ସିମୁଳିଆ, ୩୦।୧୦(ସନ୍ତୋଷ ନାୟକ): ଗୁରୁବାର ରାତିରୁ ଶୁକ୍ରବାର ଅପରାହ୍ନ ପର୍ଯ୍ୟନ୍ତ ବାତ୍ୟା ‘ଦାନା’ର ତାଣ୍ଡବ ଜାରି ରହିବା ପରେ ଥମିଯାଇଥିଲା। ତେବେ ବାତ୍ୟା ଛାଡ଼ିଯିବା ପରେ ମଧ୍ୟ ଜନସାଧାରଣଙ୍କ ଦୁର୍ଦ୍ଦଶା ସରିନାହିଁ। ବାତ୍ୟାରେ ସିମୁଳିଆ ବ୍ଲକରେ ହଜାର ହଜାର ଗଛ ନଷ୍ଟ ହୋଇଛି। ରାସ୍ତାରେ ପଡିଥିବା ଗଛଗୁଡ଼ିକୁ ପ୍ରଶାସନ କାଟି ହଟାଇ ଦେଇଥିଲେ ହେଁ ଗ୍ରାମାଞ୍ଚଳର ବିଭିନ୍ନ ଘର ଓ ବାଡିରେ ଗଛଗୁଡ଼ିକ ପଡିରହିଛି। ମଇତାପୁର ପଞ୍ଚାୟତର ସରକାରୀ ଉଚ୍ଚ ପ୍ରାଥମିକ ଝାଟିଆ ବିଦ୍ୟାଳୟ ପରିସର ରାସ୍ତାରେ ଉପୁଡିପଡିଥିବା ୩ଟି ବିରାଟକାୟ ଝାଉଁଗଛ ଯୋଗୁ ଛାତ୍ରୀଛାତ୍ର ଅସୁବିଧାର ସମ୍ମୁଖୀନ ହେଉଛନ୍ତି। ଗୁରୁବାର ରାତିରୁ ଅଦ୍ୟାବଧି ସମଗ୍ର ବ୍ଲକରେ ବିଦ୍ୟୁତ ସେବା ଉପଲବ୍ଧ ହୋଇପାରିନାହିଁ। ଏ ସମ୍ପର୍କରେ ବିଦ୍ୟୁତ ଉପଖଣ୍ଡ ଅଧିକାରୀ ପ୍ରତାପ କୁମାର ବେହେରାଙ୍କୁ ପଚାରିବାରୁ ଗତ ବାତ୍ୟାରେ ସମଗ୍ର ବ୍ଲକର ୨୮ହଜାର ଉପଭୋକ୍ତା ପ୍ରଭାବିତ ହୋଇଛନ୍ତି। ୨୨ଟି ପଞ୍ଚାୟତରେ ୩୨ଟି ଟ୍ରାନ୍ସଫର୍ମର ଅଚଳ ହୋଇପଡିଥିବା ବେଳେ ୩୫୫ଟି ବିଦ୍ୟୁତଖୁଣ୍ଟ ଭାଙ୍ଗିଛି। କେନ୍ଦୁଝର, ବରଗଡ, ବାରିପଦା, ସମ୍ବଲପୁର, ଚଣ୍ଡିଖୋଲ ଓ ସୁନ୍ଦରଗଡର ବିଦ୍ୟୁତ ଟିମ୍ର ୩୮୦ଜଣ କର୍ମଚାରୀ ଦିନରାତି ନିୟୋଜିତ ଅଛନ୍ତି। ଦୈନନ୍ଦିନ ଜୀବନରେ ବିଦ୍ୟୁତସେବା ଅତ୍ୟନ୍ତ ଅପରିହାର୍ଯ୍ୟ ହୋଇପଡ଼ିଥିବା ବେଳେ ଯୁଦ୍ଧକାଳୀନ ଭିତ୍ତିରେ ସମସ୍ତ ଉପଭୋକ୍ତାଙ୍କୁ ବିଦ୍ୟୁତ ସେବା ଯୋଗାଇ ଦିଆଯିବ ବୋଲି ସେ କହିଛନ୍ତି । ସେହିପରି ସିମୁଳିଆ ବ୍ଲକରେ ୧୩ହଜାର ୭ଶହ ଜମି ଚାଷ ହୋଇଥିବା ବେଳେ ୨୯ଶହ ୯୭ ହେକ୍ଟର ପବନମାଡ ଓ ୨ହଜାର ୯୭ହେକ୍ଟର ଜଳରେ ବୁଡି ରହି କ୍ଷତିଗ୍ରସ୍ତ ହୋଇ ଥିବାର କୃଷି ଅଧିକାରିଣୀ ବିପି ରୋଜାଲିନ ସୂଚନା ଦେଇଛନ୍ତି। ବିଭିନ୍ନ ଅଞ୍ଚଳର ଆରଆଇମାନେ ଗ୍ରାମାଞ୍ଚଳରେ ବୁଲି ଭାଙ୍ଗିଥିବା ମାଟି ଘରଗୁଡ଼ିକର ତଦନ୍ତ କରୁଥିଲେ ହେଁ ଅଦ୍ୟାବଧି ଏହାର ରିପୋର୍ଟ ଆସିପାରିନାହିଁ।
