ଖୋର୍ଦ୍ଧା ଅଫିସ,୨୮ା୩: ଖୋର୍ଦ୍ଧା ପୌର ନିର୍ବାଚନରେ ଶାସକ ଦଳ ବିଜେଡି ବାଜି ମାରି ନେଇଛି। ୪ଟି ପୌର ଆସନରେ ବିଜେଡି ବହୁମତ ହାସଲ କରିଥିବା ବେଳେ ଅଧ୍ୟକ୍ଷ ପଦବୀ ମଧ୍ୟ ବିଜେଡି ହାତକୁ ଯାଇଛି। ପୁଣି ଥରେ ମୁଖ୍ୟମନ୍ତ୍ରୀ ତଥା ବିଜେଡି ମୁଖ୍ୟ ନବୀନ ପଟ୍ଟନାୟକଙ୍କ ଯାଦୁ ଆଗରେ ବିରୋଧୀ ଫିକା ପଡ଼ିଲେ। ଭୁବନେଶ୍ୱର ଏମ୍ପି ଅପରାଜିତା ଷଡ଼ଙ୍ଗୀ ଏବଂ ଜଟଣୀ ବିଧାୟକ ତଥା କଂଗ୍ରେସ ନେତା ସୁରେଶ କୁମାର ରାଉତରାୟଙ୍କ କୌଣସି ପ୍ରଭାବ ପଡ଼ିଲାନାହିଁ। ଜଟଣୀରେ ଘନଘନ ପ୍ରଚାର ସତ୍ତ୍ୱେ ଭାଜପା ଖାତା ଖୋଲିପାରିଲା ନାହିଁ। ସେହିପରି ବିଧାୟକ ରାଉତରାୟ ନିଜ ଗଡ଼ ବଞ୍ଚାଇ ପାରିଲେ ନାହିଁ। ଖୋର୍ଦ୍ଧାରେ ଗୋଟିଏ ବି କାଉନସିଲର ଆସନରେ କଂଗ୍ରେସ ଜିତିି ପାରିଲା ନାହିଁ। ଶେଷ ପର୍ଯ୍ୟନ୍ତ ଦଳ ପକ୍ଷରୁ କୌଣସି ଷ୍ଟାର କ୍ୟାମ୍ପେନରଙ୍କ ଦେଖା ନ ଥିଲା। ପ୍ରଚାରର ଶେଷ ଦିନରେ ରାଉତରାୟ ଖୋର୍ଦ୍ଧାରେ ମଇଦାନକୁ ଓହ୍ଲାଇଥିଲେ। ଦଳୀୟ ପ୍ରାର୍ଥୀମାନେ ନିଜ ଭରସାରେ ନିର୍ବାଚନ ଲଢିଥିଲେ। ଦଳ ପକ୍ଷରୁ ସେମାନଙ୍କୁ ସେପରି କୌଣସି ସହଯୋଗ ମିଳି ନ ଥିଲା। ଫଳରେ କଂଗ୍ରେସ ସତ୍ତା ହରାଇଲା ବୋଲି ସାଧାରଣରେ ଚର୍ଚ୍ଚା ହେଉଛି।
ଅନ୍ୟପଟେ ପଞ୍ଚାୟତ ନିର୍ବାଚନରେ ଭୁବନେଶ୍ୱର ସଂସଦୀୟ କ୍ଷେତ୍ରରେ ଭାଜପା ଧରାଶାୟୀ ହୋଇଥିଲା। ପୌର ନିର୍ବାଚନରେ ଏହାର ପ୍ରଭାବ ପଡ଼ିବ ନାହିଁ ଓ ଭାଜପା ବହୁମତ ସହ ବିଜୟ ଲାଭ କରିବ ବୋଲି ଅପରାଜିତାଙ୍କ ଦମ୍ଭୋକ୍ତି ଫସର ଫାଟିଗଲା। ଜଟଣୀରେ ଭାଜପା ବିପକ୍ଷରେ ଜନାଦେଶ ଯାଇଛି। ଏଠାରେ ଭାଜପା ଗୋଟିଏ ଆସନରେ ଜିତିିଛି। ଦୁଇଟି ନିର୍ବାଚନରେ ସୁରେଶ ଏବଂ ଅପରାଜିତାଙ୍କ ବିଫଳତାକୁ ନେଇ ଆଲୋଚନା ଜୋର ଧରିଛି। ବିଫଳତାକୁ ନେଇ ଉଭୟ ଦଳ ସମୀକ୍ଷା କରିବା ଆବଶ୍ୟକ ବୋଲି ରାଜନୀତି ବିଶେଷଜ୍ଞ ମତ ଦେଇଛନ୍ତି। ଏନେଇ ସୁରେଶ କହିଛନ୍ତି, ଶାସକ ଦଳ ନିର୍ବାଚନୀ ହିଂସା, ଭୋଟରଙ୍କୁ ଟଙ୍କା ଦେଇ କିଣିଲେ। ଆମେ ଗଣତନ୍ତ୍ରରେ ବିଶ୍ୱାସ କରୁ। ଭୋଟରଙ୍କ ନିକଟତର ହୋଇଥିଲୁ। ତେବେ ଭୋଟର ଆମକୁ ପ୍ରତ୍ୟାଖ୍ୟାନ କରିଛନ୍ତି। ଏହାର ସମୀକ୍ଷା କରାଯିବ। ଆଗାମୀ ସାଧାରଣ ନିର୍ବାଚନରେ ଦଳ ପୁଣି ଥରେ ପ୍ରଭାବ ଦେଖାଇବ ବୋଲି କହିଛନ୍ତି। ସେହିପରି ଅପରାଜିତା କହିଛନ୍ତି, ଦଳକୁ ଆହୁରି ତୃଣମୂଳ ସ୍ତରରେ ସୁଦୃଢ଼ କରାଯିବ। ଖୋର୍ଦ୍ଧାରେ ୪ ଓ ଜଟଣୀରେ ଗୋଟିଏ ଆସନରେ ଭାଜପା ଜିତିିଛି। ଭୋଟ ହାର ଭଲ ରହିଛି। ଭାଜପା ଉପରେ ବିକାଶ ଉପରେ ବିଶ୍ୱାସ ରଖେ। ଲୋକଙ୍କ ସେବା ଜାରି ରହିବ।
