ମୁମ୍ବାଇ/ନୂଆଦିଲ୍ଲୀ,୯ ।୧୨: ଶ୍ରଦ୍ଧା ୱାଲକର ହତ୍ୟା ମାମଲାରେ ଅଭିଯୁକ୍ତ ଆଫତାବ ଅମିନ ପୁନାୱାଲାଙ୍କୁ ଦିଲ୍ଲୀ ପୋଲିସ କୋର୍ଟରେ ହାଜର କରାଇଛି । ସେ ଭିଡିଓ କନଫରେନ୍ସ ଜରିଆରେ ଉପସ୍ଥିତ ହୋଇଥିଲେ । ଏହି ସମୟରେ ଦିଲ୍ଲୀ ପୋଲିସର ତୃତୀୟ ବାଟାଲିୟନ ନିକଟରେ ସୁରକ୍ଷାର ସମସ୍ତ ଦାୟିତ୍ୱ ଦିଆଯାଇଥିଲା । ଏହାରି ଭିତରେ ଶ୍ରଦ୍ଧା ୱାଲକରଙ୍କ ପିତା ବିକାଶ ୱାଲକର ମହାରାଷ୍ଟ୍ର ଉପ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନଭିସଙ୍କୁ ଭେଟିଛନ୍ତି । ଏତିକି ବେଳେ ସେ ଉପ ମୁଖ୍ୟମନ୍ତ୍ରୀଙ୍କୁ କହିଛନ୍ତି ଅଭିଯୁକ୍ତ ଆଫତାବ ଅମିନ ପୁନାୱାଲାଙ୍କୁ ଖୁବଶୀଘ୍ର କଠୋର ଦଣ୍ଡ ଦିଆଯାଉ ।
ଶ୍ରଦ୍ଧାଙ୍କ ପିତାଙ୍କ ସହ ତାଙ୍କ ପରିବାର ସଦସ୍ୟ ବି ମହାରାଷ୍ଟ୍ର ଉପ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିଶଙ୍କୁ ସାକ୍ଷାତ୍ କରିଛନ୍ତି । ଏହି ସମୟରେ ଏମାନଙ୍କ ସହ ଭାଜପା ନେତା କିରିଟ ସୌମୌୟା ବି ଉପସ୍ଥିତ ଥିଲେ । ପ୍ରେସ୍ କନଫରେନ୍ସ ସମୟରେ ଶ୍ରଦ୍ଧାଙ୍କ ପିତା କହିଛନ୍ତି ଦିଲ୍ଲୀର ଉପରାଜ୍ୟପାଳ, ମହାରାଷ୍ଟ୍ର ଉପ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିଶ ଓ ଦିଲ୍ଲୀ ପୋଲିସ ସମସ୍ତଙ୍କ ନିକଟରୁ ତାଙ୍କୁ ନ୍ୟାୟ ମିଳିବ ବୋଲି ଭରସା ଦିଆଯାଇଛି । ଶ୍ର୍ଦ୍ଧାଙ୍କ ପିତା ବିକାଶ ୱାଲକର ମିଡିଆ ସହ କଥା ହେବା ସମୟରେ ବସଇ ପୋଲିସ ଉପରେ ଗୁରୁତର ଅଭିଯୋଗ ଆଣିଛନ୍ତି । ସେ କହିଛନ୍ତି ବସଇ ପୋଲିସ ଯଦି ତାଙ୍କୁ ସାହାଯ୍ୟ କରିଥାଆନ୍ତା ତେବେ ଆଜି ହୁଏତ ତାଙ୍କ ଝିଅ ବଞ୍ଚିଯାଇଥାଆନ୍ତେ ।
