ପଟ୍ଟାଙ୍ଗୀ,୧୩।୨(ଡି.ଏନ୍.ଏ.): କୋରାପୁଟ ଜିଲା ପଟ୍ଟାଙ୍ଗୀ ଥାନା ଅନ୍ତର୍ଗତ ପୁକାଲି ସଦର ପଞ୍ଚାୟତରେ ବସବାସ କରୁଥିବା ୧୦ଟି ପରିବାରଙ୍କୁ ଅତର୍କିତ ଆକ୍ରମଣ ଘଟଣାର ଏଯାଏ ପୋଲିସ ତଦନ୍ତ କରୁନାହିଁ। ଏନେଇ ଥାନାରେ ଲିଖିତ ଅଭିଯୋଗ ହୋଇଥିଲେ ମଧ୍ୟ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିବା ବଦଳରେ ଚୁପ୍ ହୋଇ ବସିଛି। ଫଳରେ ଏନେଇ ଅଭିଯୋଗକାରୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ଖବରରୁ ଜଣାପଡିଛି ଜାନୁୟାରୀ ୧୨ରେ କେତେକ ଯୁବକ ପୁକାଲି ପଞ୍ଚାୟତ ମାଳିଗୁଡା ଗ୍ରାମରେ ହେଉଥିବା ଏକ ବାହାଘର କାର୍ଯ୍ୟରେ ଯୋଗ ଦେଇଥିଲେ । ସେମାନଙ୍କ ମଧ୍ୟରୁ ୨ଜଣ ଯୁବକ ପଞ୍ଚାୟତ ସଦର ମହକୁମାରେ ବସବାସ କରୁଥିବା ଟିପି ସିମାଞ୍ଚଳ ରାଜୁଙ୍କ ଦୋକାନରେ ପହଞ୍ଚତ୍ କିଛି କାରଣ ନ ଥାଇ ଦୋକାନର ଆସବାବପତ୍ର ଫିଙ୍ଗା ଫିଙ୍ଗି ଥିଲେ। ଏହାଦେଖି ଦୋକାନରେ ବସିଥିବା ଯୁବତୀ ସମ୍ପୃକ୍ତ ଦୁଇ ଯୁବକଙ୍କ କାର୍ଯ୍ୟର ପ୍ରତିବାଦ କରି କାହିଁକି ଏପରି କରୁଛ ବୋଲି ପଚାରିଥିଲେ । ଏହି ସମୟରେ ସେମାନଙ୍କ ମଧ୍ୟରୁ ଜଣେ ଯୁବକ ଯୁବତୀଙ୍କ ହାତଧରି ଟଣାଓଟରା କରିଥିବା ବେଳେ ଅନ୍ୟ ଜଣେ ଯୁବତୀଙ୍କୁ ଆଶାଳିନ ବ୍ୟବହାର ପ୍ରଦର୍ଶନ କରିଥିଲେ। ଯୁବତୀଙ୍କ ପାଟି ଶୁଣି ତାଙ୍କ ବଡଭାଇ ଟିପି ରାଜେଶ ପହଞ୍ଚତ୍ ସମ୍ପୃକ୍ତ ୨ଯୁବକଙ୍କ କାର୍ଯ୍ୟର ବିରୋଧ କରିଥିଲେ । ଫଳରେ ଘଟଣାସ୍ଥଳରୁ ଉଭୟେ ଚାଲିଯାଇଥିଲେ। କିଛି ସମୟ ପରେ ୮/୧୦ ଜଣ ଯୁବକ ପୁଣି ଦୋକାନରେ ପହଞ୍ଚତ୍ ଅସଭ୍ୟ ଭାଷାରେ ଗାଳିଗୁଲଜ କରି ସିମାଞ୍ଚଳଙ୍କ ଘର ଭିତରକୁ ପଶି ଠେଙ୍ଗାରେ ତାଙ୍କ ବଡଭାଇ ରାଜେଶଙ୍କୁ ମାଡ଼ ମାରିଥିଲେ। ଏହି ସମୟରେ ଘରର ଯେଉଁମାନେ ପ୍ରତିବାଦ କରିଥିଲେ ସେମାନଙ୍କୁ ମଧ୍ୟ ୨ ଯୁବକ ମାଡ଼ ମାରି ଲହୁଲୁହାଣ କରିଥିଲେ। ଏଥିରେ ୧୦ଜଣ ଆହତ ହୋଇଥିଲେ। ଖବର ପାଇ ଘଟଣା ସ୍ଥଳରେ ସ୍ଥାନୀୟ ପୋଲିସ ପହଞ୍ଚତ୍ ତଦନ୍ତ କରି ସମ୍ପୃକ୍ତ ଯୁବକମାନେ ଦାମନଯୋଡି ଅଞ୍ଚଳର ବୋଲି ଜାଣିବାକୁ ପାଇଥିଲା। ଏନେଇ ୧୩ ତାରିଖରେ ଆକ୍ରମଣର ଶିକାର ହୋଇଥିବା ବ୍ୟକ୍ତିମାନେ ଥାନାରେ ଲିଖିତ ଅଭିଯୋଗ କରିଥିଲେ । ଏହାକୁ ଭିତ୍ତିକରି ପୋଲିସ ୩/୨୨ରେ ଏକ ମାମଲା ରୁଜୁ କରିଥିଲା। କେବଳ ମାମଲା ରୁଜୁକରି ପୋଲିସ ନିଜ ମୁଣ୍ଡରୁ ଦାୟିତ୍ୱ ଖସାଇ ଦେଇଛି। ଅଭିଯୁକ୍ତଙ୍କୁ ଗିରଫ କରିବାରେ ପୋଲିସ ଆଗ୍ରହ ପ୍ରକାଶ କରୁନାହିଁ ।
