ମୁମ୍ବାଇ,୧୬।୧୨: ଚଳିତ ବର୍ଷ ଅଗଷ୍ଟରେ ଅନ୍ତର୍ଜାତୀୟ ଓ ଫ୍ରାଞ୍ଚାଇଜ କ୍ରିକେଟରୁ ଅବସର ନେଇସାରିଥିବା ଡେଲ ଷ୍ଟେଇନଙ୍କୁ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ରେ ନୂଆ ଦାୟିତ୍ୱ ମିଳିବାକୁ ଯାଉଛି। ତାଙ୍କୁ ବୋଲିଂ କୋଚ୍ ଭାବେ ନିଯୁକ୍ତ କରିବାକୁ ଯାଉଛି ସନରାଇଜର୍ସ ହାଇଦ୍ରାବାଦ୍ (ଏସ୍ଆର୍ଏଚ୍)। ଏ ସମ୍ପର୍କରେ ଆସନ୍ତା ସପ୍ତାହରେ ଆଇପିଏଲ ଫ୍ରାଞ୍ଚାଇଜ ପକ୍ଷରୁ ବିଧିବଦ୍ଧ ଘୋଷଣା କରାଯାଇପାରେ ବୋଲି ଆଶା କରାଯାଉଛି।
ନିଜ ସମୟରେ ଅନ୍ୟତମ ଶ୍ରେଷ୍ଠ ପେସର ବିବେଚିତ ହେଉଥିବା ଷ୍ଟେଇନ ୯୩ ଟେଷ୍ଟରେ ୪୩୯ ଉଇକେଟ ନେଇଥିଲେ। ପୂର୍ବତନ ଦକ୍ଷିଣ ଆଫ୍ରିକୀୟ ଖେଳାଳି ଟମ୍ ମୁଡିଙ୍କ ସହ କାର୍ଯ୍ୟ କରିବେ, ଯିଏକି ଫ୍ରାଞ୍ଚାଇଜର ମୁଖ୍ୟ କୋଚ୍ ଦାୟିତ୍ୱରେ ଅଛନ୍ତି। କ୍ୟାରିୟରରରେ ୧୨୫ ଦିନିକିଆ (୧୯୬ ଉଇକେଟ) ଓ ୪୭ ଟି୨୦ (୬୪ ଉଇକେଟ) ଖେଳିଥିବା ଷ୍ଟେଇନ ଆଇପିଏଲରେ ଡେକାନ ଚାର୍ଜର୍ସ, ସନରାଇଜର୍ସ ହାଇଦ୍ରାବାଦ, ଗୁଜରାଟ ଲାୟନ୍ସ ଓ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପାଇଁ ଖେଳିଥିଲେ। ତାଙ୍କ ପକ୍ଷରୁ କୌଣସି ସ୍ପଷ୍ଟ ସୂଚନା ମିଳିନାହିଁ। କିନ୍ତୁ ତାଙ୍କ ସହ ପୂର୍ବତନ ଭାରତୀୟ ଅଲରାଉଣ୍ଡର ହେମଙ୍ଗ ବଦାନି ମଧ୍ୟ ହାଇଦ୍ରାବାଦ୍ କୋଚିଂ ଷ୍ଟାଫରେ ସାମିଲ ହୋଇପାରନ୍ତି ବୋଲି ଆଇପିଏଲ ଅଧିକାରୀ ସୂଚନା ଦେଇଛନ୍ତି।
