ଛତ୍ରପୁର, ୭।୭ (ଦିଲ୍ଲୀପ ସାମଲ): ଛତ୍ରପୁର ପୌରପରିଷଦ ଅନ୍ତର୍ଗତ ସାନ ଆର୍ଯ୍ୟପଲ୍ଲୀ ଅଞ୍ଚଳରେ ଦିନକୁ ଦିନ ସମୁଦ୍ର କୂଳ କ୍ଷୟ ବଢ଼ି ଚାଲିଥିବାରୁ ଗ୍ରାମବାସୀଙ୍କ ମଧ୍ୟରେ ଭୟ ଓ ଅସନ୍ତୋଷ ବଢ଼ିଛି। ସମୁଦ୍ର ଗାଁର ଅତି ନିକଟକୁ ଆସି ପହଞ୍ଚିଥିବା ବେଳେ ପ୍ରଶାସନ କେବଳ ପ୍ରତିଶ୍ରୁତି ଦେଉଛି, କିନ୍ତୁ ସ୍ଥାୟୀ ପ୍ରତିକାର ପାଇଁ କୌଣସି ଦୃଢ଼ ପଦକ୍ଷେପ ନେଉନଥିବା ଅଭିଯୋଗ କରିଛନ୍ତି ଗ୍ରାମବାସୀ।
ଏହି ପରିପ୍ରେକ୍ଷୀରେ ମଙ୍ଗଳବାର ସାନ ଆର୍ଯ୍ୟପଲ୍ଲୀ ଶ୍ରୀଶ୍ରୀ ମା’ ମୁତ୍ୟାଲୁ ପୋଲାମ୍ମା ଗ୍ରାମ୍ୟ କମିଟି ପକ୍ଷରୁ ଗଞ୍ଜାମ ଜିଲାପାଳ ଭି. କୀର୍ତ୍ତି ଭାସନଙ୍କୁ ଭେଟି ଏକ ଲିଖିତ ଦାବିପତ୍ର ପ୍ରଦାନ କରାଯାଇଛି। ସମୁଦ୍ର କୂଳରେ ତୁରନ୍ତ ପଥର ବନ୍ଧ ନିର୍ମାଣ କରି ଗ୍ରାମକୁ ସୁରକ୍ଷା ଦେବାକୁ ସେମାନେ ଦାବି କରିଛନ୍ତି।
ଦାବିପତ୍ରରେ ଉଲ୍ଲେଖ କରାଯାଇଛି ଯେ, ଆସନ୍ତା ୭ ଦିନ ମଧ୍ୟରେ ପଥର ବନ୍ଧ ନିର୍ମାଣ କାର୍ଯ୍ୟ ଆରମ୍ଭ ନ କରାଗଲେ ଗ୍ରାମବାସୀମାନେ ଆଇନସମ୍ମତ ଭାବେ ଗୋପାଳପୁର ପୋର୍ଟର ମୁଖ୍ୟ ଫାଟକ ସମ୍ମୁଖରେ ବିରାଟ ଗଣଧାରଣା ଓ ଆନ୍ଦୋଳନ କରିବେ। ଆବଶ୍ୟକ ପଡ଼ିଲେ ଗଞ୍ଜାମ ଜିଲାପାଳଙ୍କ କାର୍ଯ୍ୟାଳୟ ଘେରାଉ ଏବଂ ରାଜପଥ ଅବରୋଧ ମଧ୍ୟ କରାଯିବ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି।
ଗ୍ରାମବାସୀଙ୍କ କହିବାନୁସାରେ, ୨୦୦୯ ମସିହାରେ ଗୋପାଳପୁର ପୋର୍ଟର ବ୍ରେକୱାଟର ନିର୍ମାଣ ଆରମ୍ଭ ହେବା ପରଠାରୁ ସମୁଦ୍ର କୂଳର କ୍ଷୟ ବେଗବାନ ହୋଇଛି। ଫଳରେ ସାନ ଆର୍ଯ୍ୟପଲ୍ଲୀ ସମେତ ଆଖପାଖ ଉପକୂଳବର୍ତ୍ତୀ ଗ୍ରାମଗୁଡ଼ିକ ଅସ୍ତିତ୍ୱ ସଙ୍କଟରେ ପଡ଼ିଛି।
ଏହି ସମସ୍ୟାର ସ୍ଥାୟୀ ସମାଧାନ ଦାବିରେ ୨୦୧୭-୧୮ ମସିହାରୁ ଲଗାତାର ଆନ୍ଦୋଳନ ହୋଇଆସୁଥିବା ବେଳେ, ଗତ ୪ ମାର୍ଚ୍ଚ ୨୦୨୫ରେ ଗୋପାଳପୁର ମିଡିଲ୍ ଜେଟିଠାରେ ସାମ୍ବାଦିକ ସମ୍ମିଳନୀ କରାଯାଇଥିଲା। ପରେ ଜୁଲାଇ ୨୦୨୫ରେ ୨୭ଟି ସାମୁଦ୍ରିକ ମତ୍ସ୍ୟଜୀବୀ ଗ୍ରାମକୁ ନେଇ ବିରାଟ ଗଣଆନ୍ଦୋଳନ ମଧ୍ୟ କରାଯାଇଥିଲା।
ସେହି ଆନ୍ଦୋଳନକୁ ସ୍ଥଗିତ କରିବା ପାଇଁ ଜିଲାପ୍ରଶାସନ, ସ୍ଥାନୀୟ ବିଧାୟକ, ଗୋପାଳପୁର ପୋର୍ଟ କର୍ତ୍ତୃପକ୍ଷ ଓ ଗ୍ରାମବାସୀଙ୍କ ମଧ୍ୟରେ ଏକ ଚୁକ୍ତି ହୋଇଥିଲା। ଚୁକ୍ତି ଅନୁଯାୟୀ ପ୍ରତିଦିନ ୨୫ଟି ୧୦ ଚକିଆ ହାଇୱା ଯୋଗେ ପଥର ପକାଇ ସମୁଦ୍ର କୂଳ ସୁରକ୍ଷିତ କରିବାକୁ ନିଷ୍ପତ୍ତି ହୋଇଥିଲା। କିନ୍ତୁ ଅଭିଯୋଗ ଅନୁସାରେ, ପ୍ରତିଦିନ ମାତ୍ର ୨ରୁ ୩ଟି ଗାଡ଼ିରେ ପଥର ଆଣି ପ୍ରାୟ ୧୫ ଦିନ କାମ କରାଯାଇଥିଲା, ଯାହା ସମୁଦ୍ର କୂଳ କ୍ଷୟ ରୋକିବା ପାଇଁ ପର୍ଯ୍ୟାପ୍ତ ନଥିଲା।
ଗ୍ରାମବାସୀଙ୍କ ମତରେ, ଯଦି ତୁରନ୍ତ ସ୍ଥାୟୀ ସୁରକ୍ଷା ବ୍ୟବସ୍ଥା କରାନଯାଏ, ତେବେ ସାନ ଆର୍ଯ୍ୟପଲ୍ଲୀ ସମେତ ଉପକୂଳବର୍ତ୍ତୀ ଗ୍ରାମଗୁଡ଼ିକ ସମୁଦ୍ର ଗର୍ଭରେ ଲୀନ ହେବାର ଆଶଙ୍କା ରହିଛି।
ଜିଲାପାଳଙ୍କୁ ଦାବିପତ୍ର ପ୍ରଦାନ ବେଳେ ଗ୍ରାମ୍ୟ କମିଟିର ସଭାପତି ବି. ସୀମା, ସାଧାରଣ ସମ୍ପାଦକ ବି. ଭୀମସେନ, ଉପସଭାପତି ପି. ଗୁରେୟା, ପୂର୍ବତନ ସାଧାରଣ ସମ୍ପାଦକ ଏମ୍. ଦିଲ୍ଲୀପ, ଯୁବନେତା ଏନ୍. ଦିନବନ୍ଧୁ, ପି. ରାମବାବୁ, କେ. ଦାଶରଥୀ, ଜେ. ଚିନେୟାଙ୍କ ସମେତ ବହୁ ଗ୍ରାମବାସୀ ଉପସ୍ଥିତ ଥିଲେ।
ଏହାସହ ଦାବିପତ୍ରର ନକଲ ଉପଜିଲାପାଳ, ତହସିଲଦାର, ଗଞ୍ଜାମ ଏସ୍ପି, ଏସ୍ଡିପିଓ, ମେରାଇନ୍ ଥାନା ଅଧିକାରୀ ଓ ଗୋପାଳପୁର ପୋର୍ଟ କର୍ତ୍ତୃପକ୍ଷଙ୍କୁ ମଧ୍ୟ ପ୍ରଦାନ କରାଯାଇଛି।
