ଭଞ୍ଜନଗର,୨୮।୯(ଡି.ଏନ.ଏ): ଗତବର୍ଷ ରାଜ୍ୟ ସରକାର ଯେଉଁ ବିଦ୍ୟାଳୟରେ ୨୦ରୁ କମ୍ ଛାତ୍ରୀଛାତ୍ର ଅଛନ୍ତି ଏବଂ ଏକ କି.ମି. ମଧ୍ୟରେ ଦୁଇଟି ସ୍କୁଲ ଥିଲେ ଗୋଟିଏକୁ ବନ୍ଦ କରିବା ପାଇଁ ନିଷ୍ପତ୍ତି ନେଇଥିଲେ। ଏହି ନିୟମ ଯୋଗୁ ରାଜ୍ୟରେ ଏଭଳି ହଜାର ହଜାର ସାଟେଲାଇଟ୍ ସ୍କୁଲ ବନ୍ଦ ହେଉଥିବାରୁ ଅନେକ ବିଦ୍ୟାଳୟର ପରିଚାଳନା କମିଟି କୋର୍ଟ ଦ୍ୱାରସ୍ଥ ହୋଇଥିଲେ। କୋର୍ଟ ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ଆଇନର ଆଶ୍ରୟ ନେଇଥିବା ସାଟେଲାଇଟ୍ ସ୍କୁଲଗୁଡ଼ିକ ଯେଉଁଠି ଥିଲା ସେଇଠି ରଖିବା ପାଇଁ ନିର୍ଦ୍ଦେଶ ଦେଇଛନ୍ତି। ତେଣୁ ଅନେକ ସାଟେଲାଇଟ୍ ସ୍କୁଲ ଉନ୍ନୀତ ଉଚ୍ଚ ବିଦ୍ୟାଳୟରେ ମିଶି ନ ଥିଲା। ଏଭଳି ସ୍ଥିତିରେ ଚଳିତ ଶିକ୍ଷାବର୍ଷ ଠାରୁ ସାଟେଲାଇଟ ସ୍କୁଲରେ ମଧ୍ୟାହ୍ନଭୋଜନ ସମେତ ଅନ୍ୟାନ୍ୟ ସରକାରୀ ସୁବିଧା ବନ୍ଦ କରି ଦିଆଯାଇଥିବାରୁ ଛାତ୍ରୀଛାତ୍ର ଓ ଅଭିଭାବକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ଭଞ୍ଜନଗର ବ୍ଲକରେ ୨୬ଟି ସାଟେଲାଇଟ୍ ସ୍କୁଲ କାର୍ଯ୍ୟକ୍ଷମ ଅଛି। ଆଉ ୧୫ଟି ସାଟେଲାଇଟ୍ ସ୍କୁଲ ଉନ୍ନୀତ ଉଚ୍ଚ ବିଦ୍ୟାଳୟରେ ମିଶିଥିଲା। ବ୍ଲକର ୨୬ଟି ସାଟେଲାଇଟ୍ ସ୍କୁଲରେ ମଧ୍ୟାହ୍ନ ଭୋଜନ ଓ ଅନ୍ୟ ସରକାରୀ ସୁବିଧା ବନ୍ଦ କରିଦିଆଯାଇଛି । ଏନେଇ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଦୃଷ୍ଟିଦେଇ ତୁରନ୍ତ ଆବଶ୍ୟକ ପଦକ୍ଷେପ ନେବାକୁ ସାଧାରଣରେ ଦାବି ହୋଇଛି । ଅନ୍ୟପକ୍ଷରେ ଶିକ୍ଷା ଅଧିକାର ଆଇନ ଅନୁସାରେ ପ୍ରଥମରୁ ୮ମ ଶ୍ରେଣୀ ଛାତ୍ରୀଛାତ୍ରଙ୍କୁ ମାଗଣା ଶିକ୍ଷା ବ୍ୟବସ୍ଥା କରାଯାଇଛି ା ତେଣୁ ସେମାନଙ୍କୁ ମଧ୍ୟାହ୍ନ ଭୋଜନ, ଜୋତା, ଡ଼୍ରେସ ଆଦି ଦିଆଯାଉଛି । ହେଲେ ୯ମ, ୧୦ମ ଶ୍ରେଣୀ ଛାତ୍ରୀଛାତ୍ରଙ୍କୁ ମଧ୍ୟାହ୍ନଭୋଜନ ଯୋଜନାରେ ସାମିଲ କରାଯାଉନାହିଁ । ଏଥିପାଇଁ ଉନ୍ନୀତ ଉଚ୍ଚ ବିଦ୍ୟାଳୟଗୁଡ଼ିକରେ ମଧ୍ୟାହ୍ନଭୋଜନ ବଣ୍ଟନ ଦାୟିତ୍ୱରେ ଥିବା ସ୍ବୟଂ ସହାୟିକା ଗୋଷ୍ଠୀ, ଶିକ୍ଷକମାନେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି। ଭଞ୍ଜନଗର ବ୍ଲକରେ ୧୨ଟି ଉନ୍ନୀତ ଉଚ୍ଚ ବିଦ୍ୟାଳୟ ଅଛି । ସେଗୁଡ଼ିକ ହେଲା ବାହାଡ଼ାପଦର, ଇନ୍ଦାଗଡ଼, ବାଇବାଲି, ଲାଲସିଂ, ସୋମନାଥ ପ୍ରାକ୍ଟିସ୍, ଭଞ୍ଜନଗର ଦୀନବନ୍ଧୁ ବେହେରା ସରକାରୀ ବାଳିକା ଉଚ୍ଚ ବିଦ୍ୟାଳୟ, ୟୁବି ହାଇସ୍କୁଲ, ଗୋଲାପଡ଼ା, ରାଇପଲ୍ଲୀ, ତଳଜିବିକା, ବ୍ରାହ୍ମଣପଦର, ବୁଦୁଲି ଉନ୍ନୀତ ଉଚ୍ଚ ବିଦ୍ୟାଳୟ। ଏସବୁ ବିଦ୍ୟାଳୟରେ ଗୋଟିଏ କ୍ୟାମ୍ପସ ମଧ୍ୟରେ ପ୍ରଥମରୁ ୧୦ମ ଶ୍ରେଣୀ ଥିବା ବେଳେ କେବଳ ୮ମ ଶ୍ରେଣୀ ପର୍ଯ୍ୟନ୍ତ ଛାତ୍ରୀଛାତ୍ରଙ୍କୁ ମଧ୍ୟାହ୍ନ ଭୋଜନ ଦେବା ନିୟମ ଅଛି । ଏସବୁ ସ୍କୁଲରେ ସରକାର ୯ମ,୧୦ ଶ୍ରେଣୀ ଛାତ୍ରୀଛାତ୍ରଙ୍କୁ ମଧ୍ୟ ମଧ୍ୟାହ୍ନ ଭୋଜନ ଯୋଜନାରେ ସାମିଲ କରିବା ପାଇଁ ଅଭିଭାବକମାନେ ଦାବି କରିଛନ୍ତି। ଏ ନେଇ ଭଞ୍ଜନଗର ବିଇଓ ଏସ୍. ଧନଞ୍ଜୟଙ୍କ ସହ ଯୋଗାଯୋଗ କରାଯାଇଥିଲେ ମଧ୍ୟ ତାଙ୍କ ଫୋନ ଲାଗି ନ ଥିବାରୁ ମତାମତ ନିଆଯାଇପାରିନାହିଁ । ଜଣେ ସିଆରସିସି କହିଛନ୍ତି, ବ୍ଲକର ସାଟେଲାଇଟ୍ ସ୍କୁଲ ଛାତ୍ରୀଛାତ୍ରଙ୍କୁ ଚଳିତ ଶିକ୍ଷାବର୍ଷର କୌଣସି ସୁବିଧା ଆସିନାହିଁ। କେବଳ ଶିକ୍ଷକମାନେ
ଯାଇ ପାଠ ପଢ଼ାଉଛନ୍ତି ।
