ମହାକାଳପଡ଼ା,୩୦ା୩(ପ୍ରତାପ ଚନ୍ଦ୍ର ସ୍ବାଇଁ): ମହାକାଳପଡ଼ା ବ୍ଲକ ଗୋବରୀ ନଦୀର କାଉସପାଳ ଫେରୁଘାଟଠାରେ ଏକ ୨୦ ଫୁଟ ଲମ୍ବର ବଉଳ କୁମ୍ଭୀର ଘୂରି ବୁଲୁଛି। ଏହାକୁ ନେଇ ନଦୀ କୂଳିଆ ବାସିନ୍ଦା ଆତଙ୍କିତ ହୋଇପଡିଛନ୍ତି। ପାଣିରେ ପ୍ରବେଶ କରିବା ମାତ୍ରେ କୁମ୍ଭୀର ଆକ୍ରମଣରେ ଶିକାର ହେଉଥିବା ଅଭିଯୋଗ ହେଉଛି। କିଛି ମାସ ମଧ୍ୟରେ ବେଣାକନ୍ଧା ମୌଜାର ଜଣେ ମହିଳାକୁ କୁମ୍ଭୀର ଟାଣି ଟାଣି ନେଇଥିଲା। ପରଦିନ କିଛି ଦୂରରେ ମହିଳାଙ୍କ ମୃତଦେହ ଜବତ ହୋଇଥିଲା। ସେହିପରି ଚଳିତ ମାସ ପ୍ରଥମ ସପ୍ତାହରେ କାଉଶପାଳ ମୌଜାର ଜଣେ ମତ୍ସ୍ୟଜୀବୀ ଭଉଁରୀ ଜାଲ ପକାଇବା ବେଳେ କୁମ୍ଭୀର ଟାଣି ନେଇଥିଲା। ପରଦିନ ଉକ୍ତ ସ୍ଥାନରୁ ମତ୍ସ୍ୟଜୀବୀଙ୍କୁ ମୃତଦେହ ଉଦ୍ଧାର କରାଯାଇଥିଲା। ସେହିପରି ୨ ଦିନ ପୂର୍ବରୁ ବାହାର ସୋବଳା ମୌଜାର ଜଣେ ମହିଳା ଶୌଚ ହେବାକୁ ଯାଇ ଗୋବରୀ ନଦୀରେ କୁମ୍ଭୀର ଟାଣି ନେଇଥିଲା। ଏବେ ନିଖୋଜ ମହିଳାଙ୍କ ମୃତଦେହ ଏକଲପୁର ଫେରିଘାଟଠାରେ ଭାସି ଯାଉଥିବା ବେଳେ ସ୍ଥାନୀୟ ଯୁବକ ମାନେ ଦେଖିଥିଲେ। ପରିବାର ଲୋକ ନଦୀରୁ ମହିଳାଙ୍କ ମୃତଦେହକୁ ରବିବାର ଅପରାହ୍ନରେ ଉଦ୍ଧାର କରିଛନ୍ତି। ଅପରପକ୍ଷରେ ୨ ବର୍ଷ ପୂର୍ବେ ଖରିନାସୀ ଅଞ୍ଚଳର ମହିଳାଙ୍କୁ ମାଛ ଧରିବା ସମୟରେ କୁମ୍ଭୀର ଟାଣି ନେଇଥିଲା। ପରେ ମୃତଦେହ ଉଦ୍ଧାର କରାଯାଇଥିଲା। ସେହିପରି କିଛି ମାସ ପୂର୍ବରୁ ବାଘୁଆମେଦ ମୌଜାର ଚାଷୀ ଓ ଜଙ୍ଗଲ ଘେରି ଅଞ୍ଚଳର ମତ୍ସ୍ୟଜୀବୀ ରାମଚଣ୍ଡି ଗଳିଆ ନାଳରେ ମାଛ ଧରିବା ବେଳେ କୁମ୍ଭୀର ସହିତ ଲଢ଼େଇ କରି ଜୀବନ ବଞ୍ଚାଇ ପାରିଥିଲେ। ବନ ବିଭାଗ ପକ୍ଷରୁ ନଦୀ ନାଳରେ ପ୍ରବେଶ ନ କରିବା ପାଇଁ ବାରଣ କରାଯାଇଛି। ହେଲେ ଲୋକମାନେ ଜୀବନ ଜୀବିକା ନିର୍ବାହ ପାଇଁ ନଦୀନାଳରେ ପ୍ରବେଶ କରି ମାଛ କଙ୍କଡ଼ା ଧରି ପରିବାର ପ୍ରତିପୋଷଣ କରୁଛନ୍ତି। କେତେଜଣ ମହିଳା ମାନେ କହିବା କଥା ନଦୀରୁ ପାଣି ଛାଡିବା ପରେ ଆଣ୍ଠୁଏ ପାଣିରେ ଚୁନା ମାଛ, ଚିଙ୍ଗୁଡ଼ି, କଙ୍କଡା ଅଣ୍ଡାଳି ଅଣ୍ଡାଳି ଧରିଥାଉ। ଆମ ଆଗରେ ପଛରେ କୁମ୍ଭୀରକୁ ସାମ୍ନା କରିବାକୁ ପଡ଼େ ବୋଲି ଲକ୍ଷ୍ମୀ ମଣ୍ଡଳ, ଭବାନୀ ମାନ୍ନା , ଶକୁନ୍ତଳା ମଣ୍ଡଳ, ମନୋରମା ଦାସ, କୁସୁମ ମଣ୍ଡଳ, କୁମୁଦିନି ମଣ୍ଡଳ ପ୍ରମୁଖ କହିଛନ୍ତି।
