ବନ୍ତଳା,୧୫।୧୦(ବ୍ୟୁରୋ): ରାତିରେ ଫସଲକୁ ଜଗିବା ପାଇଁ କ୍ଷେତରେ ମଞ୍ଚ ଉପରେ ଶୋଇଥିଲେ। ଅଧରାତିରେ ହଠାତ୍ ମୃତ୍ୟୁ ରୂପେ ପହଞ୍ଚିଥିଲା ହାତୀ। ହାତୀ ଦଳି ଦେବାରୁ କ୍ଷେତରେ ଫସଲ ଜଗିଥିବା ପ୍ରକାଶ ସାହୁ(୪୭)ଙ୍କ ମୃତ୍ୟୁ ହୋଇଛି। ଅନୁଗୁଳ ରେଞ୍ଜ କୋଟ ଥାନା ମାଣିକ ଯୋଡ଼ି ପଞ୍ଜାୟତ କୁଲୁସର ଗ୍ରାମରେ ଗୁରୁବାର ରାତିରେ ଘଟିଛି ଏଭଳି ଘଟଣା। ଘଟଣା ବେଳେ ମୃତକଙ୍କ ସହ ଫସଲ ଜଗି ଥିଲେ ପ୍ରମୋଦ ସାହୁ (୫୦) ଓ ଚୌଧୁରୀ ସାହୁ (୩୫)। ସେମାନେ ଜୀବନ ବଞ୍ଚାଇ ଘଟଣାସ୍ଥଳରୁ ଦୌଡ଼ି ପଳାଇଥିଲେ।
ଗ୍ରାମବାସୀମାନେ ମୃତଦେହକୁ କ୍ଷେତରେ ସକାଳ ପର୍ଯ୍ୟନ୍ତ ଜଗି ବସିଥିଲେ। ଶୁକ୍ରବାର ସକାଳେ ଏସିଏଫ୍ ରଞ୍ଜନ କୁମାର ବେହେରା, ଫରେଷ୍ଟର ଉଚ୍ଛବ ପ୍ରଧାନ ଓ ପୁରୁଣା କୋଟା ଥାନା ଅଧିକାରୀ ପହଞ୍ଚି ମୃତଦେହକୁ ଉଦ୍ଧାର କରିଥିଲେ।
