିଁ। ଏଥିପାଇଁ ସ୍ବପ୍ନ ଲୋଡ଼ା, ଯାହା ରାତିରେ ଶୋଇବାକୁ ଦେବ ନାହିଁ। ଏକ ସ୍ପଷ୍ଟ ଦୃଷ୍ଟିଭଙ୍ଗୀ ଉପରେ ଧ୍ୟାନ ଦେବାକୁ ହେବ। ଥକି ପଡ଼ିଲେ ବି କଠିନ ପରିଶ୍ରମ ଜାରି ରଖିବାକୁ ପଡ଼ିବ। ସେମାନଙ୍କୁ ଖୁସି ଦେଲା ଭଳି ନିଜ ପାଇଁ କ୍ୟାରିୟର ବାଛନ୍ତୁ ବୋଲି ଯୁବ ସମାଜକୁ ପରାମର୍ଶ ଦେଇଛନ୍ତି ଉତ୍କଳ ଅଟୋମୋବାଇଲ୍ସ ପ୍ରାଇଭେଟ ଲିଃ ଡାଇରେକ୍ଟର ଶୌନକ ରାଜ ପାରିଖ।
ଆପଣଙ୍କ ବ୍ୟବସାୟ ଉପରେ କି ପ୍ରଭାବ ପକାଇଛି ?
ଆମ ସହ ଜଡ଼ିତ ସମସ୍ତ ଡିଲର, ଡିଷ୍ଟ୍ରିବ୍ୟୁଟର, ସପ୍ଲାୟର ଓ ଅନ୍ଲାଇନ୍ ଗ୍ରାହକଙ୍କ ଉପରେ କୋଭିଡ୍-୧୯ ପ୍ରଭାବ ପକାଇଛି। ଲକ୍ଡାଉନ୍ ସମୟରେ ଦେଶର ଅଟୋମୋବାଇଲ୍ସ ଇଣ୍ଡଷ୍ଟ୍ରି ଦୈନିକ ପ୍ରାୟ ୨,୩୦୦ କୋଟି ଟଙ୍କାର କ୍ଷତି ସହୁଥିଲା। ଏଥିପାଇଁ ଏ କ୍ଷେତ୍ରରେ ପ୍ରାୟ ୩.୪୫ ଲକ୍ଷ ଚାକିରି ହରାଇଛନ୍ତି। ଏହା ବ୍ୟତୀତ ୨୮୬ ଅଟୋ ଡିଲର ଦୋକାନ ପୂରା ବନ୍ଦ କରି ଦେଇଛନ୍ତି। ୨୦୨୦ର ପ୍ରଥମ ତ୍ରୈମାସିକ ଏପ୍ରିଲରୁ ଜୁନ୍ ମଧ୍ୟରେ ଓଡ଼ିଶାରେ ମୋଟରଯାନରୁ ରାଜସ୍ବ ଆଦାୟ ୫୮% କମ୍ ହୋଇଯାଇଥିଲା। କାର୍ଯ୍ୟକାରୀ ପୁଞ୍ଜି ଅଟକି ରହିବାରୁ ମାର୍ଚ୍ଚରେ ବିଏସ୍-IVର ବିକ୍ରି ଆଶାନୁରୂପ ହୋଇ ନ ଥିଲା। ବିଏସ୍ -VI ମଡେଲର ଉତ୍ପାଦନ ଓ ଉପଲବ୍ଧତା ବିଳମ୍ବିତ ହେବାରୁ ବିକ୍ରି ଆହୁରି ହ୍ରାସ ପାଇଥିଲା। ବିଏସ୍ -VI ମୂଲ୍ୟ ବୃଦ୍ଧି ଯୋଗୁ ଏହାର ଚାହିଦା କମିଥିଲା। ଫଳରେ ଡିଲରମାନେ ପ୍ରଭାବିତ ହୋଇଥିଲେ।
ଗ୍ରାହକଙ୍କ କ୍ରୟ ମନୋବୃତ୍ତି ଉପରେ ମତ?
ଗ୍ରାହକଙ୍କ ଆଚରଣ ବଦଳିବାରେ ଲାଗିଛି। ସେମାନଙ୍କ କିଣିବା ନିଷ୍ପତ୍ତିରେ ଡିଜିଟାଲ ମିଡିଆ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି। ଲୋକେ କୌଣସି ଗାଡ଼ି କିଣିବା ପୂର୍ବରୁ ଅନ୍ଲାଇନ୍ରେ ଅନୁଧ୍ୟାନ କରୁଛନ୍ତି। ଏପରି କି ଛୋଟ ଛୋଟ ସହରରେ ବି ଏହା ଘଟୁଛି।
କ୍ଷେତ୍ରରେ ଉତ୍କଳ ହୁଣ୍ଡାଇର ଭିନ୍ନତା କ’ଣ ?
ଆମ ଅଫର୍ ସବୁ ହୁଣ୍ଡାଇ ଗାଇଡ୍ଲାଇନ୍ ଆଧାରିତ। ଷ୍ଟକ୍ ଉପଲବ୍ଧତା ଓ ପ୍ରତିଯୋଗିତାରେ ପ୍ରଚଳିତ ସ୍କିମ୍ ଆଦି ଅନେକ ଦିଗକୁ ବିଚାର କରି ପ୍ରତିମାସରେ ବଦଳିଥାଏ।
ଶିଳ୍ପ ଅନେକ ଅସୁବିଧାର ସମ୍ମୁଖୀନ ହେଉଛି। ସହାୟତା ଲାଗି ସରକାର କି ପଦକ୍ଷେପ ନେବା ଉଚିତ?
ସ୍କ୍ରାପ୍ ନୀତି: କେନ୍ଦ୍ର ସରକାର ସ୍କ୍ରାପେଜ ପଲିସି ସମ୍ପର୍କରେ ସୂଚନା ଦେଇଛନ୍ତି। ଏହା କାର୍ଯ୍ୟକାରୀ ହେଲେ ଚାହିଦା ବଢ଼ିବ।
ଉଚ୍ଚ ଟିକସ ବ୍ୟବସ୍ଥା: ଅଟୋମୋବାଇଲ କ୍ଷେତ୍ରରେ ଅଭିବୃଦ୍ଧିରେ ଅନ୍ୟତମ ମୁଖ୍ୟ ବାଧକ ସାଜୁଛି ଆଫର୍ଡେବିଲିଟି। ବିଭିନ୍ନ କାରଣରୁ ଗାଡ଼ିର ମୂଲ୍ୟ ବୃଦ୍ଧି ଘଟୁଛି, ଯଥା- ସୁରକ୍ଷା ବ୍ୟବସ୍ଥାରେ ଉନ୍ନତି ଓ ନିର୍ଗମନ ମାନ ବୃଦ୍ଧି (ଭାରତ ଷ୍ଟେଜ୍-୬ ନିର୍ଗମନ, ନିୟମ), ୨୮% ଜିଏସ୍ଟି ଭଳି ଉଚ୍ଚ ଟିକସ ହାର, କାର୍ ଉପରେ ସେସ୍ ୩ ରୁ ୪୮% , ଟିସିଏସ୍- ୧%, ରାଜ୍ୟ ସଡ଼କ ଓ ପଞ୍ଜୀକରଣ ଟିକସ ଇତ୍ୟାଦି। ଏସବୁ କାରଣ ମିଶି ଦର ବୃଦ୍ଧି ହେଉଛି, ଯାହାର ସମାଧାନ ଲୋଡ଼ା।
ସୃଷ୍ଟି ଓ ସରକାରୀ ରାଜସ୍ବ
ବୃଦ୍ଧି ଦିଗରେ ଅଟୋମୋବାଇଲ ଡିଲରଙ୍କ
ବଡ଼ ଭୂମିକା ରହିଛି। ତେଣୁ ଆପଣ ରାଜ୍ୟ ସରକାରଙ୍କଠାରୁ
କି ଆଶା ରଖନ୍ତି ?
ଅଟୋମୋବାଇଲ କ୍ଷେତ୍ର ହେଉଛି ଦେଶର ଏକ ପ୍ରମୁଖ ନିଯୁକ୍ତି ସୃଷ୍ଟିକାରୀ ଶିଳ୍ପ। ଏଥିରେ ପ୍ରାୟ ୩୭ ନିୟୁତ ଲୋକ ନିୟୋଜିତ। କିନ୍ତୁ ମହାମାରୀ ଯୋଗୁ ଏଥିରେ କେବଳ ବେକାରି ବଢ଼ିନାହାନ୍ତି, ବରଂ ଡିଲରଶିପ୍ର ସ୍ଥାୟିତ୍ୱ ନେଇ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି। ଶିଳ୍ପର ଖର୍ଚ୍ଚ ପରିଚାଳନାରେ ରାଜ୍ୟ ସରକାରଙ୍କ ବଡ଼ ଭୂମିକା ଥାଏ। ସରକାରଙ୍କ ଟିକସ ବ୍ୟବସ୍ଥା ଅତି ଉଚ୍ଚରେ ରହିଛି। ପେଟ୍ରୋଲ ଟିକସ ଯୋଗୁ କାର୍ କିଣିବା କଷ୍ଟକର ହେଉଛି। କାର୍ କିଣିବା ସାମର୍ଥ୍ୟ ଏକପ୍ରକାର ସରକାରଙ୍କ ଦ୍ୱାରା ନିର୍ଦ୍ଧାରିତ ହେଉଛି। ଏସବୁ କାରଣରୁ ଅଟୋମୋବାଇଲ ଶିଳ୍ପ ପ୍ରଭାବିତ ହେଉଛି। କେନ୍ଦ୍ରଶାସିତ ଅଞ୍ଚଳ ଚଣ୍ଡିଗଡ଼ ସମେତ ଝାଡ଼ଖଣ୍ଡ, ଗୁଜରାଟ ଭଳି କିଛି ରାଜ୍ୟରେ ଜିଏସ୍ଟି ପୂର୍ବରୁ ରୋଡ୍ ଟ୍ୟାକ୍ସ ହିସାବ ହୁଏ। କିନ୍ତୁ ଓଡ଼ିଶାରେ ଏକ୍ସ ଶୋ’ ରୁମ୍ ମୂଲ୍ୟ ଉପରେ ରୋଡ୍ ଟ୍ୟାକ୍ସ ହିସାବ ହୋଇଥାଏ। ଫଳରେ ଯାନ ମୂଲ୍ୟ ବଢ଼ିବା ଦ୍ୱାରା ଗ୍ରାହକଙ୍କ କ୍ରୟ କ୍ଷମତା ପ୍ରଭାବିତ ହେଉଛି। ବିକ୍ରିକୁ ଲକ୍ଷ୍ୟ କଲେ ରୋଡ୍ ଟ୍ୟାକ୍ସ ବଢ଼ାଇ ନ ଥିବା ରାଜ୍ୟଗୁଡ଼ିକରେ ଯାନ ବିକ୍ରି ଅଧିତ୍କ ରହିଥିଲା। ଆମ ସରକାର ଏ ଦିଗରେ ଧ୍ୟାନ ଦେବା ଉଚିତ।
ଡିଲରଶିପ୍ ବ୍ୟବସାୟକୁ ଆସିବା ପାଇଁ କିଭଳି ପ୍ରେରଣା ପାଇଲେ ?
ମୁଁ ଅଟୋମୋବାଇଲ ଶିଳ୍ପରେ ଜନ୍ମ ନେଇଛି ଏବଂ ବଢ଼ିଛି। ଏହି ବ୍ୟବସାୟ ମୋ ରକ୍ତରେ ଅଛି। ଏହାଛଡ଼ା ଏହି ଶିଳ୍ପରେ ବିଭିନ୍ନ ଭୂମିକା, ଜ୍ଞାନ ଓ ଅନୁଭୂତି ମତେ ଏ ବ୍ୟବସାୟକୁ ଆସିବାକୁ ପ୍ରେରିତ କରିଥିଲା।
