ପ୍ୟାରିସ, ୨୨ା୯ (ଏପି)-ଫ୍ରେଞ୍ଚ୍ ଓପନ୍ ପାଇଁ କ୍ୱାଲିଫାଇଂ ରାଉଣ୍ଡ ପୂର୍ବରୁ ଦୁଇ ଖେଳାଳି କରୋନା ପଜିଟିଭ ହୋଇଥିବା ଫ୍ରେଞ୍ଚ ଟେନିସ୍ ଫେଡେରେଶନ (ଏଫ୍ଟିଏଫ୍) କହିଛି। ଅନ୍ୟପକ୍ଷରେ ଟେଷ୍ଟ ରିପୋର୍ଟରେ ପଜିଟିଭ୍ ଆସିଥିବା ଜଣେ କୋଚ୍ଙ୍କ ସଂସ୍ପର୍ଶରେ ଆସିଥିବା ଅନ୍ୟ ୩ଜଣ ଖେଳାଳି କରୋନା ସଂକ୍ରମିତ ହୋଇଥିବା ଜଣାପଡ଼ିଛି। ଏହି ୫ଜଣ ଖେଳାଳିଙ୍କୁ ଆଇସୋଲେଶନରେ ରଖାଯାଇଛି। ସେପ୍ଟେମ୍ବର ୨୭ରୁ ଅକ୍ଟୋବର୧୧ ପର୍ଯ୍ୟନ୍ତ ହେବାକୁଥିବା ଟୁର୍ନାମେଣ୍ଟ ଲାଗି ସୋମବାରଠାରୁ ଆରମ୍ଭ ହୋଇଥିବା କ୍ୱାଲିଫାୟର୍ସରେ ଅଂଶଗ୍ରହଣରୁ ଏହି ୫ ଖେଳାଳିଙ୍କୁ ବାଦ୍ ଦିଆଯାଇଥିବା (ଏଫ୍ଟିଏଫ୍) କହିଛି। ଆୟୋଜକଙ୍କ ପକ୍ଷରୁ କୌଣସି ଖେଳାଳି କିମ୍ବା କରୋନା ସଂକ୍ରମିତ କୋଚ୍ଙ୍କ ନାମ ପ୍ରକାଶ କରାଯାଇ ନାହିଁ। ତେବେ ଏକ ଓ୍ବେବ୍ସାଇଟ୍ରେ ପ୍ରକାଶିତ ରିପୋର୍ଟ ଅନୁସାରେ କୋଚ୍ ଜଣଙ୍କ ନାମ ହେଉଛି ପେଟାର ପୋପୋଭିଚ୍ ଏବଂ ଖେଳାଳିମାନଙ୍କ ମଧ୍ୟରୁ ଜଣଙ୍କର ନାମ ଦାମିର ଦିଜୁମହର। ଓ୍ବେଷ୍ଟର୍ନ ପ୍ୟାରିସରେ ହେବାକୁଥିବା କ୍ଲେ-କୋର୍ଟ ଟୁର୍ନାମେଣ୍ଟ ପାଇଁ ଗୁରୁବାରଠାରୁ ଏପର୍ଯ୍ୟନ୍ତ ୯୦୦ ଜଣଙ୍କର କରୋନା ଭାଇରସ୍ ଟେଷ୍ଟ ହୋଇ ସାରିଲାଣି।
