ଭୁବନେଶ୍ୱର,୭।୧୦(ବ୍ୟୁରୋ): ବରଗଡ଼ ଫରେଷ୍ଟ ଡିଭିଜନରୁ ଗୁରୁତର ଆହତ ଅବସ୍ଥାରେ ଭୁବନେଶ୍ୱର ଅଣାଯାଇଥିବା ଏକ ଭାରତୀୟ ଅଜଗରର ଗୁରୁବାର ସିଟି ସ୍କାନ କରାଯାଇଛି। ଓୟୁଏଟି ଭେଟେରିନାରି କଲେଜର ସର୍ଜରି ଓ ରେଡିଓଲୋଜି ବିଭାଗ ପ୍ରଫେସର ଡା. ଇନ୍ଦ୍ରମଣି ନାଥ ମଡର୍ନ ହେଲ୍ଥ କେୟାରଠାରେ ଏହି ସାଢ଼େ ୯ ଫୁଟ ଅଜଗରର ସିଟି ସ୍କାନ କରାଇଥିଲେ। ସାପଟିର ମୁଣ୍ଡକୁ ଲୋକେ ତେଣ୍ଟାରେ ଭୁସିବା ସହିତ ପାଟିକୁ ଗୁରୁତର ଆଘାତ ଦେଇଥିଲେ। ଫଳରେ ସାପଟି ଠିକ୍ରେ ଚଳପ୍ରଚଳ କରିପାରୁନାହିଁ। ସାପ ମୁଣ୍ଡ ଭିତରେ ହୋଇଥିବା କ୍ଷତି ଜାଣିବା ପାଇଁ ଏହି ସ୍କାନିଂ କରାଯାଇଥିଲା। ଏଥିରେ ଡା. ନାଥଙ୍କୁ ଭେଟରିନାରି ସର୍ଜରି ବିଭାଗର ଡା. ସିଦ୍ଧାର୍ଥ ଶଙ୍କର ବେହେରା ସହଯୋଗ କରିଥିଲେ।
ସାପକୁ ସ୍କାନିଂ କରିବା ପୂର୍ବରୁ ନିଶ୍ଚେତକ ଦିଆଯାଇଥାଏ, ମାତ୍ର ଡା. ନାଥ ଏହି ଅଜଗରକୁ ସ୍କାନିଂ କରିବା ପାଇଁ କୌଣସି ନିଶ୍ଚେତକ ଦେଇ ନ ଥିଲେ। ଅଜଗରକୁ ସ୍କାନିଂ ଟେବୁଲ ଉପରେ ରଖିବା ପରେ ଡା. ସିଦ୍ଧାର୍ଥ ଓ ପ୍ରଫେସର ନାଥ ମାଇକ୍ରୋପୋର୍ ପଟି ଲଗାଇ ମୁଣ୍ଡ ଏବଂ ଅଧା ଶରୀରକୁ ସ୍ଥିର କରି ରଖିଥିଲେ। ଏହାପରେ ପ୍ରାୟ ଅଧଘଣ୍ଟା ଧରି ସ୍କାନିଂ କରାଯାଇଥିଲା। ସ୍ନେକ ହେଲ୍ପ ଲାଇନ ସଦସ୍ୟ ସମୀର ମହାକୁଡ ଏବଂ ଆଶିଷ ବେହେରା ଡାକ୍ତରୀ ଟିମ୍କୁ ସହାୟତା କରିଥିଲେ। ପରେ ଅଜଗରକୁ ଓୟୁଏଟି ସର୍ଜରି ବିଭାଗରେ ରଖାଯାଇଛି। ଏ ସମ୍ପର୍କରେ ଡା. ନାଥ କହିଛନ୍ତି, ମଣିଷଙ୍କ କ୍ଷେତ୍ରରେ ଯେଉଁଭଳି ସ୍କାନିଂ ପାଇଁ କମ୍ପ୍ୟୁଟର ସ୍ଥିରୀକୃତ ଫର୍ମାଟ ଅଛି, ସାପ ପାଇଁ ଆମ ଦେଶରେ ସେଭଳି ସ୍ବତନ୍ତ୍ର ବ୍ୟବସ୍ଥା ଆରମ୍ଭ ହୋଇନାହିଁ। ଆମକୁ ସ୍କାନ୍ ଫଟୋ ଦେଖି ସାପର ଆଘାତକୁ ଅନୁଶୀଳନ କରିବାକୁ ହେବ। ତେବେ ୪ ସପ୍ତାହ ପରେ ସାପର ଭବିଷ୍ୟତ ବିଷୟରେ ଅନୁମାନ କରି ହେବ ବୋଲି ସେ ସୂଚନା ଦେଇଛନ୍ତି। ସ୍ନେକ୍ ହେଲ୍ପ ଲାଇନ୍ ସମ୍ପାଦକ ଶୁଭେନ୍ଦୁ ମଲ୍ଲିକ କହିଛନ୍ତି, ଅଜଗରଟିର ପାଟିରେ ଆଦୌ ଦାନ୍ତ ନାହଁି ଏବଂ ମାଢ଼ି ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଛି। ମାଢ଼ି କ୍ଷତ ଶୁଖିବା ପାଇଁ ଆଉ ଏକ ସପ୍ତାହ ଅପେକ୍ଷା କରିବା ପରେ ଆମେ ତାକୁ ଫୋର୍ସ ଫିଡ଼ିଂ କରିବୁ।
