ନୂଆଦିଲ୍ଲୀ,୩ ।୯: ମନି ଲଣ୍ଡରିଂ ମାମଲାରେ କେତେଜଣ ବଲିଉଡ କଳାକାର ନାଁ ସାମ୍ନାକୁ ଆସିବା ପରେ ଲାଗାତାର ଏହାକୁ ନେଇ ଚର୍ଚ୍ଚା ଜାରି ରହୁଛି । ଜ୍ୟାକଲିନ ଫର୍ନାଡିଜଙ୍କ ପରେ ଦିଲ୍ଲୀ ପୋଲିସର ଇଓଡବ୍ଲ୍ୟୁ(ଆର୍ଥିକ ଅପରାଧ ଶାଖା) ମନି ଲଣ୍ଡରିଂ ମାମଲାରେ ଜେଲରେ ବନ୍ଦଥିବା ସୁକେଶ ଚନ୍ଦ୍ରଶେଖରଙ୍କ ସହ ଜଡିତ ମାମଲାକୁ ନେଇ ଅଭିନେତ୍ରୀ ତଥା ଡ୍ୟାନ୍ସର ନୋରା ଫତେହିଙ୍କୁ ଜେରା କରିଛି । ତେବେ ପଚରା ଉଚରା ସମୟରେ ଦିଲ୍ଲୀ ପୋଲିସ ହାତରେ କି ତଥ୍ୟ ଲାଗିଛି ସେ ସମ୍ପର୍କରେ ଏପର୍ଯ୍ୟନ୍ତ ଜଣାପଡି ନାହିଁ । ସୂଚନାଯୋଗ୍ୟ, ଦିଲ୍ଲୀ ପୋଲିସର କ୍ରାଇମ ବ୍ରାଞ୍ଚ ଅଭିନେତ୍ରୀଙ୍କୁ ଏହି ପଚରାଉଚରା ରାନବାକ୍ସିର ପୂର୍ବତନ ପ୍ରମୋଟରଙ୍କୁ ବେଲ୍ ଦେବା ନାଁରେ ୨୦୦ କୋଟି ଟଙ୍କା ଠକେଇ କରିଥିବା ଅଭିଯୋଗରେ ଅଭିଯୁକ୍ତ ସୁକେଶ ଚନ୍ଦ୍ରଶେଖର ମାମଲାରେ କରାଯାଇଛି ।
ସୂଚନାଯୋଗ୍ୟ, ୨୦୦ କୋଟି ଟଙ୍କା ଠକେଇ କରିଥିବା ଅଭିଯୋଗରେ ସୁକେଶ ଚନ୍ଦ୍ରଶେଖର ଜ୍ୟାକଲିନ ଫର୍ନାଡିଜ, ନୋରା ଫତେହି ଓ ଲିନା ମାରିଆ ସମେତ ବଲିଉଡର କେତେଜଣ ନାମୀ କଳାକାରଙ୍କ ପଛରେ କୋଟି କୋଟି ଟଙ୍କା ଖର୍ଚ୍ଚ କରିଥିଲେ । ଅଭିଯୁକ୍ତ ସୁକେଶ ଏମାନଙ୍କୁ କୋଟି କୋଟି ଟଙ୍କାର ଉପହାର ବି ଦେଇଛନ୍ତି । ଫଳରେ ଏବେ କେତେଜଣ ଅଭିନେତ୍ରୀ ସରକାରୀ ଏଜେନ୍ସିଙ୍କ ଟାର୍ଗେଟକୁ ଆସିଯାଇଛନ୍ତି । ଦିଲ୍ଲୀ ପୋଲିସର ଆର୍ଥିକ ଅପରାଧ ଶାଖା ଏହି ମାମଲାରେ ସର୍ବପ୍ରଥମେ ଏଫଆଇଆର ଦାଖଲ କରିଥିଲା । ଏହାପରେ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ମନି ଲଣ୍ଡରିଂ ମାମଲା ଦାୟର କରିଥିଲା । ଦିଲ୍ଲୀ ପୋଲିସ ଏହି ମାମଲାରେ ଲିନାଙ୍କୁ ବି ଅଭିଯୁକ୍ତ ବୋଲି କହିଛି । ଏବେ ଦିଲ୍ଲୀ ପୋଲିସ ନୋରା ଫତେହିଙ୍କୁ ପଚାରା ଉଚରା କରିଛି । ପୋଲିସ କହିଛି ନୋରା ପାଖାପାଖି ଦିନ ୧୨ଟାରେ ଇଓଡବ୍ଲ୍ୟୁ କାର୍ଯ୍ୟାଳୟରେ ପହଞ୍ଚିଥିଲେ । ଏହି ସମୟରେ ତାଙ୍କୁ ୫୦ରୁ ଅଧିକ ପ୍ରଶ୍ନ ପଚରା ଯାଇଛି ।
