ବଞ୍ଚୋ/ହାଟଡିହୀ, (ପ୍ରଦୋଷ ବିଶ୍ୱାଳ/ଶୁଭକାନ୍ତ ନାୟକ ): କେନ୍ଦୁଝର ଜିଲା ରାମଚନ୍ଦ୍ରପୁର ଥାନା ଅଞ୍ଚଳରେ ଜଣେ ଅଟୋ ଚାଳକଙ୍କୁ ରାସ୍ତାରେ ଅଟକାଇ ମରଣାନ୍ତକ ଆକ୍ରମଣ କରିବା ସହ ଲୁଟ୍ ମାମଲାରେ ପୋଲିସ ଜଣେ ଅଭିଯୁକ୍ତକୁ ଗିରଫ କରିଛି। ଗିରଫ ଅଭିଯୁକ୍ତ ଜଣକ ହେଲେ ମଦନପୁର ଗ୍ରାମର ପଦନ ଜେନାଙ୍କ ପୁଅ ସତ୍ୟାନନ୍ଦ ଜେନା (୩୮)। ପୋଲିସ ଭୟରେ ସେ ଫେରାର ଥିବା ବେଳେ ଗୁରୁବାର ରାମଚନ୍ଦ୍ରପୁର ପୋଲିସ ତାଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଆନନ୍ଦପୁର ଏସଡିପିଓ କମଳ କୁମାର ପଣ୍ଡା ସୂଚନା ଦେଇଛନ୍ତି।
ଏସଡିପିଓ ଶ୍ରୀ ପଣ୍ଡାଙ୍କ ସୂଚନା ଅନୁଯାୟୀ, କୁମ୍ଭନଗର ଗ୍ରାମର ପ୍ରହଲ୍ଲାଦ ବେହେରାଙ୍କ ପୁଅ ବିଭୂତି ବେହେରା (୨୧) ଗତ ଜୁନ୍ ୨୧ ତାରିଖ ରାତି ପ୍ରାୟ ୯ଟା ସମୟରେ ବାତୋ ବଜାରରୁ ନିଜ ଅଟୋ ନେଇ ଘରକୁ ଫେରୁଥିଲେ। ଏହି ସମୟରେ ରାସ୍ତାରେ ଅଭିଯୁକ୍ତ ସତ୍ୟାନନ୍ଦ ତାଙ୍କୁ ଅଟକାଇଥିଲା। ସେ ବିଭୂତିଙ୍କୁ ଅତ୍ୟନ୍ତ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ଜୀବନରୁ ମାରିଦେବାକୁ ଭୟପୂର୍ଣ୍ଣ ଧମକ ଦେଇଥିଲା।
ଏତିକିରେ ଅଭିଯୁକ୍ତର ମନ ଶାନ୍ତ ହୋଇ ନ ଥିଲା। ସେ ବିଭୂତିଙ୍କୁ ଜୋର ଜବରଦସ୍ତ ମରଣାନ୍ତକ ଆକ୍ରମଣ କରିବା ସହ ତାଙ୍କ ଅଟୋ ଚାବି ଏବଂ ମୋବାଇଲ୍ ଫୋନ୍ ଛଡ଼ାଇ ନେଇଥିଲା। ସତ୍ୟାନନ୍ଦଙ୍କ ଘନ ଘନ ଆକ୍ରମଣ ଯୋଗୁ ବିଭୂତିଙ୍କ ବାମ ହାତ ଭାଙ୍ଗି ଯାଇଛି।
ଏହି ବର୍ବରୋଚିତ ଘଟଣା ନେଇ ପୀଡ଼ିତ ବିଭୂତି ବେହେରାଙ୍କ ଅଭିଯୋଗକୁ ଆଧାର କରି ରାମଚନ୍ଦ୍ରପୁର ଥାନାରେ ଏକ ମାମଲା (ନଂ ୧୯୮/୨୦୨୬) ରୁଜୁ କରାଯାଇଥିଲା। ପୋଲିସ ଘଟଣାର ତଦନ୍ତ କରି ଫେରାର ଥିବା ଅଭିଯୁକ୍ତ ସତ୍ୟାନନ୍ଦକୁ ଗୁରୁବାର ଗିରଫ କରିବାରେ ସଫଳ ହୋଇଛି।
