ନୂଆଦିଲ୍ଲୀ,୧୩।୧: ମଦ ନିଶାରେ ଥିବା ପୋଲିସ କନଷ୍ଟେବଳଙ୍କ ଏସ୍ୟୁଭି ଧକ୍କାରେ ଶନିବାର ରାତିରେ ପ୍ରାଣ ହରାଇଥିଲେ ଜମାଟୋ ଡେଲିଭରୀ ବୟ ସଲିଲ ତ୍ରିପାଠୀ। ତାଙ୍କ ବିୟୋଗରେ ଜମାଟୋ ପ୍ରତିଷ୍ଠାତା ଦୀପିନ୍ଦର ଗୋୟଲ ଦୁଃଖ ପ୍ରକାଶ କରିଛନ୍ତି।
“ଦୁର୍ଭାଗ୍ୟଜନକ ସଡ଼କ ଦୁର୍ଘଟଣା ଡେଲିଭରୀ ପାର୍ଟନର ସଲିଲ ତ୍ରିପାଠୀଙ୍କ ବିୟୋଗରେ ଆମେ ଗଭୀର ମର୍ମାହତ। ଏଭଳି ଦୁଃଖ ସମୟରେ ତାଙ୍କ ପରିବାରକୁ ଆମେ ଯଥା ସମ୍ଭବ ସହଯୋଗ କରୁଛୁ” ବୋଲି ଦୀପିନ୍ଦର ଟୁଇଟ୍ କରିଛନ୍ତି।
ଦୁର୍ଘଟଣା ପରଠୁ ମୃତକଙ୍କ ପରିବାରକୁ ଆମେ ସମସ୍ତ ପ୍ରକାର ସହଯୋଗ କରୁଛୁ। ତାଙ୍କ ପରିବାରବର୍ଗଙ୍କୁ ୧୦ ଲକ୍ଷ ଟଙ୍କାର ବୀମା ରାଶି ପ୍ରଦାନ କରାଯିବ। ମୃତକଙ୍କ ସ୍ତ୍ରୀଙ୍କୁ ଚାକିରି ଦେବାକୁ ଟୁଇଟର ବିବୃତିରେ ପ୍ରତିଶ୍ରୁତି ଦେଇଛନ୍ତି ଜମାଟୋ ପ୍ରତିଷ୍ଠାତା। ତେବେ ମୃତକ ସଲିଲଙ୍କ ସ୍ତ୍ରୀ ସୁଚେତା ତ୍ରିପାଠୀ ଟୁଇଟରରେ ‘ଅନ୍ଧାରରେ ମୋ ଭବିଷ୍ୟତ’ ପୋଷ୍ଟ କରିବା ପରେ ଜମାଟୋ ପ୍ରତିଷ୍ଠାତା ଉକ୍ତ ବିବୃତି ଜାରି କରିଥିଲେ।
ଶନିବାର ରାତିରେ ତ୍ରିପାଠୀ ଫୁଡ୍ ଡେଲିଭର କରିବା ପାଇଁ ରୋହିଣିର ବୁଦ୍ଧ ବିହାର ଅଞ୍ଚଳରେ ଅପେକ୍ଷା କରିଥିବା ବେଳେ ଦ୍ରୁତଗତିରେ ଏସ୍ୟୁଭି ତାଙ୍କୁ ଧକ୍କା ଦେଇଥିଲା। ଘଟଣାସ୍ଥଳରେ ତାଙ୍କ ମୃତ୍ୟୁ ଘଟିଥିଲା। ଏହି ମାମଲାରେ ମଦ୍ୟପ ପୋଲିସ କନେଷ୍ଟବଲଙ୍କୁ ଗିରଫ କରାଯାଇଥିବା ପୋଲିସ ପକ୍ଷରୁ କୁହାଯାଇଛି।
