ରାୟଗଡ଼ା,୨୬।୩(ସ୍ବ.ପ୍ର.): ରାୟଗଡ଼ା ଜିଲା କଲ୍ୟାଣସିଂହପୁର ବ୍ଲକ ମହକୁମାସ୍ଥିତ ଐତିହାସିକ ଶୈବପୀଠ ଦେବଗିରି ପାହାଡ଼ରୁ ପୋଲିସ ରବିବାର ଜଣେ ଛାତ୍ରୀଙ୍କ ମୃତଦେହ ଉଦ୍ଧାର କରିଛି। ମୃତା ଛାତ୍ରୀ ହେଲେ ବିରେନ ଗୌଡ଼ଙ୍କ ଝିଅ ଦେବକୀ। ତାଙ୍କ ଘର କାଶୀପୁର ବ୍ଲକ ସୁଙ୍ଗେର ଗ୍ରାମରେ। ସେ କଲ୍ୟାଣସିଂହପୁରସ୍ଥିତ ଦେବଗିରି ମହାବିଦ୍ୟାଳୟରେ ଯୁକ୍ତ ୩ ପ୍ରଥମ ବର୍ଷରେ ପଢୁଥିଲେ।
ମିଳିଥିବା ସୂଚନା ମୁତାବକ, କାଶୀପୁର ବ୍ଲକ ସୁଙ୍ଗେର ଗ୍ରାମର ଗୋଟିଏ ପରିବାରର ତିନି ଭାଇଙ୍କ ୩ ଝିଅ କଲ୍ୟାଣସିଂହପୁରରେ ରହି ମହାବିଦ୍ୟାଳୟରେ ପଢୁଥିଲେ। ହେଲେ ବୁଧବାର ଦେବକୀ ତାଙ୍କ ଦାଦାଝିଅ ତଥା ଦୁଇ ଭଉଣୀଙ୍କୁ ଜୀବନ ହାରିଦେବାକୁ କହିଥିଲେ। ଏପରିକି ସେ ପରିବାର ଲୋକଙ୍କୁ ମଧ୍ୟ ଏଭଳି ଏକ ମେସେଜ୍ କରିଥିଲେ।
ଏଭଳି ସ୍ଥିତିରେ ଗୁରୁବାର ଦେବକୀଙ୍କୁ ନ ପାଇ ଦୁଇ ଭଉଣୀ ପରିବାର ଲୋକଙ୍କୁ ଘଟଣା ସଂକ୍ରାନ୍ତରେ ଜଣାଇଥିଲେ। ଖବର ପାଇ ପରିବାର ଲୋକେ ପହଞ୍ଚତ୍ ଖୋଜାଖୋଜି କରିଥିଲେ। ସେତିକିବେଳେ ପାହାଡ଼ରୁ ପ୍ରଥମେ ଦେବକୀଙ୍କ ଚପଲ ପାଇଥିଲେ। ହେଲେ ତାଙ୍କୁ ପାଇ ନ ଥିଲେ। ଦୁଇଦିନ ଖୋଜିବା ପରେ ମଧ୍ୟ ଦେବକୀଙ୍କ କୌଣସି ପତ୍ତା ମିଳି ନ ଥିଲା। ରବିବାର ପୁଣି ଦେବଗିରି ପାହାଡ଼ ଉପରେ ପରିବାର ଲୋକେ ଖୋଜାଖୋଜି କରିଥିଲେ। ସେଠାରେ ଥିବା ଏକ ଜଳକୁଣ୍ଡରେ ଦେବକୀଙ୍କ ମୃତଦେହ ଭାସୁଥିବା ଦେଖିବାକୁ ପାଇଥିଲେ। ଏପରି କି ଓଢ଼ଣିରେ ପ୍ରାୟ ୫ କିଲୋ ଓଜନର ଏକ ପଥର ବନ୍ଧାହୋଇ ତାଙ୍କ ମୃତଦେହରେ ଝୁଲୁଥିବା ଦେଖିବାକୁ ମିଳିଥିଲା। ଏନେଇ କଲ୍ୟାଣସିଂହପୁର ଥାନାକୁ ଖବର ଦେଇଥିଲେ। ଖବର ପାଇ ଥାନା ଅଧିକାରୀ ମୁକୁନ୍ଦଦେବ ନାୟକ, ଏସ୍ଆଇ ଶିବ ପ୍ରସାଦ ସାହୁ ଘଟଣାସ୍ଥଳରେ ପହଞ୍ଚି ଅଗ୍ନିଶମ ବିଭାଗକୁ ଖବର ଦେଇଥିଲେ। ଅଗ୍ନିଶମ କର୍ମଚାରୀ ପହଞ୍ଚି ଜଳକୁଣ୍ଡରୁ ମୃତଦେହ ଉଦ୍ଧାର କରିଥିଲେ। ଏନେଇ ପୋଲିସ ଏକ ଅପମୃତ୍ୟୁ ମାମଲା ରୁଜୁକରି ତଦନ୍ତ ଚଳାଇଛି। ପରେ ରାୟଗଡ଼ା ଏସ୍ଡିପିଓ ଦେବଜ୍ୟୋତି ଦାସ ପହଞ୍ଚତ୍ ଘଟଣାର ତଦନ୍ତ ଆରମ୍ଭ କରିଛନ୍ତି।
