ପାଟଣା,୨୩ା୧(ସ୍ବ.ପ୍ର.): କେନ୍ଦୁଝର ଜିଲା ସାହାରପଡ଼ା ବ୍ଲକ ଉଦୟପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସାରେ ଜଣେ ପ୍ରସୂତିଙ୍କୁ ଡାକ୍ତରଙ୍କ ଅବହେଳା ଯୋଗୁ ନବଜାତ ଶିଶୁପୁତ୍ରର ମୃତ୍ୟୁର ହୋଇଥିବା ଅଭିଯୋଗ ହୋଇଛି।
ସୂଚନାନୁଯାୟୀ ମୋଉଦୀପା ଗ୍ରାମର ପଙ୍କଜ ନାଏକଙ୍କ ସ୍ତ୍ରୀ ଅନୀତାଙ୍କର ରବିବାର ସନ୍ଧ୍ୟାରେ ପ୍ରସବ ବେଦନା ହେବାରୁ ଉଦୟପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ବିଳମ୍ବିତ ରାତିରେ ପ୍ରସବ ବେଳକୁ ଡାକ୍ତର ଶ୍ୟାମସୁନ୍ଦର ଟୁଡୁଙ୍କୁ ଡାକିବାରୁ ସେ ଆସି ନ ଥିଲେ। ଫଳରେ ପ୍ରସୂତି ସ୍ବାସ୍ଥ୍ୟକେନ୍ଦ୍ରରେ ନବଜାତ ଶିଶପୁତ୍ରକୁ ଜନ୍ମ ଦେବା ପରେ ଶିଶୁପୁତ୍ରଟି ଆଉ ରାହା ଦେଇ ନ ଥିଲା। ଏହାପରେ ବି ଡାକ୍ତର ନ ଆସିବାରୁ ନବଜାତ ଶିଶୁପୁତ୍ରର ମୃତ୍ୟୁ ହୋଇଥିବା ପରିବାର ଲୋକେ ଅଭିଯୋଗ ଆଣିଛନ୍ତି। ତେବେ ସୋମବାର ଏହାକୁ ନେଇ ସ୍ବାସ୍ଥ୍ୟକେନ୍ଦ୍ର ପରିସରରେ ଉତ୍ତେଜନା ପ୍ରକାଶ ପାଇଥିବାରୁ ଡାକ୍ତର ଶ୍ୟାମସୁନ୍ଦର ଟୁଡୁ ଫେରାର ହୋଇ ଯାଇଥିବା ଜଣାପଡ଼ିଛି। ଅନ୍ୟପଟେ ମେଡିକାଲରେ ଡାକ୍ତର ନ ଥିବାରୁ ପ୍ରସୂତିଙ୍କ ମଧ୍ୟ ସ୍ବାସ୍ଥ୍ୟାବସ୍ଥା ଗୁରୁତର ଥିବା ଜଣାପଡ଼ିଛି l ପ୍ରସୂତିଙ୍କୁ ଅନ୍ୟ ମେଡିକାଲକୁ ନେବାକୁ ପରିବାର ଲୋକେ ଚାହୁଁ ଥିଲେ ମଧ୍ୟ ରେଫର କରିବାକୁ ଡାକ୍ତର ନ ଥିବାରୁ ଅନ୍ୟ ମେଡିକାଲକୁ ନେଇ ପାରୁ ନାହାନ୍ତି ବୋଲି ପରିବାର ଲୋକେ କହିଛନ୍ତି।
