ତରଭା,୧୨ା୬(ଡି.ଏନ.ଏ.): ବିଭିନ୍ନ ସମୟରେ ବାହାର ରାଜ୍ୟରେ ଦାଦନ ଶ୍ରମିକଙ୍କ ମୃତ୍ୟୁ ଓ ମରଶରୀର ଫେରିବା ନେଇ ପରିବାର ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳିଛି। ସେଭଳି ଏକ ଦୁଃଖଦ ଘଟଣା ସୁବର୍ଣ୍ଣପୁର ଜିଲା ତରଭା ବ୍ଲକ କମସରା ଫାଣ୍ଡି ଅନ୍ତର୍ଗତ କମସରା ଗ୍ରାମରେ ଘଟିଛି।
ମିଳିଥିବା ସୂଚନା ମୁତାବକ, ଭାଗ୍ୟବାନ୍ତ ତାଣ୍ଡି ପ୍ରାୟ ୧୫ ଦିନ ତଳେ ତାଙ୍କ ସ୍ତ୍ରୀ ରେଶମା ତାଣ୍ଡିଙ୍କ ସହ ଚାରି ବର୍ଷର ପୁଅକୁ ଧରି ତାମିଲନାଡୁର ଏକ କମ୍ପାନୀରେ କାମ କରିବାକୁ ଯାଇଥିଲେ। ସୋମବାର ସକାଳୁ ଭାଗ୍ୟବନ୍ତ କୌଣସି କାରଣରୁ ମୃତ୍ୟୁବରଣ କରିଥିବା ତାଙ୍କ ସମ୍ପର୍କୀୟ ସୁବାସ ବାଘ ପ୍ରକାଶ କରିଛନ୍ତି। ଏହି ସମ୍ପର୍କରେ କମସରା ଫାଣ୍ଡି ଓ ତରଭା ଥାନା ଅଧିକାରୀଙ୍କୁ ପଚାରିବାରୁ ଘଟଣାଟି ସତ୍ୟ ବୋଲି ପ୍ରକାଶ କରିଥିଲେ। ସୁବର୍ଣ୍ଣପୁର ଜିଲା ଶ୍ରମ ଅଧିକାରୀଙ୍କୁ ପଚାରିବାରୁ ଭାଗ୍ୟବନ୍ତ ତାମିଲନାଡୁ ରାଜ୍ୟର କାଞ୍ଚିମପୁରମ ଜିଲା ପଲ୍ଲନୁର ଗ୍ରାମର ଏକ କମ୍ପାନୀରେ କାମ କରୁଥିଲେ। ସକାଳୁ ଅସୁସ୍ଥ ଅନୁଭବ କରିବାରୁ ଭାଗ୍ୟବନ୍ତଙ୍କ ସ୍ତ୍ରୀ ରେଶମା ଚଙ୍ଗଳ ପୁଟୁ ଡାକ୍ତରଖାନାକୁ ନେଇଥିଲେ। ସେଠାରେ ଚିକିତ୍ସାଧିନ ଅବସ୍ଥାରେ ମୃତ୍ୟୁବରଣ କରିଥିବା ଜଣାଯାଇଛି। ସୁବର୍ଣ୍ଣପୁର ଜିଲାପାଳଙ୍କୁ ଅବଗତ କରିବା ପରେ ରାଜ୍ୟ ସରକାରଙ୍କ ସ୍ବାସ୍ଥ୍ୟମନ୍ତ୍ରୀ ନିରଞ୍ଜନ ପୂଜାରୀ ତାମିଲନାଡୁର ଅର୍ଥ ମନ୍ତ୍ରୀଙ୍କ ସହ କଥା ହୋଇଥିଲେ। ମଙ୍ଗଳବାର ମୃତଦେହ ବ୍ୟବଚ୍ଛେଦ ସରିବା ପରେ ପରିବାର ବର୍ଗଙ୍କୁ ହସ୍ତାନ୍ତର କରାଯିବ ବୋଲି ଜିଲା ଶ୍ରମ ଅଧିକାରୀ ଡିଲେଶ୍ୱର ଖାଖା ପ୍ରକାଶ କରିଛନ୍ତି। ମୃତକ ଗରିବ ଶ୍ରେଣୀର ହୋଇ ଥିବାରୁ ପରିବାର ବର୍ଗଙ୍କୁ ସରକାରୀ ସହାୟତା ଯୋଗାଇ ଦେବାକୁ ଦାବି ହେଉଛି l
