ପାଟନା,୯ା୧୨: ବିହାରର ମୋତିହାରୀରେ ଜଣେ ନାବାଳକଙ୍କୁ ହତ୍ୟା କରାଯାଇଛି। ନାବାଳକଙ୍କ ମୃତଦେହ ତାଙ୍କ ପ୍ରେମିକାଙ୍କ ଘରେ ଝୁଲୁଥିବା ଦେଖିବାକୁ ମିଳିଥିଲା। ମୃତଦେହ ଉଦ୍ଧାର ପରେ ଗାଁରେ ଏହି ଖବର ପ୍ରଚାରିତ ହୋଇଥିଲା। ଏହି ଘଟଣାଟି ପୂର୍ବ ଚମ୍ପାରଣ ଜିଲା ଘୋଡ଼ାସହାନ ଥାନା ଘୁମନଗର ଅଞ୍ଚଳରେ ଘଟିଛି। ଝୁଲନ୍ତା ଅବସ୍ଥାରେ ଜଣେ ନାବାଳକଙ୍କ ମୃତଦେହ ପୋଲିସ ଉଦ୍ଧାର କରିଥିବା କହିଛି। ମୃତକ ଜଣକ ହେଲେ ରାଜବଂଶୀ ଯାଦବଙ୍କ ୧୬ ବର୍ଷର ପୁଅ ସନ୍ନି କୁମାର।
ସନ୍ନି ସେହି ଗାଁର ଜଣେ ଝିଅକୁ ପ୍ରେମ କରୁଥିଲେ। ବିଳମ୍ବିତ ରାତିରେ ଖାଇ ସାରିବା ପରେ ସନ୍ନି ଘର ହଲ୍ରେ ଶୋଇବାକୁ ଯାଇଥିଲେ। କିନ୍ତୁ ତା’ ପରଦିନ ପଡ଼ୋଶୀଙ୍କ ଘରୁ ତାଙ୍କ ମୃତଦେହ ମିଳିଥିଲା। ମୃତଦେହ ଏକ ବନ୍ଦ କୋଠରିରେ ଝୁଲୁଥିବା ଦେଖିବାକୁ ମିଳିଥିଲା।
ସନ୍ନି ତାଙ୍କ ପ୍ରେମିକାଙ୍କ ଶୋଇବା ଘରେ ପହଞ୍ଚିଥିଲେ। ଯାହାକୁ ପ୍ରେମିକାଙ୍କ ମା’ ଦେଖିଥିଲେ। ଏହା ପରେ କୋଠରି ବାହାରେ ତାଲା ପକାଇ ଦେଇଥିଲେ। ପରଦିନ ସକାଳୁ ମୃତଦେହ କୋଠରିରେ ଝୁଲୁଥିବା ଦେଖିବାକୁ ମିଳିଥିଲା।
ଏହି ଘଟଣା ପରେ ପ୍ରେମିକାଙ୍କ ପରିବାରର ସମସ୍ତ ସଦସ୍ୟ ଘରୁ ପଳାଇ ଯାଇଛନ୍ତି। ଏସ୍ପି ଡକ୍ଟର କୁମାର ଆଶିଷ କହିଛନ୍ତି, ମୃତଦେହ ଉଦ୍ଧାର କରିବା ପରେ ପୋଲିସ ସାଇଣ୍ଟଫିକ୍ ତଦନ୍ତ କରୁଛି। ପୋଷ୍ଟମର୍ଟମ ରିପୋର୍ଟ ଆସିବା ପରେ ହିଁ ହତ୍ୟା କିମ୍ବା ଆତ୍ମହତ୍ୟା ତାହା ପ୍ରକାଶ ପାଇବ। ଯଦିଓ ମୃତକଙ୍କ ଶରୀରରେ କୌଣସି କ୍ଷତ ମିଳିନାହିଁ। ଅନ୍ୟପଟେ ମୃତକଙ୍କ ମା’ କହିଛନ୍ତି, ତାଙ୍କର କାହା ସହିତ ଶତ୍ରୁତା ନାହିଁ। ତେବେ ତଦନ୍ତ ଜାରି ରହିଛି।
