ବ୍ରହ୍ମପୁର ଅଫିସ,୨୮ା୯: ଗଞ୍ଜାମ ବିଜେଡିର ଜିଲାସ୍ତରୀୟ ସମବାୟ ନିର୍ବାଚନ କମିଟି ବୈଠକ ମଙ୍ଗଳବାର ବ୍ରହ୍ମପୁରରେ ଅନୁଷ୍ଠିତ ହୋଇଯାଇଛି। ଅକ୍ଟୋବରରେ ହେବାକୁ ଥିବା ବ୍ରହ୍ମପୁର ଓ ଆସିକା ସମବାୟ କେନ୍ଦ୍ର ବ୍ୟାଙ୍କ ନିର୍ଦ୍ଦେଶକ ନିର୍ବାଚନରେ ପୌର ସଂସ୍ଥାକୁ ନିର୍ବାଚିତ ହୋଇଥିବା କର୍ପୋରେଟର ଓ କାଉନସିଲରମାନେ ଲଢ଼ିପାରିବେ ନାହିଁ ବୋଲି ନିଷ୍ପତ୍ତି ନିଆଯାଇଛି। ଏହାସହ ଦଳର ଚିହ୍ନରେ ନିର୍ବାଚନ ଲଢ଼ି ନିର୍ବାଚିତ ହୋଇଥିବା ଜିଲା ପରିଷଦ ସଦସ୍ୟା ଓ ସଦସ୍ୟ ଏବଂ ସଭାପତି ଓ ଉପସଭାପତିଙ୍କ ପ୍ରତି ମଧ୍ୟ ଏହି ନିୟମ ଲାଗୁ ହୋଇଛି। ବିଜେଡି ସମର୍ଥକ ପଞ୍ଚାୟତ ସମିତି (ବ୍ଲକ) ଅଧ୍ୟକ୍ଷ ଓ ଉପାଧ୍ୟକ୍ଷଙ୍କ ପ୍ରତି ମଧ୍ୟ ଏହି ନିଷ୍ପତ୍ତି ମାନିବା ପାଇଁ ବାଧ୍ୟ କରାଯାଇଛି।
ସ୍ବତନ୍ତ୍ର ସର୍କିଟ ହାଉସରେ ହୋଇଥିବା ବୈଠକରେ ଆହୁରି ମଧ୍ୟ ସମବାୟ ଅନୁଷ୍ଠାନ ସହ ବ୍ୟବସାୟିକ କାରବାର ଥିବା ଏବଂ ଋଣ ନେଇ ପରିଶୋଧ କରିନଥିବା ଦଳ କର୍ମୀ ଓ ନେତାଙ୍କୁ ନିର୍ବାଚନ ପ୍ରତିଦ୍ୱନ୍ଦ୍ୱିତାରେ ଭାଗ ନେବାକୁ ବିଜେଡି ବାରଣ କରିଛି। ଦୁଇ ସମବାୟ କେନ୍ଦ୍ର ବ୍ୟାଙ୍କର ୩୦ ଜୋନରେ ଆପରାଧୀକ ମାମଲା ଥିବା ଲୋକ ଯେଭଳି ପ୍ରାର୍ଥୀ ନ ହେବେ ସେଥିପ୍ରତି ତୀକ୍ଷ୍ମ ନଜର ରଖାଯିବାର ବୈଠକରେ ମତ ପ୍ରକାଶ ପାଇଛି। ପଦ ପଦବୀରେ ଥିବା ଦଳର ଲୋକେ ସମବାୟ ନିର୍ବାଚନରେ ବାଦ ପଡ଼ିବା ସ୍ପଷ୍ଟ କରାଯାଇଛି। ପ୍ରଥମଥର ପାଇଁ ଶାସକ ବିଜେଡି ପକ୍ଷରୁ ଏହି କଠୋର ନିଷ୍ପତ୍ତି ନିଆଯାଇଥିବା ଚର୍ଚ୍ଚା ହେଉଛି।
ବୈଠକରେ ବିଜେଡି ଗଞ୍ଜାମ ଜିଲା ପର୍ଯ୍ୟବେକ୍ଷକ ମନ୍ତ୍ରୀ ପ୍ରଫୁଲ୍ଲ ମଲିକ, ଶ୍ରମମନ୍ତ୍ରୀ ଶ୍ରୀକାନ୍ତ ସାହୁ, ଦୁଇ ଏମ୍ପି ଚନ୍ଦ୍ରଶେଖର ସାହୁ ଓ ପ୍ରମିଳା ବିଷୋୟୀ, ଗଞ୍ଜାମ ବିଜେଡି ସଭାପତି ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ, ଗଜପତି ଜିଲା ସଭାପତି ପ୍ରଦୀପ ନାୟକଙ୍କ ସମେତ ବିକ୍ରମ ପଣ୍ଡା, ସୁବାସ ବେହେରା, ପୂର୍ଣ୍ଣଚନ୍ଦ୍ର ସ୍ବାଇଁ ଓ ଲତିକା ପ୍ରଧାନ ପ୍ରମୁଖ ବିଧାୟିକା ଓ ବିଧାୟକ ଯୋଗଦେଇ ବିଭିନ୍ନ ପ୍ରସଙ୍ଗରେ ମତ ରଖିତ୍ଥିଲେ। ସମବାୟ ନିର୍ବାଚନ ପାଇଁ ଗଠିତ ଦଳର କମିଟି ସଦସ୍ୟ ବୀରେନ୍ଦ୍ର ଆରୁଖ, କୈଳାସ ରଣା, ସୁଧୀର ରାଉତ, ଆର. ରାମ ପ୍ରସାଦ, ଧନଞ୍ଜୟଲୁ ଓ ଅନ୍ୟମାନେ ଉପସ୍ଥିତ ଥିଲେ।
ବୈଠକ ଶେଷରେ ଚ୍ୟାଉ ପଟ୍ଟନାୟକଙ୍କ ସୂଚନାନୁସାରେ ସମବାୟ ନିର୍ବାଚନରେ ସ୍ବଚ୍ଛତା ରଖାଯିବାକୁ ଗୁରୁତ୍ୱ ଦିଆଯାଇଛି। ୨୦୧୫ ସମବାୟ ନିର୍ବାଚନରେ ଦଳକୁ ଯେଭଳି ସଫଳତା ମିଳିଥିଲା, ଆଗାମୀ ନିର୍ବାଚନରେ ମଧ୍ୟ ସେହି ଧାରା ବଜାୟ ରଖିବାର ନିଷ୍ପତ୍ତି ନିଆଯାଇଛି। ଦଳ ପାଇଁ ସର୍ବଦା ସମର୍ପିତ ଏବଂ ସମବାୟ କ୍ଷେତ୍ରରେ ଅଭିଜ୍ଞତା ଥିବା କର୍ମୀଙ୍କୁ ପ୍ରାର୍ଥୀ ଚୟନରେ ସମର୍ଥନ କରାଯିବ। ଏଥର ଯେଉଁ କେତେକ କଟକଣା ଲଗାଯାଇଛି ତାହାଦ୍ୱାରା ନୂଆ ଲୋକ ନିର୍ଦ୍ଦେଶକ ନିର୍ବାଚନ ଲଢ଼ିବାର ବାଟ ଫିଟିବ। ଶୃଙ୍ଖଳିତ ଭାବେ ସମବାୟ ନିର୍ବାଚନ ପାଇଁ ବିଜେଡି ପ୍ରୟାସ ଜାରୀ ରଖିବାର ସେ ସ୍ପଷ୍ଟ କରିଛନ୍ତି।
