କେନ୍ଦୁଝର,୨୩ା୧୧(ସ୍ବ.ପ୍ର.): ଘଷିପୁରା ଥାନା ଅନ୍ତର୍ଗତ ବେଲବାହାଳି ଏନ୍ଏଚ୍ ୨୦ରେ ଗତ ୨୧ ତାରିଖରେ କୁଶେଇ ନଦୀ ଉପରେ ନିର୍ମାଣାଧୀନ ପୋଲର ବିମ୍ ଭୁଶୁଡିବା ଘଟଣାର ତଦନ୍ତ ଏକ ଟେକ୍ନିକାଲ କମିଟି ଦ୍ୱାରା ଯାଞ୍ଚ ଦାବି ହୋଇଛି। ସ୍ଥାନୀୟ ଜିଲା ପରିଷଦ ସଭ୍ୟା ଅସୀମା ମିଶ୍ର ଏହି ଦାବି କରିଛନ୍ତି ା ସେହିପରି ଉକ୍ତ ଘଟଣାରେ ୩ ଜଣ ଶ୍ରମିକ ଆହତ ହୋଇଥିବାରୁ ଶ୍ରମ ବିଭାଗ ପକ୍ଷରୁ ମାମଲା ରୁଜୁ କରି ତଦନ୍ତ ଦାବି କରିଛନ୍ତି। ସେଠାରେ ବାହାର ରାଜ୍ୟର ଶ୍ରମିକ କାମ କରୁଥିବାରୁ ଆନ୍ତଃରାଜ୍ୟ ଶ୍ରମ ଲାଇସେନ୍ସ ଅଛି କି ନାହିଁ ଯାଞ୍ଚ କରିବା ସହ ସେମାନଙ୍କୁ ଉପଯୁକ୍ତ କ୍ଷତିପୂରଣ ଦେବାକୁ ଦାବି କରିଛନ୍ତି। ଏତେ ବଡ଼ ଦୁର୍ଘଟଣା ଘଟିଥିଲେ ହେଁ ପୋଲିସ ପକ୍ଷରୁ କେସ ରୁଜୁ କରି ତଦନ୍ତ କରିବାକୁ ଦାବି କରିଛନ୍ତି। ପୋଲର କଂକ୍ରିଟ ବିମ୍ ଭୁଶୁଡ଼ିବା କାରଣରୁ ଏହାର ପ୍ରଭାବ ସମ୍ପୂର୍ଣ୍ଣ ପୋଲ ଉପରେ ପଡ଼ିଥିବାରୁ ଏହାର ସ୍ଥାୟୀତ୍ୱକୁ ନେଇ ସ୍ଥାନୀୟ ଲୋକ ପ୍ରଶ୍ନ କରିବା ସହ ପୁନଃ ନିର୍ମାଣ ଦାବି କରିଛନ୍ତି। ଏହି ସମ୍ବେଦନଶୀଳ ଘଟଣାକୁ ଚପାଇ ଦେବାକୁ ଉଦ୍ୟମ କରାଯାଉଥିବାରୁ ଏହାର ତଦନ୍ତ କରି ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଦାବି ହୋଇଛି।
