ଭବାନୀପାଟଣା,୩୦ା୭(ଉତ୍ତମ କୁମାର ଦାଶ): କଳାହାଣ୍ଡି ଜିଲା ଏମ୍. ରାମପୁର ଥାନା ଅନ୍ତର୍ଗତ କୁଟ୍ରୁପଲା ଗାଁରେ ୨୦୧୪ରେ ହୋଇଥିବା ଏକ ହତ୍ୟା ମାମଲାର ରାୟ ଗୁରୁବାର ପ୍ରକାଶ ପାଇଛି।
କଳାହାଣ୍ଡି ଜିଲା ଓ ଦୌରା ଜଜ୍ ଅନୁପ ରଞ୍ଜନ ପଟ୍ଟନାୟକ ଏହି ମାମଲାରେ ୧୭ ସାକ୍ଷ୍ୟ ଓ ପ୍ରମାଣକୁ ଭିତ୍ତି କରି ଉକ୍ତ ଗ୍ରାମର ବିବିଷଣ ପାତ୍ରଙ୍କୁ ଦୋଷୀ ସାବ୍ୟସ୍ତ କରି ଆଜୀବନ ଜେଲ ଦଣ୍ଡାଦେଶ ଶୁଣାଇବା ସହ ୧୦ ହଜାର ଟଙ୍କା ଜରିମାନା କରିଛନ୍ତି।
ପ୍ରକାଶ ଯେ, କୁଟ୍ରୁପଲା ଗାଁର ନରୋତ୍ତମ ଭୋଇ ୩୦ ଅଗଷ୍ଟ ୨୦୧୪ ରାତିରେ ନିଜ ପୁତୁରାଙ୍କୁ ଖୋଜିବାକୁ ଯାଇ ଆଉ ଫେରି ନ ଥିଲେ। ପରଦିନ ଜମିରୁ ତାଙ୍କର ମୃତଦେହ ଜବତ କରାଯାଇଥିଲା। ତେବେ ନରୋତ୍ତମଙ୍କୁ ଅଭିଯୁକ୍ତ ବିବିଷଣ ଓ ତାଙ୍କ ୨ ଭାଇ ଟାଙ୍ଗିଆରେ ହତ୍ୟା କରିଥିବା ପୁତୁରା ଦେଖିବାକୁ ପାଇଥିଲେ।
ଏହାପରେ ଅଭିଯୁକ୍ତ ବିବିଷଣ ଓ ୨ ଭାଇ ମଧ୍ୟ ନିଜ ଦୋଷ ସ୍ବୀକାର କରିଥିଲେ। ଏହି ଘଟଣାରେ ପୋଲିସ ସେତେବେଳେ ଏକ ମାମଲା (ନଂ.୬୭/୨୦୧୪)ରୁଜୁ କରି ଅଭିଯୁକ୍ତ ବିବିଷଣ ଓ ତାଙ୍କ ୨ଭାଇଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ତେବେ ପରବର୍ତ୍ତୀ ସମୟରେ ୨ ଭାଇ ଫେରାର ମାରିଥିଲେ। ଫଳରେ ଜଣେ ଅଭିଯୁକ୍ତ ବିବିଷଣଙ୍କ କୋର୍ଟରେ ବିଚାର ହୋଇଥିଲା। ଏହି ମାମଲାଟିକୁ ସରକାରଙ୍କ ପକ୍ଷରୁ ପିପି ମନୋଜ କୁମାର ମେହେର ପରିଚାଳନା କରୁଥିଲେ।
