ଲକ୍ଷ୍ନୌ, ୫ା୪: ଉତ୍ତରପ୍ରଦେଶର ସୀତାପୁର ଜିଲାରେ ଭାଜପା ନେତା ଉମେଶ ମିଶ୍ରାଙ୍କ କାର୍ ରାସ୍ତା ଅବରୋଧ କରିବାରୁ ଆମ୍ବୁଲାନ୍ସ ହସ୍ପିଟାଲ ଯାଇ ନ ପାରି ରୋଗୀଙ୍କ ମୃତ୍ୟୁ ଘଟିଛି। ନେତାଙ୍କ ଅବହେଳା ପାଇଁ ରୋଗୀଙ୍କ ମୃତ୍ୟୁ ଘଟିଲା ବୋଲି ପରିବାର ପକ୍ଷରୁ ଅଭିଯୋଗ କରାଯିବା ପରେ ଉମେଶ ସେମାନଙ୍କୁ ଧମକ ଦେଇଛନ୍ତିି।
ଶନିବାର ରୋଗୀ ସୁରେଶ ଚନ୍ଦ୍ରାଙ୍କ ଛାତିରେ ଯନ୍ତ୍ରଣା ହେବାରୁ ତାଙ୍କୁ ଜିଲା ସ୍ବାସ୍ଥ୍ୟକେନ୍ଦ୍ର ନିଆଯାଉଥିବା ବେଳେ ହୃଦ୍ଘାତ ହୋଇଥିବା ଡାକ୍ତର କହିଥିଲେ ଓ ତୁରନ୍ତ ଲକ୍ଷ୍ନୌ ହସ୍ପିଟାଲକୁ ରେଫର କରିଥିଲେ। ତେବେ ଉମେଶ ତାଙ୍କ କାର୍କୁ ରାସ୍ତାରେ ରଖି କୁଆଡ଼େ ଚାଲିଯାଇଥିବାରୁ ଆମ୍ବୁଲାନ୍ସ ୩୦ ମିନିଟ ପର୍ଯ୍ୟନ୍ତ ଅଟକି ରହିଥିଲା। ଏହି ସମୟରେ ଆମ୍ବୁଲାନ୍ସରେ ସୁରେଶଙ୍କର ମୃତ୍ୟୁ ଘଟିଥିଲା।
କିଛି ସମୟ ପରେ ଉମେଶ ସେଠାରେ ପହଞ୍ଚତ୍ ଓଲଟା ରୋଗୀଙ୍କ ପରିବାର ଲୋକଙ୍କ ସହ ଯୁକ୍ତି କରିବା ସହ ପରିଣାମ ଭୟଙ୍କର ହେବ ବୋଲି ଧମକ ଦେଇଥିଲେ। ସେଠାରେ ଉପସ୍ଥିତ ଜଣେ ବ୍ୟକ୍ତି ଘଟଣାର ଭିଡିଓ ଶୁଟିଂ କରିଥିଲେ। ଉମେଶ ଭାଜପା ନେତା ତଥା ବ୍ଲକ୍ ମୁଖ୍ୟ ରାମକିଙ୍କର ପାଣ୍ଡେଙ୍କ ଭାଇ କହି ରୋଗୀଙ୍କ ଭିଣୋଇଙ୍କୁ ଗାଳିଦେଉଥିବା ଭିଡିଓରେ ଦେଖିବାକୁ ମିଳିଛି। ଜିଲାପାଳ, ଏସ୍ପି ତାଙ୍କ ନିର୍ଦ୍ଦେଶରେ କାର୍ଯ୍ୟ କରୁଛନ୍ତି। ସେ ରୋଗୀଙ୍କ ଭିଣୋଇଙ୍କୁ ଶେଷ କରିଦେବେ ବୋଲି କହୁଥିବା ଦେଖାଯାଇଥିଲା।
