କୋକସରା୨୮।୭(ଡି.ଏନ୍.ଏ): କାମ ଧନ୍ଧା ନ ପାଇ କର୍ନାଟକକୁ ଦାଦନ ଖଟିବାକୁ ଯାଇ ଜଣେ ଶ୍ରମିକଙ୍କ ସନ୍ଦେହ ଜନକ ଅବସ୍ଥାରେ ମୃତ୍ୟୁ ଘଟିଛି। ସେ ହେଲେ କଳାହାଣ୍ଡି ଜିଲା କୋକସରା ବ୍ଲକ ଆମପାଣି ଥାନା ବରାଡଙ୍ଗା ଗାଁର ଗୋବିନ୍ଦ ଚଲାନଙ୍କ ସାନପୁଅ ନିଧି ଚାଲାନ(୨୦)। କର୍ନାଟକ ପୋଲିସ ମୃତଦେହ ବ୍ୟବଚ୍ଛେଦ ପରେ ଏକ ଆମ୍ବୁଲାନ୍ସ ଯୋଗେ ଗାଁକୁ ପଠାଇଛି। ବୁଧବାର ରାତିରେ ନିଧିଙ୍କ ମୃତଦେହ ଗାଁ ପହଞ୍ଚିଛି। ରୋଜଗାର କ୍ଷମ ପୁଅକୁ ହରାଇ ପରିବାର ଲୋକେ ଭାଙ୍ଗି ପଡିଛନ୍ତି। ତେବେ ଆମ୍ବୁଲାନ୍ସକୁ ଅଟକ ରଖି ପରିବାର ଲୋକେ କ୍ଷତିପୂରଣ ଦାବି କରିଛନ୍ତି। ଖବର ପାଇ ଆମପାଣି ଥାନା ପୋଲିସ ପହଞ୍ଚି ପରିବାର ଲୋକଙ୍କୁ ବୁଝାଶୁଝା କରିଥିଲା। ହେଲେ କ୍ଷତିପୂରଣ ଦାବିରେ ପରିବାର ଲୋକେ ଜିଦ୍ ଧରି ବସିଛନ୍ତି।
ସୂଚନା ଯୋଗ୍ୟ, ନିଧି ଗତ ୩ ମାସ ତଳେ ସ୍ତ୍ରୀ ହୀରା ଚଲାନ ଓ ୩ ବର୍ଷର ପୁଅକୁ ଛାଡି ଦାଦନ ଖଟିବାକୁ କାର୍ନାଟକ ଯାଇଥିଲେ। ସୋମବାର ନିଧିଙ୍କ ମୃତଦେହ କାମ କରୁଥିବା କମ୍ପାନୀ ପରିସରର ଏକ ନିମ୍ବ ଗଛରେ ଝୁଲୁଥିବା ଦେଖବାକୁ ମିଳିଥିଲା। ଏନେଇ କମ୍ପାନୀ କର୍ତ୍ତୃପକ୍ଷ ପରିବାର ଲୋକଙ୍କୁ ଜଣାଇଥିଲେ।
