ନୂଆଦିଲ୍ଲୀ: ହରିଶ୍ଚନ୍ଦ୍ରଙ୍କୁ ଦାନବୀର ବୋଲି କୁହାଯାଏ। ହେଲେ ଦିଲ୍ଲୀରେ ଏଭଳି ଜଣେ ଚୋର ଧରାପଡ଼ିଛନ୍ତି, ଯାହାଙ୍କୁ ଦାନବୀରଙ୍କଠାରୁ କମ୍ ନୁହେଁ ବୋଲି କୁହାଯାଉଛି। କଥାଟି ସିନେମା କାହାଣୀ ପରି ଲାଗିଲେ ହେଁ ସତ। ତେବେ ଫରକ ଏତିକି ଲୁଟେରାଜଣଙ୍କ ନିଜସ୍ବ ସ୍ବାର୍ଥ ପାଇଁ ଏଭଳି କରିଆସୁଥିଲେ।
ଦିଲ୍ଲୀଠାରୁ ଆରମ୍ଭ କରି ଦକ୍ଷିଣ ଭାରତର ବିଭିନ୍ନ ସହରରେ ଲୁଟ୍ପାଟ କରୁଥିବା ଜଣେ ଚୋର, ଚୋରି ଟଙ୍କାକୁ ଗରିବ ଲୋକଙ୍କ ମଧ୍ୟରେ ବାଣ୍ଟିଦେଉଥିଲେ। ଏହାକୁ ନେଇ କେହିକେହି ତାଙ୍କୁ ଗରିବଙ୍କ ‘ରବିନ୍ହୁଡ୍’ ବୋଲି କହୁଥିଲେ। ସେ ହେଲେ ମହମ୍ମଦ ଇର୍ଫାନ ଓରଫ ରବିନହୁଡ୍ ଉଜାଲେ। ସେ ନିଜର ଗ୍ରାମ ବିହାରର ସୀତାମଣ୍ଡିରେ ଧନୀବ୍ୟକ୍ତି ଭାବେ ଜଣାଶୁଣା ଥିଲେ। ବିଶେଷକରି ସେ ଆବଶ୍ୟକ ବେଳେ ସମସ୍ତଙ୍କୁ ସହାୟତା କରିବାକୁ ଆଗକୁ ଆସୁଥିଲେ। ସମୟ ସମୟରେ ଗ୍ରାମରେ ହେଲ୍ଥକ୍ୟାମ୍ପ କରି ଲୋକଙ୍କ ସ୍ବାସ୍ଥ୍ୟପରୀକ୍ଷା କରୁଥିଲେ। ଗରିବଙ୍କ ପାଇଁ ଭଗବାନଙ୍କ ଭଳି ଛବି ହେତୁ ୨୦୨୧ରେ ହେବାକୁ ଥିବା ଜିଲା ପରିଷଦ ନିର୍ବାଚନରେ ନିଜ ଅଞ୍ଚଳରୁ ସେ ଲଢ଼ିବାକୁ ଚାହୁଁଥିଲେ। ହେଲେ ପୋଲିସ ହାତରେ ଧରାପଡ଼ିବା ପରେ ସବୁ ଫସର ଫାଟିଛି।
ଅଭିଯୁକ୍ତ କହିଛନ୍ତି, ସେ ନିଜର ସାଥୀଙ୍କ ସହ ମିଶି ୟୁପି, ପଞ୍ଜାବ, ବାଙ୍ଗାଲୋର ଏବଂ ଦିଲ୍ଲୀରେ ଲୁଟ୍ କରୁଥିଲେ। ଯେଉଁ ଘର ବନ୍ଦ ଥିଲା ଅଥବା ଘର ଲୋକ ବାହାରକୁ ଯାଇଥିଲେ ସେମାନଙ୍କୁ ମଉକା ମିଳୁଥିଲା। ନଗଦ ଟଙ୍କା ସହ ସୁନାଗହଣା ମଧ୍ୟ ସେମାନେ ଲୁଟୁଥିଲେ। ଅଞ୍ଚଳର ଲୋକଙ୍କ ମନରେ ସ୍ବତନ୍ତ୍ର ଛାପ ଛାଡ଼ିବା ପାଇଁ ଗରିବଙ୍କୁ ଟଙ୍କା ପଇସା ଦାନ କରୁଥିଲେ। ଏଥିସହ ଗାଡ଼ିର ସଉକ ଥିବା ଯୋଗୁ ସେ ଦୁଇଟି ଦାମୀ କାର୍ କିଣିଥିଲେ ବୋଲି ସେ କହିଛନ୍ତି। ତେବେ ପୋଲିସ ତାଙ୍କ ଗ୍ୟାଙ୍ଗ୍ର ଅନ୍ୟ ୩ଜଣଙ୍କୁ ଗିରଫ କରିଛି। ସେଥିରେ ଜଣେ ମହିଳା ମଧ୍ୟ ଅଛନ୍ତି।
