ନୂଆଦିଲ୍ଲୀ,୧୭।୧୧ : ସମଗ୍ର ବିଶ୍ୱରେ ମାନବ ଜନସଂଖ୍ୟା କ୍ରମାଗତ ଭାବେ ବୃଦ୍ଧି ପାଉଛି। ଏହା ଯୋଗୁ ପ୍ରଦୂଷଣ ବଢ଼ିବା ସହିତ ଜଳବାୟୁ ଉପରେ ମଧ୍ୟ ପ୍ରଭାବ ପଡୁଛି। ଏହି ପରିପ୍ରେକ୍ଷୀରେ ଭାରତ ଏବଂ ପାକିସ୍ଥାନ ଭଳି ଦେଶର ଅବସ୍ଥା ବିଗିଡି ଯାଉଛି। ଷ୍ଟେଟ ଅଫ କ୍ଲାଇମେଟ ଇନ ଏସିଆ ୨୦୨୧ ରିପୋର୍ଟରେ ଏହା ପ୍ରକାଶ ପାଇଛି।
ରିପୋର୍ଟ ଅନୁଯାୟୀ, ଗତ ବର୍ଷରେ ମରୁଡ଼ି ଯୋଗୁଁ ଆର୍ଥିକ କ୍ଷତି ୬୩ ପ୍ରତିଶତ ବୃଦ୍ଧି ପାଇଛି। ଏଥି ସହିତ ବନ୍ୟା ଯୋଗୁଁ ହୋଇଥିବା କ୍ଷତି ୨୩ ପ୍ରତିଶତ ଏବଂ ଭୂସ୍ଖଳନ ୧୪୭ ପ୍ରତିଶତ ବୃଦ୍ଧି ପାଇଛି। ୨୦୦୧ ରୁ ୨୦୨୦ ପର୍ଯ୍ୟନ୍ତ ହାରାହାରି ଅର୍ଥନୈତିକ କ୍ଷତି ସହିତ ଏହି ତୁଳନା କରାଯାଇଛି।
ରିପୋର୍ଟ ଅନୁଯାୟୀ, ଗତ ବର୍ଷ କେବଳ ଜଳ ସହ ଜଡିତ ପ୍ରାକୃତିକ ବିପର୍ଯ୍ୟୟ ଯୋଗୁ ସାରା ବିଶ୍ୱରେ ୨.୮୮ ଲକ୍ଷ କୋଟି ଟଙ୍କା କ୍ଷତି ଘଟିଛି। ପ୍ରାୟ ପାଞ୍ଚ କୋଟି ଲୋକ ଏହା ଦ୍ୱାରା ପ୍ରଭାବିତ ହୋଇଛନ୍ତି।
ଷ୍ଟେଟ ଅଫ କ୍ଲାଇମେଟ ଇନ ଏସିଆ -୨୦୨୧ ରିପୋର୍ଟରେ ଦର୍ଶାଯାଇଛି ଯେ ଗତ ୪୦ ବର୍ଷ ମଧ୍ୟରେ ପାଞ୍ଚଟି ପ୍ରମୁଖ ହିମାଳୟ ଗ୍ଲେସିୟର ଦ୍ରୁତ ଗତିରେ ତରଳି ଯାଇଛି। ମରୁଡ଼ି ଏବଂ ତାପମାତ୍ରା ବୃଦ୍ଧି ଯୋଗୁ ଦକ୍ଷିଣ-ପୂର୍ବ ତିବ୍ଦତୀୟ ମାଳଭୂମି, ପୂର୍ବ ହିମାଳୟ ଉପରେ ପ୍ରଭାବ ପଡିଛି।
୨୦୨୧ମସିହାରେ, ଏସିଆରେ ୧୦୦ ରୁ ଅଧିକ ପ୍ରାକୃତିକ ବିପର୍ଯ୍ୟୟ ଘଟିଥିଲା, ସେଥିମଧ୍ୟରୁ ୮୦ ପ୍ରତିଶତ ବନ୍ୟା ଏବଂ ଝଡ ସହିତ ଜଡିତ ଥିଲା। ଏହି କାରଣରୁ ୪ ହଜାର ଲୋକଙ୍କର ମୃତ୍ୟୁ ହୋଇଥିଲା। ଅଧିକାଂଶ ମୃତ୍ୟୁ ବନ୍ୟା ଯୋଗୁଁ ଘଟିଛି। ଏହା ଦ୍ୱାରା ୪.୮୩ କୋଟି ଲୋକ ସିଧାସଳଖ ପ୍ରଭାବିତ ହୋଇଥିଲେ।
ସବୁଠାରୁ ଭୟଙ୍କର ମରୁଡ଼ି ଇରାନ, ଇରାକ, ଆଫଗାନିସ୍ତାନ ଏବଂ ଆରବରେ ଘଟିଛି। ରୁଷିଆର ଦୂର ପୂର୍ବାଞ୍ଚଳ ଏବଂ ୨୦୨୧ ମସିହାରେ ଦକ୍ଷିଣ-ପଶ୍ଚିମ ଏସିଆ ଏବଂ ପୂର୍ବ ସାଇବେରିଆରେ ବାର୍ଷିକ ହାରାହାରି ବୃଷ୍ଟିପାତ କମ ହୋଇଛି।
ଭାରତ, ପାକିସ୍ଥାନ, ମ୍ୟାନମାର ଏବଂ ଚାଇନାର ପଶ୍ଚିମ ଏବଂ ପୂର୍ବ ଏସୀୟ ଅଞ୍ଚଳରେ ତାପମାତ୍ରା ସ୍ବାଭାବିକଠାରୁ ଅଧିକ ଥିଲା। ପ୍ରବଳ ବର୍ଷା ଯୋଗୁଁ ଏହି ଦେଶଗୁଡିକ ପ୍ରଭାବିତ ହୋଇଥିବା ରିପୋର୍ଟରେ ପ୍ରକାଶ ପାଇଛି।
